ياقبضتى

يا قبضتي دقي على الجدار
لحد ليلنا ما يتولد له نهار
يا قبضتي دقي على الحجر
لحد ما تصحي جميع البشر
مش فاهم اللي حاصل
لكن بقلبي واصل
واللي مش فاهمه عقلي بتشرحه السلاسل
يا قلوب بتنزف دم في العتمة
يا قلوب بتنزف دم وتغني
سجنوكي والكلمة غصبن عنها
وعني طلعت من القضبان
وم الاسوار
القصيدة دى منقولة عن مدونة دماغ ماك

تحيا مصر

السلام عليكم

يارب النية الصادقة والإخلاص , يارب التوفيق

يا زوار مدونتى الصغيرة حبوا الله وبحبكم لله ستحبون بلادكم وبحبكم لبلدكم ستحبون أعمالكم وستحبون أهليكم وستحبون أنفسكم

مصر مصر مصر تحيا مصر وتعيش مصر حرة مستقرة

أتمنى لكم التوفيق , دعواتكم أنى اليوم يكون يوم إنتصار الرأى الحر يوم إنتصار إرادة الشعب

أقسم بالله العظيم أن اكون مخلصا لجمهورية مصر العربية وأن أدافع عنها ضد كل عدو وضد كل غاصب والله على ماأقول شهيد .تحيا مصر تحيا مصر تحيا مصر

ده النشيد اللى أتربيت عليه فى مدرستى كل يوم فى طابور الصباح

سلام وربنا يستر

خواطر السادسة صباحا..3

السلام عليكم

إستكمالا لما حدثتكم عنه ,أنه سيكون خير رفيق وصديق فى أيام الغربه وسيكون حلقة الوصل بينى وبين الآخرين ألا وهو جهاز الكومبيوتر

سأفرغ مافى رأسى من خواطر كما كل يوم

مقالة الدكتور جلال امين أمس عن الفقر والبؤس فى المصرى اليوم معبرة جدا عن الحالة التى نعيشها الآن فى مصر

سأكتب أسئلة كثيرة تتوارد على ذهنى, لغاية لما الاقى نفسى عاوز انام

ليه بنحب مصر؟ وماذا تعنى مصر؟

ماهو الوطن؟

مادورى ودور كل مواطن فى وطنه؟

ماهو الحلم او الهدف المشترك الذى نسعى لتحقيقه من اجل مصر؟

ماهو ماضينا الذى نتغنى به ليل نهار وماهو حاضرنا فى ظل وجود كل هذا حولنا وكيف نستطيع إستشراف المستقبل؟

هل النفوس العليلة والأفواه الجائعة والعيون الشارده والأجسام البالية تستطيع صنع مستقبل؟

لمن نصنع المستقبل وهل أبائنا وشيوخنا وقادتنا صنعوا لنا حاضرا ؟

هل هناك مؤامرة وكيف السبيل لمواجهتها؟

لماذا كل هذا الفساد؟

لماذا نحن متدينون شكلا ومظهرا بعيدون كل البعد عنه فى تعاملنا فى الحياة؟

هل الدين مظهر فقط أم تعامل ومعاملات؟

أحنا رايجين على فين؟

ليه جمال مبارك وليه مش جمال مبارك؟

يعنى أيه حد يعمل عكس اللى مقتنع به بحجة الظروف ولقمة العيش؟

يعنى أيه ولد وبنت فى الشارع على الكورنيش الساعة 8 فى البرد امبارح واقفين امام النيل؟

يعنى أيه ليبرالى وما علاقتها بالدين؟

يعنى أيه مش متربى؟وأيه معنى متربى؟

عاوز انام علشان كل سؤال وانا باكتبه ليه إجابة عندى فى مخى, علشان كده تعبت ولازم انام

يارب الإخلاص والتوفيق

سلام

غدا يوم الحرية

السلام عليكم

غدا بعد 18 ساعة فقط يوم من ايام الحرية فى الحديقة الدوارة بميدان التحرير سأقول لا بصوت عالى للتعديلات الدستورية

سأقولها جهرا ولكننى لااعلم هل سأكون موجودا لكى اقولها فى الصندوق يوم 4-20 مش عارف بس برده مش موافق

طيب علشان الناس اللى ماتعرفش التعديلات وليه انا معترض

أولا الرئيس مبارك طلب تعديل 34 مادة من مواد الدستور منهم 13 مادة متعلقة بالنظام الإشتراكى سيتم إلغائهم وسيستبدل بنظام رأسمالى ماليش أى إعتراض علشان أنا رأسمالى كبير وإن شاء الله هيبقى لى شركة كبيرة فى المستقبل بتشغل إن شاء الله 10000 موظف وبتحقق أرباح إن شاء الله بلاش أقولكم أحسن تحسدونى:)

نيجى لبيت القصيد المادة 79والمادة 88 والمادة 77

المادة 79 بتعديلها المقترح سترسخ فكرة الطوارىء وستستبدله بقانون الإرهاب وستعطى سلطات واسعة لرئيس الجمهورية فى هذا الشأن

المادة 88 بتعديلها ستلغى إشراف القضاء على الأنتخابات وستستبدلها بلجنة مشكلة من غير القضاة وسيتركز دور القضاة فى الفرز فى اللجنة العامة وليست اللجان الفرعية

المادة 77 لم تعدل وستعطى مدة غير محدودة للرئيس

شوقتوا معترضين ليه

اللى موافق يقول نعم واللى معترض يقول لا

أنا مبسوط مبسوط مبسوط ...عاشت مصر حرة مستقرة

خواطر....السادسة صباحا 2

السلام عليكم

مش عارف كل مافتح الجهاز ألاقى نفسى حابب أكتب وأكتب واكتب, طبعا مش كلام أدبى ولكن كتابة للتنفيس كتابة علشان كل اللى فى دماغى ينزل , علشان أعرف أنام

معلش أستحملوا بأه

كل ماشوف بشر أو حاجة ليها علاقة بمصر يبقى نفسى أخد حته معايا منهم , الوشوش اللى قايمة الصبح تسعى لرزقها الناس البسيطة اللى بيربوا عيالهم, الفلاح اللى بيصلى الفجر ويطلع على الغيط يفتح القناية علشان يسقى الزرع و يده مليانة طين مشققة كل خط من الخطوط يعبر عن عن موقف ما إما المنجل قطع غلط أو شوكة من الزرع المهم يبقى نفسى أبوسها وهيا مليانة طين علشان أعرف أد أيه اليد دى بتعمل خير

يد الست الفلاحة اللى قايمة فى الفجر دلوقتى بتعجن وبتخبز وبتحلب الجاموسة وتفقع بيض فى السمن البلدى علشان العيال ياكلوا قبل المدرسة وكمان تكنس الدار وتنضفه, رائحة الدار الرطبة ودخان الفرن والفراخ اللى بتمشى فى الدوار كما لو كانت جزء منهم, يدها الجميلة اللى بتعبر عن انوثة بس مغموسة بشقاء وعناء الدهر وبعد كده تتطلع الغيط تودى أكل لجوزها مربوط فى منديل وتاكل هو وهيا فى الارض وعلى الأرض وسط الخضرة وبياكلوا مش وبصل وعيش بتاو , ويحلموا مع بعض يارب الجاموسة تعشر والمحصول يجب إيراد كويس علشان نجوز الواد والبنت ربنا يسترها وتتجوز وفلان وعلان وتنتان ووووووووو

مش عارف افتكرت القصة دى ليه بس دى قصص مصرية خالصة

أكتر يد باحب أسلم عليه وتسعدنى وانا باسلم عليها مش اليد الناعمة الرقيقةسواء أنثى أو رجل , أجمل يد يد الفلاح اللى صوابعها تخينة وصغيرة كده ومهما تغسلها فيها شقوق وتجاويف بجد يد طاهرة شريفة جميلة ويد الست الفلاحة ذات الأصابع الطويلة برده ناعمة بس مش علشان كريم نيفيا لكن علشان السمن البلدى وعلشان كل حاجة بتعملها بأيدهاوكمان تلاقى حرارة فى يديها تشعرك بالدفء والحب والطمأنينة والصفاء

لبس الفلاح جلباب وصديرى وسروال عمامة ومنديل تشمهم تحس برائحة التراب بس أحسن من كريستيان ديور والست لابسة الجلابية الملس بألوانها الكثيرة وهى مصنوعة من الحرير الخالص والمنديل بأيييوة ولما تخرج تلبس الملس الاسود وعلي وجها البيشة او البرقع

الله يرحمها جدتى كنت لما ازور معاه البلد مجرد ماننزل من العربية تلاقيها تجيب الطرحة الحرير السوده, عمرى ماشوفتها إلا وهيا لابسة الطرحة الحرير السوده وتوصى اللى رايح السعودية يجيبلها أعداد منها مافيش أى طرح ملونة خالص, وتضع الطرحةعلى وشها وتمسكها بشفايفها كانت تربط الطرحة وتثبتها بدون دبابيس ,واسألها ليه كده تقولى شايف واحدة ماشية كاشفة وشها وتدخل الدار يستقبلوا المصراوية وهاتك أسئلة مصر عاملة ايه وازاى اللى فى مصر بس من كلامهم تحس بدفء وطمأنينة, والقلل والزير والحمام البلدى اللى لازم تقلع كل هدومك علشان تستخدمه ولو قعدت مش هاتقوم , وشاى فى الخمسينة وزفر على الأكل بط ووز وأرانب وطبيخ ليه ريحة مختلفة وحياة سهلة وعيشة هادية ونفوس صافية

الجمد لله على كل شىء

القصة دى مش من وحى خيالى ولا أفلام فعلا أنا عشتها مع جدتى لأمى رحمها الله عندما سافرت لأقاربها لثلاثة أيام متتالية وانا اللى كنت مرافق ليها وكنت صغير فاتيحت لى الفرصة للتجول والتعامل بحرية فى ارجاء هذا المنزل الريفى الجميل القصة دى من 15 سنة

الله يرحمهم كلهم

شوية أخبار بتوع كل يوم

السلام عليكم

العنوان من مطلع اغنية لوجيه عزيز بتقول..... شوية هموم بتوع كل يوم تلف فى راسى.... أفر يطلونى.... ولما يطلونى... أقلع مداسى.... -وألعن دماغ اللى نايم وناسى

أخبار فى بعض مش عارف أنتظر لغاية بكرة

أولا الرئيس الفرنسى جاك شيراك اعلنها أمس أنه لن يرشح نفسة لفترة رئاسة قادمة مع أن الدستور الفرنسى يسمح له بذلك بمده أقصاها

أثنى عشر عاما 12 وقد قال بالحرف الواحد للشعب الفرنسى أسمحوا لى ألا أترشح لفترة رئاسة قادمة وسوف أخدمك بطريقة أخرى باحب فرنسا هكذا قال الرئيس والله العظيم أنا حبيت الراجل ده علشان هو خدام الشعب وبيقولها كده من غير مايتكسف تحيا شيراك

ثانيا الرئيس الليبى فى تعليقه على التجربة الموريتانية سخر من الشعب الموريتانى وقال عنه أنه شعب قبلى مفكك , قام رد عليه رئيس المجلس العسكرى المؤقت وقاله أحنا فخورين أننا قبليون , قوم أنا أرد عليهم الأتنين وأقولهم تحيا ولد فال رئيس المجلس العسكرى الموريتانى على موقفه سيادة الفريق معمر لوسمحت أرجوك أستحلفك أسترحمك فك عن دماغنا وسيب موريتانيا فى حالها وليبيا تعيش جماهيرية تشاركية وشوية ألفاظ كده بس المؤكد أنها مافيهش ريحة ديموقراطية بدليل وجودكم والكتاب الأخضر

ثالثا الدكتور هانى سرور وأخته أتخانقوا مع بعض أمبارح حول من المسئول عن أكياس الدم الغير مطابقة وكمان النيابة أفرجت عنهم بكفالة بس أنا باحذر من هروب الدكتور هانى واخته الدكتورة نيفين, أنا قلبى أسود ونيتى سوده ومليان كلاكيع , بس صدقونى التجارب السابقة بتقول كده ممدوح إسماعيل وإيهاب طلعت ورامى لكح وووووووووناس كتيرة

بس على فكرة لو هيهربوا وكمان هياخدوا كل الفاسدين وكل الحرامية اللى فى البلد أنا اللى هوصلهم بنفسى وهابات قدام المطار لغاية لما أطمئن أنهم سافروا وبالورود هاودعهم كمان

سلام

منقول ..نداء من الدكتور عبد الوهاب المسيرى

نداء من الدكتور عبد الوهاب المسيرى

إن مصرنا العزيزة في خطر
إن النظام الحاكم لم يكتفي بكل الكوارث التي انزلها بنا على مدى ربع قرن، فبعد بيع مقدرات البلاد و تشريد العمال، وبعد رهن ثروات الوطن لعقود قادمة و بدلا من ان يحاول هذا النظام البائس الثأر لدماء أولادنا الأسرى أو القبض على عصابات الفساد المعروفة للجميع أو حتى منع التعذيب في أقسام الشرطة و السجون0 00بدلا من ذلك نجده يقوم بهجمة شرسة ضد الديمقراطية وضربا لكل المكتسبات الموجودة في الدستور الحالي حتى التي لم تكن تحترم وذلك تحت اسم "التعديلات الدستورية " و كل هذا من اجل توريث الحكم وكأن مصرعزبة تباع وتورث

اننى أنادى كل شرفاء هذا الوطن للتحرك الجماعي و العمل معا من اجل تغيير سلمى يجنب البلاد مخاطرالفوضى و العنف بمواجهة ما يحدث دفاعا عن مصرنا ومستقبل أولادنا،
ولهذا فانا أدعو كل المصريين للاحتشاد بميدان التحرير يوم الخميس 15/3 الخامسة مساءا تعبيرا عن كل القيم الجميلة الباقية في هذا الوطن و التي لايمكن بيعها



د/عبد الوهاب المسيرى
منسق عام الحركة المصرية من اجل التغيير
" كفاية"

شكر واجب لكل الأخوة والاخوات

السلام عليكم
رسالة شكر إلى بعض الأخوة من قراء مدونتى الصغيرة
طبعا بعض الناس هيفتكر من كلمة أخوة أنى من الإخوان ..منطق أمنى بأه:) , لكنى أقصد أخوة فى الله وأخوة فى بلادنا العزيزة مصر
باشكر كل الناس ذكور وإناث أسدوا لى نصيحة أو معلومة بجد الشكر ده ناتج عن إقتناع بما قدموه لى من نصح وإرشاد وكمان اد أيه نصحهم ده فادنى كتييير
وباقول لكل الناس اللى يعرفونى منهم واللى مش يعرفونى , بفضل الله والحمد لله على هذه النعمة أنى مخى زى بالظبط بروسيسر وهارد الكومبيوتر ممكن تفصله وتقسمه ومافيش جزء يأثر على جزء تانى وممكن الجزء المصاب من من هذا الهارد والبروسيسور يتكتب عليه من أول وجديد بطريقة تانية وبمعلومات جديدة غير ذات صلة بالموضوع السابق , ده من نعمة ربنا على العبد لله
وفى النهاية كل تجربة ليها مميزات وعيوب , المهم الإنسان يتعلم لعدم تكرار الخطأ ولا يؤثر ذلك بعلاقتى مع أى شخص
هاحكيلكم حاجة حلوة قوى ممكن منكم حد يكون يعرفها, وانا فى الكليه كنت مقضيها مع نفسى بمزاجى يعنى أقرأ اللى أنا عاوزه وأشترك فى الأنشطة اللى عاوزها وأذاكر اللى باحبه ووقت الإمتحان زميل من زملائى يفتح دماغى قبل الإمتحان بيوم أو ممكن يوم الإمتحان الصبح ويصب على قد مايقدر فى دماغى من معلومات وأدخل الإمتحان أصبهم فى الورقة وأخرج ناسى الحاجات اللى مش باحبها
بس عمرى ماسبت ولا محاضرة وعمرى ماكرهت دكتور أو معيد عارفين ليه؟
علشان كانت نظرتى لأساتذتى نظرة مختلفة, نظرة إنسان لإنسان وفعلا عندى ورقة فى البيت فيها أسماء كل من درسوا لى وكل واحد فيه صفة جميلة حبتها فيه وصفة بغيضة كرهتها فيه على فكرة هما 82 دكتور ومعيد من أصل حوالى 320 عضو هيئة تدريس بكليتى العزيزة
هو ده اللى طلعت بيه من الكليه بجانب التفكير العلمى المنظم وبعض المعلومات القيمة
ولكن عمرى ساعة النتيجة أشوف أنا جبت تقدير كام , أهم حاجة أكون ناجح وبس لغاية سنة رابعة بدأت أشوف تقديرى التراكمى وانا باستلم شهادة التخرج
المادة او المحاضرة أو السنة اللى مش مفيدة بالنسبة لى أو بمعنى تانى وقت ضايع هى التى لم أكتسب إنسانيا من صاحبها او صاحبتها صفة أو معلومة غير المنهج الدراسى
فى النهاية أنا مبسوط جدا والحمد لله وباشكر كل أخوانى وأخواتى وياريت نحافظ على علاقتنا كأخوات ومرحبا بكل من يرانى أخا له , وباطلب أنى أى حد غلطت فيه أو سببت له ألم أنه يسامحنى من أخواتى

خواطر الساعة السادسة صباحا

السلام عليكم

أصدقائى الأعزاء قراء مدونتى الصغيرة بجد عدد جامد جدا جدا وهو عدد المصرى اليوم أمس 07-3-11 بجد عدد جامد موت فعلا عدد تذكارى ممكن تقرأوه عن طريق الموقع الإلكترونى للجريدة , العدد يناقش ألغام تهدد مستقبل مصر وأوجاع تواجه البيت المصرى

ثانيا ميعادنا لمن هو معترض على التعديلات والطريقة التى تم عرض التعديلات بها يوم الخميس القادم فى الحديقة الدوارة حديقة الحرية فى وسط ميدان التحرير للتعبير عن رأينا فى التعديلات الدستورية

ثالثا لمن هو موافق على التعديلات أكيد الحزب الوطنى هيعمل حاجة يؤكد بها أن الشعب موافق على التعديلات لذلك أرجو من الموافقين النزول وإعلان موافقتهم علانية والوقوف بجانب الحزب الوطنى

رابعا لمجموعة المتفرجون المتحدون لابد من المشاركة فيما انت مقتنع به أنزلوا وعبروا عن أرائكم سواء مع أو ضد التعديلات على الأقل,

الحركة بركة ياناس ياهو, المصارين فى البطن بتتحرك الناس فى الشارع بتتحرك الغازات بتتحرك الحركة دليل على الحياة أتحركوا

خامسا سؤال مباغت على الصبح كده هل الحزب وقياداته هم الذين يحركون الأمن أم ان الامن هو الذى يحرك قيادات الحزب , السؤال بمعنى تانى هل تدار مصر بعقلية أمنية, بمعنى تالت برده هل كل المواقف التى تتخذ تجاه أى موضوع تكون مرجعيتها أمنية؟ الإجابة فى وضعنا الحالى نعم كبيرة وبصوت عالى ده على الأقل وجهة نظرى

سادسا أنا مبسوط جدا جدا جدا مش عارف ليه بس مبسوط يمكن علشان لقاء الحرية يوم الخميس؟, يمكن علشان كان فيه موضوع شاغل تفكيرى وأنتهى والحمد لله ؟, يمكن علشان ميعاد السفر قرب خلاص؟, يمكن علشان مش عارف هارجع تانى ولا لأ؟ ,يمكن علشان إنتظارى لما هو قادم؟, يمكن يمكن يمكن ...حاجات كتير فى بعض بس المؤكد أنى مش مبسوط بسبب سيجارة حشيش أو حبة صراصير أو حبوب هلوسة ...بس مبسوط قوى قوى قوى ربنا يبسطكم كلكم

عن الشهيد محمد

السلام عليكم

النهاردة هاتكلم عن الشهيد محمد ولمن لا يعرفون قصته

هو مصرى شاب زى وزيكم عمره 24 سنة يعمل بجهاز الشرطة المصرية كملازم فى يوم من أيام الأسبوع الفائت كانت هناك فتاة أيضا فى عمرى وعمركم تركب سيارة ميكروباص لتوصيلها إلى منزلها ولكن الشيطان أغوى السائق وصديقه لكى يقوموا بجريمة بشعة وهى إغتصاب تلك الفتاة

أستغاثت الفتاة بكل من حولها ولم تجد من يغيثها حتى ظهر هذا الكمين الذى يقف فيه هذا الشهيد البطل الذى أستطاع أن يوقف السيارة وان يخرج الفتاة قبل أن تعبث اليد الآثمة بجسدها ولكن اليد الغادرة أمسكت بمسدسه الميرى فأنطلقت منه رصاصة أخترقت جسمه ومات

الملاحظ فى تللك الحادثة أننا فى مصر لازال منا من هم عندهم نخوة ومن الشباب أيضا الذى يضرب به المثل فىالإستهتار وفى كل ماهو بذىء نقول لا هذا هو النموذج والمثال للشباب المصرى

ثانيا لم يفرق هذا الرجل بين تلك الفتاة او اختها على اساس دينى او عرقى او أو بمعنى تانى كان هدفه وجه الله وإنقاذ الضحية وأنا متأكد أنه برده لو كان جون هو اللى واقف فى الكمين كان هايعمل كده برده وده يؤكد على وحدة النسيج المصرى

ثالثا الإخلاص والتفانى وحب الله ومن ثم حب الوطن والعمل لم يثنوا هذا البطل عن التضحية فى سبيل الواجب والشرف بمعنى آخر هذا الشاب لم ينظر لنفسه وماينتظره فى المستقبل القريب بعد أسبوعين فقط أنه سيتزوج وسيبنى أسرة وووو أستطاع فى لحظة أن يتوحد مع مبادئه وأهدافه وأن يقرر أن الواجب والشرف فوق كل شىء

رابعا إلى كل المجرمين فى مصرنا العزيزة إنا لكم بالمرصاد نحن وأمثال محمد من الشرفاء فى هذا الوطن ومصر لم تعقم عن ولادة الشرفاء فى جميع التخصصات والمجالات

خامسا رسالة لكل شاب وفتاة من مصرنا العزيزة حبوا ربكم وبحبكم لربكم ستحبون أوطانكم وأعمالكم وستحبون أنفسكم وسيكون الغد بأيدينا مكان أفضل للعيش لنا ولأبنائنا فى مصرنا العزيزة

أبو زيد الفاتح....شكرا

السلام عليكم

خبر متأخر شوية بس معلش

أبعث بخالص شكرلى وإمتنانى للجنرال جون أبى زيد على كل مجهوداته التى قام بها فى الثلاث سنوات الأخيرة فى حرب العراق كما ألوم على كل الملوك والرؤساء العرب كيف لم ينتهجوا نهج مصر فى تكريم هذا الفاتح المغوار الذى ساعدنا فى التخلص من حكم الطاغية صدام وفى تفتيت العراق إلى أقليات وتضعيف قوته

طبعا كنا هانكرم الرئيس الأمريكى نفسه المبشر بالديموقراطية فى كل مكان بس لاقينا أنها هاتكون مفقوسة لذلك قررنا تكريم الإدارة الأمريكية فى صورة أبو زيد الفاتح

طبعا باقى الصقور سينالون تكريما من نوع آخر بدءا من وولفتيز رئيس البنك الدولى اللى ياعينى غلبان لدرجة انه لما سافر تركيا وجيه يدخل مسجد أضطر يقلع الجزمة فاتكسف لأن الشراب بتاعة كان مقطوع من عند الصباع الكبير

إلى كوندى الجميلة بجد البنت دى تعبانة قوى قوى بتلف العالم كله لحل مشكلاته لدرجة أنها نسيت أنها بنت لسه وماتجوزتش بجد هى دى التضحية, نهاية بوزير الدفاع السابق رامسفيلد اللى ياولداه وشوه دايما مصفر وممقوت كده من إنشغاله الدائم بتخفيف التوترات فى كل بلدان العالم لدرجة أنه بعد ماساب الوزارة رجع لنشاطه تانى ووشه بقى مورد كده ومنور ومراته مبسوطة منه قوى عكس ماكان فى الوزارة

بجد شكرا لكل هؤلاء وتحية خاصة لكل المحافظين الجدد من الشعب المصرى

ومنتظرين دور الإدارة الجديدة فى حل مشكلة دارفور والتخلص من الفلسطينيين اللى تاعبين دماغنا بتفجيرات وقلاقل هنا وهناك

تحيا أمريكا وكل الإدارات الأمريكية السابقة واللاحقة وبجد أنا نفسى أزور البيت الأبض علشان أشيل السواد اللى على قلبى اللى نضح على وشى واللى خلانى كئيب

وكمان شكرالمصر حكومة وشعبا على أنهم أختاروا الطريق الصح وهو طريق ماما أمريكا رايح جاى عكس بعض الدول الغير عربية كاكوبا وفنزويلا اللى هايموتوا من الجوع وسيصابوا بالويل والثبور وعظائم الأمور لتركهم فلك ماما

ياجدعان الأم هى الأم سواء ماما فى البيت الجنة تحت قدميها وماما فى الدول الديموقراطية على يديها وماما فى الحكومات اللى بتدبر أمورنا علشان نعيش شكرا للكل

طبعا عاوز أصرخ بعلو صوتى وأقول ليههههههههههههههههههههههههههههههههههههههههه التكريم لأبو زيد عاوز تفسير مقنع والهطل اللى أنا كاتبه فوق ده من غمى وحزنى على حالنا وحال العراق وحال كل الدول التابعة لماما

رسالة شكر للحاكم العسكرى لموريتانيا

السلام عليكم

رسالة منى الى الحاكم العسكرى ورئيس المجلس العسكرى الحاكم لمور يتانيا منذ عامين بعد الإطاحة بولد الطايع فى 2005

شكرا لتنفبذك وعدك وإجراء الإنتخابات المريتانية بعد 4 أيام فقط من اليوم بين 19 مرشح لست أنت منهم ولا أحد من أعضاء المجلس العسكرى

بجد حاجة تفرح وتحزن فى نفس الوقت

حاجة تفرح أنى فيه رئيس عربى أوفى بوعده وأعطى قدوة ولم يغره المنصب وأنه الأوحد والوطنى المبشر بالديموقراطية وأنه يخاف على شعبه من بعده وسيظل إلى آخر نبض ونقطة دم والكلام الكبير قوى قوى قوى

حاجة تحزن بجد أنى أمثال هذا الرجل وزملاؤه فى موريتانيا لن يتكرروا صدقونى مش هيتكرروا

ماعلينا شكرا سيادة الرئيس وشكرا لزملائك وحفظ الله مصر ومريتانيا وسائر الدول العربية من كل سوء

لست أقصد الرؤساء والملوك والسلاطين العرب بل أقصد الشعوب والذى أتمنى أن يكون الملوك والرؤساء والسلاطين فى يوم من الأيام من ضمن الشعوب التى يحكمونها وليسوا هم الملهمين المبشرين بالخير دائما وباقى الشعب هم الرعايا والخراف

عاشت مصر حرة مستقرة

فى الشوارع ....من موقع مأمون المليجى

مظاهرة بميدان التحرير 15-3 للتعبير عن رفض التعديلات الدستورية

مظاهرة بميدان التحرير 15-3 للتعبير عن رفض التعديلات الدستورية
البداية:15/03/2007 - 17:00
النهاية:15/03/2007 - 20:00
تدعو الحركة المصرية من أجل التغيير(كفاية) كل ناشطيها ومختلف القوى الوطنية للإشتراك في مظاهرة بميدان التحرير في الخامسة مساء يوم 15-3-2007 وذلك للتعبير عن رفض التعديلات الدستورية التي يقوم بها الحزب الوطني من جانب واحد والتي تهدف في الأساس الى إستمرار الحكم الديكتاتوري للبلاد وتوريث السلطة وإلغاء الإشراف القضائي

أولها موافقون ..وآخرها صابون..هى أغنية

السلام عليكم

ده بالظبط كان عنوان خبر فى جريدة المصرى اليوم عن أغنية جديدة لمطرب يوصف بأنه ثورى هو مأمون المليجى...هو يصف نفسه بأنه يقدم أغانى تعبر عن الشارع وتلمسه

كلمات الأغنية

موافقون معارضون أصحاب ذقون

موافقون موافقون

شلة أبالسة منافقون

لو قال على التفاح بصل

وإن قال على المشمش زتون

بيختموله ويصفقوله

ويقولوله موافقون

معارضون معارضون

واخدين شعار الميكروفون

بيعقدونا بفكرهم

ويوصلونا للجنون

أصحاب ذقون

الذمة أوسع من الماعون

بيحللوا كل البدع

وبيغسلوا الكدب بصابون

بجد كلمات أغنية حلوة قوى قوى قوى