السلام عليكم
على الصبح كده مش عارف ليه اللى خلانى أفتح الجزيرة واشوف الأخبار لأقيت أ خبار كده طعمها ماسخ ومعلش على الألفاظ اللى هستخدمها فى البوست ده علشان انا قاربت على الانفجار
اولا ابن القذافى يطالب بدستور جديد للبلاد ولكن الاسلام والقذافى خطان أحمران....هاقول ايه بس القذافى بقى متساوى مع الاسلام...بأنهى منطق ده يمشى ..الناس دى بتخدر شعوبها بيضحكوا على الناس...بلاش أقولكم انى كل ماسمع القذافى فى التليفزيون باضحك...فين شعبه فين بلده لسه عايش فى نظام الجماهيرية ...سعبه حعان جاهل..شوفه الفرق بينه وبين زايد الإمارات.شوفه حب الشعب الاماراتى لزايد....زى القذافى برده كده بس على أقل شوية حبيبى وصديقى عمدتنا وابنه وشيخ الخفر ربنا يهديهم كلهم
الخبر التانى انقطاع التيار عن قطاع غزة....حماس وفتح يتنازعوا حكم تحت الاحتلال ...فتح تحالفت مع الشيطان وحماس متشوقه وسال لعابها للسلطة وتركت المقاومة .....من الآخر الشعب الفلسطينى ابتلى بالاحتلال وبسياسيين فاسدين...ومصر بتتفرج ومعاها كل الدول العربية....هاقول ايه غير حسبى الله ونعم الوكيل
الخبر التالت انى انا قرفان وزهقان ..البنت بتاعة الجزيرة جمانة ...قالت الخبر بالظبط كده...بلغنا ان السيد محمد يعانى من حالة من القرف والزهق وقد قام مراسلنا فى الخليج العربى بتتبع رحلاته للوقوف على اسباب قرفه وزهقه حيث انه لايتسنى لنا الوصول اليه بسهوله وننتظر لقاء موسع معه فى عزبه العمدة لكى يحكى لنا عن نشطاته وافكاره كما وعدنا...بالله عليكم اسأله العمدة وابنه وشيخ الخفر هادخل العزبة بسهوله ولا فيه مشاكل..أصل اشتقت للعزبة قوى بترابها ووشوش ناسها الطيبين المثقلة بالهموم...واشتقت اشوف خفر العمدة ..ومية الترعة اللى بقت شحيحة بحجة انى الناس بتستحمى كتيير ده الكلام اللى قاله مسئول الصرف والمجارى فى العزبة....والعيش المغموس بالمسامير والتراب بعد ماكنا بناكل من يد امهاتنا عيش بتاو وعيش ملدن وعيش فلاحى بس برده ده من انجازات العمدة ....
العزبة هاقول ايه ولا ايه عنها برده باحبها وباحب أهلها وهافضل بينى وبين العمدة وشيخ الخفر فريندشب طويلةم ممتدة
بلاش اخبار تانية بقى علشان عاوز انزل الشغل ..وعلشان سيرة العزبة بتنسينى نفسى خالص
سلام دلوقتى
No comments:
Post a Comment