إرهاصات ....مسافر

السلام عليكم

دلوقتى معايا وقت كتييييييييير لوحدى, على رأى فيروز كراوية ميييين يشرب القهوة معاك الصبح, مييييين يرغى فى التليفون وياك للصبح ....مييييييين؟

محمد يشرب القهوة مع نفسه يوميا صباحا ولكن فى بلاد جديدة غير مصر, الغربة لها طعم مختلف, سافرت كثيرا لوحدى لفترات طويلة بس كلها داخل بلدى كنت حاسس لو حصلى حاجة أنى متغطى, فى غطاء لو أتعريت هيغطينى لو نمت حد هيغطينى لو تعبت حد هيهتم بى لو لو لو مش مهم كان مين بس كان فى الآخر هو مصرى سواء كان إسكندرانى سيوى من المنصورة من من من ...أمى او أبى أو اخى أو صديقى او حبيبتى أو أو أو..المهم كان مصرى أو مصرية

بس أنا اللى أخد القرار وقررت الخروج من مصر لوطن آخر لابد أن أكون صاحى وعينى فى رأسى لأنى لو نمت هاموت من البرد أو الحر مافيش حد هيهتم بيا لو تعبت لازم أستحمل؟

ده كله ليه...؟سؤال النهاردة سألته لنفسى النهاردة وأنا لوحدى بادور على مطعم آكل فيه , وبافكر هاعمل أيه فى بكره وبكرة أجازة...مش عارف

بعد تفكير عميق لقيت أنى ده كان قرارى لازم أستحمله بس برده عرفت أنى القرار ده كان عامل مؤثر فى إتخاذه هو حبى الشديد لبلدى ولا أستطيع أن أراها تختطف هكذا ولا يهتم أحد بها ولا أستطيع فعل شىء فقررت الخروج حتى لا أكون كالمتفرج...؟ سامحينى ياأمى معلش كنت نفسى أبقى معاكى بس ده قرارى

أمى هنا مصر وأمى التى ولدتنى

أطلب من الكل أن يسامحنى

طبعا علشان ماحدش يقلق عليا أنا ساكن فى شقة مؤثثة أثاث كامل مع 3 مصريين والشغل الحمد لله حلو ومرتاح , بس باقوم الصبح باتحسس أخبار مصر فى التليفزيون قبل ما أنزل الشغل ولما أسمع أخبار زى قانون القضاء العسكرى ومد سن القضاه وإغلاق دار الخدمات النقابية ووووووو ..كلها أخبار تحزن ألاقى نفسى بافكر فيكم كلكم وكيف حالكم

بجد أنتوا المضحييييين مش أنا أنا هربت..... أنتوا اللى قاعدين ..ربنا معاكم أنتوا اللى المفروض تتكرموا ....أنا باشكركم وباقولكم سامحونى

باشكر كل أب وام وكل فلاح وفلاحة عامل وعاملة كل إنسان على أرض المحروسة شكرا ليكم كلكم على ماقدمتموه لى ولغيرى من المغتربين, نحن هربنا وأنتم تضحون من أجلنا .

بحبك وحشتينى ...بحبك وأنت نور عينى..بحبك وأنت مطلعة عينى ..باحبك موووووووووووووووت....مصر وأهل مصر بكل مافيهم من عيوب ومشكلات ...أيضا بهم كثيييير من المميزات