Sunday, March 25, 2007

بص وشوف ..الحزب الوطنى بيعمل أيه

حلاوتها أم على ..يابهية ياغرقانة ومحروقة شوفى ولادك
أصحى ياشعب مصر
ميعادنا اليوم الساعة 6

Friday, March 23, 2007

يوم الأحد ..الإعتصام الاخير

السلام عليكم
نظرا لبعض التدوينات عن الخوف اللى من حق كل الناس وأنا مش هانكر أنى خوفت ولكن بلادى بلادى
من لها سواى وكل الشرفاء من هذا الوطن
فيه حاجة مهمة جدا زبانية التعذيب وهاتكى العرض فى مصر عددهم أد أيه علشان نخاف؟ قولولى بصوت عالى قولوا عددهم, اكتر منى ومنك ؟؟؟؟, أكيد لأ.... أحنا اللى بنكترهم بخوفنا منهم, أحنا اللى بنخليهم يعملوا اللى بيعملوه
لازم نصحى ونفوق من الخوف, احنا اللى عملناهم آلهه, أحنا اللى خلناهم يستعبدونا بسكوتنا وخوفنا وقهرنا
أصحى يامصر
أصحى يامصر
ولابد عن يوم معلوم تترد فيه المظالم ابيض على كل مظلوم وأسود على كل ظالم
أبيض علينا واسود على جلادينا واللى نهبنا واللى سارقنا
أبيض بتحركنا وبعلو صوتنا, هذا اليوم لن يجىء على طبق من فضة لازم تضحيات وتضحيات
المهم النية والإخلاص
يارب العون من عندك
استمع الى مصطفى بكرى تعليقا على التعديلات
الجزء الأول
http://www.linux-fr34k.com/Soka/Blogger/7ntklm%20media/Bakri-1.wma
استمع الى الجزء الثاني
http://www.linux-fr34k.com/Soka/Blogger/7ntklm%20media/Bakri-2.wma
==================================
مدير مركز حقوقي يوضح سبب خطورة التعديلات
http://www.linux-fr34k.com/Soka/Blogger/7ntklm%20media/bahi.WMV
=================================
http://www.linux-fr34k.com/Soka/Blogger/7ntklm%20media/nowab1.wmv
اعتصام النواب
===================================
http://www.linux-fr34k.com/Soka/Blogger/7ntklm%20media/nowab4.wmv
اعتصام النواب

إعتصام الأحد..مش عاوزين تعديل دستور ...عاوزين حرية

السلام عليكم
أستكمالا للبلوج بتاع الإعتصام باقترح كل واحد يجيب معاه غطيان حلل أو أطباق صاج ومعالق واللى مش عاوز يجيب ده أو ده يجيب صفارة, باتكلم بجد الصفارة والخبط على الأغطية وسيلة حلوة قوى لتوصيل صوتنا بدل الهتاف علشان كده أو كده صوتنا هيتقطع
وماتنسوش سدادات للأذن, فى النهاية إن شاء الله عفاريت ميدان التحرير تطلع عليهم الأمن طبعا وبتوع السلق بتوع مجلس الشعب وتركبهم ويروحوا يوم الإستفتاء متعفرتين ونبقى كده أنجزنا
بجد ملامح العصيان هتظهر حريق قلعة الكبش وتظاهر حاجزى أرض مبارك باحذر من ثورة الجياع

Thursday, March 22, 2007

ألحق آخر مظاهرة قبل التعديل البوليسى




مش عايزين تعديل دستور ....عاوزين حرية
.يوم الأحد 25\3 الساعة 6 هنكون كلنا في ميدان التحرير , كل الأحزاب والتيارات والاتجاهات , رجالة وستات , ولاد وبنات , هنبات ليلة في الشارع نقول كلمتنا ونوصل صوتنا ونبقى عملنا جزء من اللي علينا قدام نفسنا وولادنا وقدام ربنا , مهما يعملوا هننزل الشارع ومش هنخاف ومش حنسيب بلدنا عشان احنا أصحابها .






دعوة من المدونين لكل شريف

مش عايزين تعديل دستور ..
يوم الاثنين فيه استفتاء على تعديل 34 مادة في الدستور المصري دستور بلدنا اللي بيقول البلد تمشي إزاي وبيحدد حق وواجب كل واحد فينا, التعديلات دي الحزب الوطني عملها بمعرفته .. تعديلات تفصيل على مقاس جمال بيه , عشان محدش يتكلم أو يعترض أو يطالب بحقه أو يرفع راسه , مش كدة وبس كلنا هنكون مهددين في الشارع وفي شغلنا وبيوتنا وأكل عيشنا .
تعديل المادة 179 بيدي الحق لأي أمين شرطة إنه يدخل بيتك ويفتشك ويراقبك ويراقب تيلفونك ويسجلك صوت وصورة ويحبسك وكل ده بمزاجه من غير إذن نيابة ولا دياولو وبعدين يوديك محكمة عسكرية لأنك إرهابي ؛ يعني مفيش حصانة لمحامي ولا صحفي ولا قاضي ؛ يعني مفيش عدل ولا صحافة ولا قانون , وكله بالدستور يا بيه !
أما بقى تعديل المادة 88 فده بيلغي الإشراف القضائي على الانتخابات ويسيبها للداخلية وبتوع " نعم نعم يا مبارك " يطلعوا النتيجة اللي هما عايزينها . التعديلات كمان هتمنع أي مستقل يترشح للرئاسة يعني انكتب علينا وعلى ولادنا رئيس من الحزب إياه لحد ما نموت , ورئيس الجمهورية بقى من حقه يحل مجلس الشعب من غيرحتى ما يستفتي الناس ؛ يعني احنا ننتخب مجلس شعب هو ييجي يحله من دماغة ويطلعلنا لسانه .
يعني من الآخر البلد هتبقى عزبة مبارك وولده , واحنا عبيد وأنفار عندهم مالناش حقوق وكتّر خير ناظر العزبة إنه سايبنا قاعدين .
احنا بقالنا كتير بنتكلم عن الحرية والديمقراطية وحقوق الإنسان والشفافية وتداول السلطة والنهب والفساد والقطارات والعبارات والسرطان والعنوسة والبطالة والفقر والجهل والمرض و عندنا استعداد نفضل نتكلم ونحاول تاني وتالت , بس التعديلات دي هتحرمنا حتى من أبسط حقوقنا كبني آدميين وهو حق الكلام والتعبير, الموضوع مش المعارضة والناس بتوع السياسة بس , الموضوع هيضرنا كلنا , أي حد هيفتح بقه دلوقتي ممكن يبقى إرهابي مفيش حرمة ليه ولا لبيته وعرضه وحريته وكرامته , من حقنا نكون زي كل شعوب الدنيا اللي واخدة حقها والحكام بيشتغلوا موظفين عندها , من حق ولادنا يعيشوا في مصر أحسن من اللي احنا عشنا فيها , كل واحد فينا هيجيله يوم يسأل نفسه أو ولاده هيسألوه كان فين يوم ما البلد اتباعت وبقت تكية لمبارك والعصابة اللي معاه ؟!
دي آخر فرصة نتكلم واحنا لسة بني آدمين نرفض الاستعباد والذل اللي عايزينا نعيش فيه , يمكن تكون دي آخر مرة نقدر ننزل الشارع فيها نعبر عن رأينا ما هو بعد كدة اللي هيتكلم هيبقى إرهابي .
يوم الأحد 25\3 الساعة 6 هنكون كلنا في ميدان التحرير , كل الأحزاب والتيارات والاتجاهات , رجالة وستات , ولاد وبنات , هنبات ليلة في الشارع نقول كلمتنا ونوصل صوتنا ونبقى عملنا جزء من اللي علينا قدام نفسنا وولادنا وقدام ربنا , مهما يعملوا هننزل الشارع ومش هنخاف ومش حنسيب بلدنا عشان احنا أصحابها .

شباب بيحلم ببكرة
منقول عن كفاية

Wednesday, March 21, 2007

خواطر الساعة السادسة صباحا...4

السلام عليكم
بالأمس كان عيد الأم, يارب بارك لى فى امى وأرزقها الصحة والعافية
طبعا لو قعدت أكتب من النهاردة إلى ماشاء الله عن كل صغيرة وكبيرة فيما فعلته أمى من أجلى ومن اجل أخوتى ومن اجل كل المحيطين بنا فلن أوفيها حقها
موقف واحد بسيط جدا كيف هي وفية لأهلها وكل من لهم علاقة بأمها اللى هيا جدتى إلى الآن:
جدتى لأمى توفيت منذ 5 سنوات رحمها الله وكانت لها 3 أخوات كلهن توفين فى حياتها ماعدا واحدة كانت بمثابة أبنتها وفى عمر أبنها الاكبر
وكانت جدتى الوحيدة التى تزوجت من مصر فكانت تحرص بإستمرار على زيارة أخواتها وأولادهم فى المواسم والأعياد وفى أفراحهم وأتراحهم, وكان بيتها مفتوح حتى وفاتها لهم, منذ وفاة جدتى إلى اليوم لاتزال أمى حريصة على هذه العادة وأصبح بيتنا هو مقصد أهالينا كلما نزلوا للقاهرة, ومش قادر أوصف ليكم سعادتى وانا ماشى مع أمى وبنلف على بيوت أهالينا ونمشى فى الحوارى والأزقة مع رائحة البيوت والناس ونقعد معاهم على الحصيرة فى الأرض فى زيارة خاطفة غالبا لا تتعدى 3 ساعات بس بتخلى الواحد فى سلام مع نفسه لأنه شاف ملح الأرض هؤلاء هم ملح الأرض من دونهم لا أرض , وكلهم بيسلموا عليها ويقولولها يابنت الغالية وربنا يخليكى وكلام حلو يشعرنى بالفخر الشديد والإمتنان لأمى
شكرا لأمى على كل شىء
ده كان عن امى فيه بأه أم كل زائر لمدونتى الصغيرة, أبعث أيضا بباقة ورد وإمتنان لكل مابذلوه هؤلاء الأمهات لكى نكون فى هذا العالم, كفاية بجد طلقة واحدة من طلقات الولادة شوفت ده فى بنت عمى وبنت عمتى وهما بيولودوا وأد أيه كانوا تعبانين لدرجة أنى كنت عاوز أضرب ازواجهم مما سببوه لهم من آلام, ولما خلصوا ولادة كانت الكلمة الشهيرة كله يهون فى سبيل كلمة ماما وممارسة عاطفة الأمومة...طبعا مش حاسس بموضوع العاطفة ده زييهم بس سبحان الله يستحملوا ده كله من أجلنا نحن الأبناء
نيجى لأمنا كلنا مصر, مصر يأم ولادك أهم ..راح يفدوكى بالروح والدم
مصر امى وامكم يوم إغتيالها يوم 26 هو فعليا مش إغتيالها هيا , لكن إغتيالنا احنا.
مصر باقية ونحن الراحلون , مصر آبية مصر لم تعقم عن ولادة أبناء يستطيعوا الدفاع عنها على الرغم من كل محاولات الإخصاء التى تتم
من قبل الأنظمة التى تعاقبت على مصر لكى يكون هناك فرعون واحد
مصر ستنفض يوما ما مابها من اوساخ, ستبتلع أرضها ما عليها من قاذورات, هل ستشاركزن فى هذا اليوم أم تتركوه لأجيال قادمة ؟
آخر حاجة ميعاد السفر خلاص قرب جدا جدا , فى اى لحظة احددها اكون مسافر إن شاء الله, طبعا مش قادر أوصف ليكم حالتى بس زى مااتعودت دايما الرجال هم الذين يصنعون المواقف وليس العكس
قولوا معايا ...مصر هيا امى نيلها هوا دمى.... مصر مصر
سلام
يعنى أنا اللى هاتحكم فى شأنى مش العكسوبالتالى ساتعاطى مع السفر بمنطقى أنا

سلبية لأ..إيجابية آه

السلام عليكم
باكتب البلوج ده وأنا بتقطع على حال مصر العزيزة وحالنا فى المستقبل بس ده اللى حصل
مافيش غير حاجة أخيرة لازم نعملها و وبيها نكون عملنا اللى علينا
لو سمحت شىء لن يكلفنا أى شىء بتاتا وهو معرفة ماتنص عليه التعديلات الدستورية وده هتلاقوه بالتفصيل كما جاء بخطاب الرئيس على البلوج بتاعى
تانى حاجة لو أقنعت بالتعديلات أنزل يوم الإستفتاء وقول نعم ولو مش أقتنعت قول لأ فى الصندوق, لأنى لو منزلتش هاتديهم الفرصة يزوروا صوتك, كل نواليد مابعد 82 لهم الحق فى التصويت بالبطاقة العادية
ماقبل ذلك لابد من بطاقة إنتخابية , بس مش مهم اللى مش معاه بطاقة يشجع أخته أو أخوه زميلته أقاربه على النزول
تالت حاجة ودى مخصوص للى ممكن يضحى بشوية من وقته أنه يراقب اللجنة من بره ويرصد اى تجاوزات تحدث من إعطاء فلوس لبلطجية لأى حاجة تانية يشوفها غلط ويبلغنى شخصيا أو يبلغ وسائل الإعلام وهنعمل ملف كبير بالمخالفات وده مايسمى بالمراقبة الشعبية
آخر حاجة دى مصر لى ولكم و لمستقبل أولادنا مش لحد تانى صدقونى نصحى ونفوق ونطالب بحقنا الشرعى بطريقة مهذبة
كفاية والإخوان يعلنوا المقاطعة , انا باقول لأ لازم نشارك كفانا سلبية
دولت كلمات لأغنيتين حلوين قوى
ياقبضتى

يا قبضتي دقي على الجدار
لحد ليلنا ما يتولد له نهار
يا قبضتي
دقي على الحجرلحد ما تصحي جميع البشر
مش فاهم اللي حاصل
لكن بقلبي واصل
واللي مش فاهمه عقلي
بتشرحه السلاسل
يا قلوب بتنزف دم في العتمة
يا قلوب بتنزف دم وتغني
سجنوكي
والكلمة غصبن عنهاوعني
طلعت من القضبان
وم الاسوار
الله معانا عينه علينا
الله معانا هو راعينا
طول الأيام دايما حامينا
دعوت يكون هناك معانا
زى السماء كذلك هناك
نبنى بلدنا وهو فيها
أبواب جحيم ماتوعى علينا
نحفر آبار طماها الشيطان
نعلن سلطانا فى بكرة كمان
السماء لينا والأرض لينا
ميراثنا فيها زى ماقال
الله معانا عينه علينا
الله معانا هو راعينا
طول الأيام دايما حامينا
سلام مؤقت



Tuesday, March 20, 2007

ياالله ياالله ياالله ياالله ياالله... أغثنا

السلام عليكم
طبعا فات الثلاث أيام حدادا على مايحدث من مذبحة للدستور
طبعا ولا حاجة أتغيرت غير أنى التعديلات مرت زى اى حاجة فى مصر موافقة موافقة بس المرة دى الفاصلة أتغيرت لنقطة
يارب يارب فعلت مابوسعى , يارب لم أستطيع تغيير شىء , يارب تعلم حالى وتعلم مافعلته, وما بذلته من أجل هذا الوطن
يارب اجعل هذا فى ميزان حسناتى, يارب أنت القوى عليهم كلهم, يارب أنت تعلم من الفاسد ومن المصلح , يارب تعلم من يريد خير هذه البلد ومن يعمل لمصلحته الشخصية
يارب كنت وسأظل أتوجه إليك وأدعوك يارب تحركت وفعلت مافعلت إبتغاء وجهك الكريم
ولا أجد إلا حسبى الله ونعم الوكيل
حسبى الله ونعم الوكيل
لا اجد إلا الصلاة والدعاء لكى تنقشع هذه الغمة
صلوا وأدعوا من اجل مصر

Sunday, March 18, 2007

المدونة فى حالة حداد إعتراضا على مايحدث الآن داخل مجلس الشعب تصويت ومناقشات على التعديلات الدستورية
هذه وقفة لوجه الله, ستسألنا الأجيال القادمة ماذا فعلنا لبلادنا
يوم الثلاثاء الساعة 3 امام مجلس الشعب
نقلا عن دونة نديم

خير الجهاد في سبيل الله كلمه حق في وجه حاكم ظالم يسقط يسقط حسني مبارك

Saturday, March 17, 2007

قراءة فى المشهد السياسى لمصر 2007...لسيد يوسف


قراءة فى المشهد السياسى لمصر 2007
قراءة فى المشهد السياسى لمصر 2007
سيد يوسف
تمهيد
لا يهدف هذا الموضوع لرسم صورة شديدة القتامة حين يصف واقعا كئيبا ساهمت فى صنعه عوامل عدة أبرزها الطغيان السياسى، وترسخ مفهوم التشبع بالنقد ومن ثم الإحباط لدى بعض الفئات نتيجة العجز عن الخروج من هذا الواقع، فضلا عن عوامل أخر.
كما لا يهدف إلى مجرد توصيف ورصد لواقع مؤلم لا سيما فى أبرز ملامحه من حيث تبيان فعالية العلاقات البينشخصية بين أفراده سواء على مستوى التعامل بين الأفراد بعضهم بعضا أو على مستوى التعامل بين السلطة والناس أو حتى على مستوى التعامل على مستوى الإنسان داخل نفسه (صورة نفسية )، ولو أسهبنا فى وصف ذلك فإننا سوف نرسم صورة شديدة القتامة لا نبتغيها لكن ما نهدف إليه هو تبيان قولة حق نرجو بها تقديم المعذرة إلى ربنا لعل الظالمين يرجعون فهى بمثابة جرس إنذار وتنبيه لعل وعسى....كما تهدف إلى تقديم مادة تصلح للتنبؤ بما يحتمل أن يؤول إليه الحال الداخلى فى ظل هذى المعطيات.
ملامح وأحداث
(1)
صورة موجزة لواقع سياسى مؤسف
لا نتجاوز الواقع حين نقول إن الرئيس مبارك لم يعد يشعر به أحد من الناس فى بلادى وكأنه شبح يظهر كل حين على الساحة خشية القيل والقال، وقد أدرك كثير من الفاقهين أن ملف الداخل وكل إلى النجل، وملف الخارج وكل للمخابرات، مع ملاحظة غياب دور وزارة الخارجية وإحالة ذلك الدور إلى رئيس جهاز المخابرات حتى بات منصب وزير الخارجية وكأنه شاغر... ومع انتقال دائرة اتخاذ القرارات الإستراتيجية والقومية من الرئاسة والجهات السيادية إلى لجنة فرعية بالحزب الوطنى تسمى لجنة السياسات فلنا أن نتنبأ بتعديلات دستورية يمكن وصفها بالمسخرة ( 34 مادة دستورية يطالها التعديل تم انتقاؤها فى مطبخ لجنة السياسات).
هذا وفى الوقت الذى تم فيه تجميد تام لمؤسساتنا التى كانت فاعلة كالجيش والقضاء وأجهزة الرقابة الإدارية فضلا عن التعليم سواء الجامعي أو ما قبل الجامعى كل ذلك لصالح المؤسسة الأمنية (الشرطة) شهدت البلاد أحداثا مؤسفة لم تشهدها مصر من قبل كالتحرش الجنسى فى عرض الشارع من قبل أجهزة الأمن، وتفشى ظاهرة البلطجة وانتشار العنف فى قطاعات كثيرة لم تكن موجودة هكذا من قبل.
كما طفح السطح ببروز مجموعة رجال الأعمال بصورة متوحشة وانتقالهم بالزواج التقليدى من السياسة من المصانع إلى مراكز اتخاذ القرار، وعلاقات شديدة الانتماء بالمصالح الغربية...والحق إنه ليس زواجا بالسياسة بقدر ما هو زواج بنجل الرئيس تحديدا حيث –ووفقا لذلك – فقد تمت شبشبة ( نحت من كلمة شباب) مراكز الإعلام والصحف المسماة بالقومية وبعض الوزراء والمحافظين وجلهم من المحسوبين على لجنة السياسات التى يتولى شئونها شاب هو نجل الرئيس مبارك.
ويشعر النظام الحاكم بأنه ملفوظ ومكروه، وكراهية الناس فى بلادى لنجله أشد ففيها استمرار للظلم والطغيان ومن ثم لجأ النظام لتنظيم سرى يدعى لجنة السياسات ليتدبر أمر التوريث عبر تنازلات خارجية ورشاوى داخلية وتعديلات دستورية مشوهة قدر ما يستطيع لا سيما وأن هناك إجماعا شعبيا رافضا لمبدأ التوريث، وإجماعا شعبيا أيضا فى كراهية الوالد والولد، وقد عزز هذا حراك سياسى بسيط لا يطمئن إليه النظام الحاكم رغم قمعه.
(2)
النظام يصنع لنفسه عدوا
ليس للإخوان المسلمين دية عند الغرب، وفى الداخل هناك من يؤيد استئصالهم حقدا أو حسدا أو غباء أو جهلا ولربما جمع ذلك كله معا...ومن ثم ماذا لو صنع النظام لنفسه عدوا يشغل به حديث الناس عن الإصلاح ويعود من خلال إقصائهم إلى تجميد الحراك السياسى الذى بدأت تشهده البلاد بقوة، ويضمن ألا يؤاخذه الغرب عليه ولا يؤاخذه بعض الداخل؟!
وقد كان، فقد أوقد النظام حربا لا هوادة فيها مع الإخوان، وقد حذر الفاقهون أن هذه الحرب لا تخص الإخوان لأنهم ذو نزعة إسلامية فقط بقدر ما أن النظام عدو لكل صوت ينادى بالإصلاح ويعرى ذلك النظام لا سيما إذا كان على قوة فى التنظيم ورجاحة فى العقل.
والحق إن النظام الحاكم بالغ جدا فى فزاعة الإخوان المسلمين، حتى ارتد مكره السىء إليه كشأن الأغبياء دوما.
قد يكون الهدف من الاعتقال والمصادرة وتشويه السمعة والنيل من الإخوان طلابا ورموزا وأفرادا بالإعلام والمحاكمات العسكرية وبإهمال أحكام القضاء المدنى، وبعودة حكم البوليس السياسى تحت مسمى أمن الدولة قد يكون الهدف منه توصيل رسالة يدركها المصرى بحسه الشعبى (اضرب المربوط يخاف السايب) وفى هذا إشارة للأحزاب والضعفاء، وقد يكون الهدف من ذلك زيادة الإحباط العام وتوصيل رسالة للشعب المصرى بأنه لا أمل لكم فى مقاومة التوريث، وفى هذا الصدد أشير إلى ما يتناقله بعض الناس فى بلادى...حدثنى بعضهم منفعلا: إذا أراد مبارك توريث الحكم فليورث لقد زهقت أنفسنا، فليورث، لقد باع البلد قطعة قطعة ونهبها، فليورث، ولكن ليُْبقِ على ما تبقى ولم يُنْهَبْ بعد.
ولنا أن نتساءل هل تكمن مشكلة النظام مع الأخوان تحديدا أم مع كل صوت حر شريف ينادى بمحاربة الفساد تلك البيئة التى لم يعد يطيق النظام الحاكم العيش إلا فيها ؟!
الحق إن مشكلة النظام تكمن فى عقليته التى لا تجعله يحسن رؤية الواقع الداخلى ومن ثم فهو يحارب أى صوت ينادى بالإصلاح ولو أصلح هو لكان خيرا له فالإصلاح أرخص من الفساد وتبعاته وسلوا عن أيمن نور، وطلعت السادات، والمستشارين مكى والبسطاويسى لم يحاربهم النظام وهو ليسوا إخوانا ؟!
(3)
ابتزاز الغرب وأطماعه المعلنة
ولقد أدرك الغرب ضعف النظام ولهاثه حول التوريث حتى بات يوجه له صفعات الإهانة كل حين، وفى اتفاق مكة الأخير بين فتح وحماس دون رعاية مصرية صفعة واضحة الملامح لمن يعقلون.
ومن المعلوم أنه فى حال ضعف البلاد فإن القوى المجاورة يزاد طمعها وتتوحش قوتها لا سيما
توحش وتربص القوى الإقليمية والدولية والتى لها مطامع معلنة ومكتوبة تجاه مصر عبرت عنها نية القوم بالهجوم على مصر عام 2015 ، كما عبرت عنها ما تناقلته استخبارات الغرب من قبل من كون مصر هى الجائزة الكبرى، ونذكر بما ذكرته مجلة كيفونيم الإسرائيلية الناطقة بلسان المنظمة اليهودية العالمية من دراسة اعتبرتها الأوساط الإسرائيلية بمثابة "ورقة عمل للحكومات المتعاقبة" وضحت أطماع القوم فى مصر ورغبتها فى ذلك بل محاصرة مصر حيث أدرك الخارج أنه لا يمكن الوصول إلى القلب قبل تفتيت الأطراف وهذا يفسر لنا محاولة تطويق مصر من خلال الكيان الصهيونى شرقا، ووادى النيل جنوبا(بدأ الأمر حين فصلت السودان كلية عن مصر كمطلب بريطانى للجلاء عن مصر ثم الآن محاولات فصل الجنوب عن الشمال فضلا عن دارفور وما يمثله السودان عموما من حائط استرتيجى لمصر ولكن يبدو أن كل ذلك يهون من أجل تلاقى المصالح حيث للغرب البترول السودانى واليورانيوم السودانى وللكيان الصهيونى ماء النيل وحيث للداخل التوريث ) فضلا عن التغير الملحوظ فى البنية الجسمية والصحية(سرطانات وأمراض ) للعامة فى بلادى تحول دون المقاومة لاحقا.
نقول : الغرب يبتز النظام المنبطح غاية الابتزاز من أجل تحقيق مطامعه المعلنة مستغلا كراهية الناس فى بلادى للحاكم ونجله من أجل تفتيت مصر داخليا، ونهبها معتمدا على ازدياد كراهية الناس فى بلادى للنظام لعلها –واهما- تهيئ له فرص التدخل المباشر مستقبلا.
ومن ناحية أخرى فإن النظام مستعد لفعل أى شيء من أجل ضمان استمرار التوريث حفاظا على ما تم نهبه من ثروات مصر، وخشية من العقاب والمحاكمة له...ومن ثم فهو يسارع فى تقديم فروض الطاعة العمياء للغرب متجاوزا مصالح البلاد والأمثلة التى تؤيد كلامنا تترى نذكر منها : التخلى عن دور مصر الإقليمي مع الاكتفاء بدور السمسرة لأمريكا، ومنها اتفاقيات تضر بمصلحة مصر مثل اتفاقية الكويز مع الكيان الصهيونى، ومنها اتفاقية تصدير الغاز الطبيعى للكيان الصهيونى، ومنها محاصرة حماس داخل فلسطين، ومنها انخفاض عدد الجيش المصرى بصورة متزايدة لحساب الشرطة، ومنها التفريط فى مثلث أم الرشراش، ومنها المشاركة اللوجيستية غير المعلنة في الحرب الأمريكية على العراق .......الخ
خاتمة وملاحظات
غياب الحاكم وطموح الابن، وابتزاز الغرب وتنازل النظام، وتنازع النخب المصرية وضعفها، هذى بعض مفردات الواقع المؤسف الذى أخر البلاد وجمدها ...وأول ملامح التغيير اتفاق النخب، وإيقاظ وعى الناس، ومنع التوريث ولكن الذى يطلب العلا دون تضحية وتعب واهم وخاسر لا محالة.

شوية أخبار بتوع كل يوم 3

السلام عليكم
إنسان مش حر مجتمع مش حر بلد مش ماذا تعنى العيشة إذن؟
مافيش حاجة بتقول سبنا ناكل عيش مغموس بالذل والمهانة مافيش حاجة تقول كده, الحرية أسمى مايطمح له أى إنسان إذا كنت حرا ستمارس عبادتك بحرية ستمارس حياتك بحرية ستمارس حبك بحرية ستفكر بحرية ستأكل بحرية ستتنفس حرية... حرية حرية حرية
شوية أخبار كده على خفيف
الوجبة المفضلة للرئيس: سلطة و«سي فود بلاتر».. ثم فيليه وسوتيه مع مكرونة والحلو فاكهة أو «شوكو موز».. ويحب الضاني والموزة والبامية والعكاوي , أستحلفكم اللى عارف السى فود بلاتر ده أيه يقولى وكمان الشوكو موز ده أيه ولما تقروا المقالة هتلاقوا بامية بالصوص الأبيض أنا اعرف بامية بالقوطة بس
شوفتوا بأه أنتو ليه كده مافيكومش حكيم ولا حد ينفع يبقى رئيس علشان مش بتاكلوا فسفور كل يوم فاسفوروا تبقوا رؤساء وتنوروا كده وتبقوا ملعلعين, نصيحة لكل أب كل فول وبصل وآكل أبنك سى فود بلاتر يبقى هو الرئيس القادم وبعد كده يعوضك
عارفين صفقة سيدى عبد الرحمن: اللى رئيس الجمهورية أستقبل الشركة اللى هتنفذها, ماعلينا الشركة دى كانت بين أرتوك مصر( شفيق جبر عضو المجلس الرئاسى المصر ى الأمريكى اللى يرأسه جمال مبارك) وبين إعمار الإمارات (العبار) المهم جبر كان شريك بمبلغ حوالى 100 مليون جنيه بنسبة 61 فى الميه لما الصفقة تمت إعمار حبت تبقى مالكة لكل الشركة قامت عملت مفاوضات مع جبر وأديتلوى مليون 900 علشان يسيب حصته, ربنا يباركلهم المهم فين حصة الضرائب بتاعتنا( قصدى الدولة يعنى) على الصفقة حصتنا 200 مليون جنيه طبعا مافيش لأن القانون بتاع الضرائب مش بيقول نص فى العمليه دى...حرونارفى ..اللى بيسرقنا
يعنى جبر كسب 800 مليون جنيه فى 3 شهور بس ياترى مين شريكه...سؤال برىء جدا جد؟ حد عنده إجابه
الحزب الوطنى يحجز غرف فندقية فى أحد الفنادف بالقرب من مجلس الشعب لأعضائه من الأقاليم لكى يستطيعوا حضور جلسات البرلمان
حول التعديلات
آخر حاجة بقى بطولة مزعومة من الإخوان على قفاية لأ ...مش موافق طبعا وده وضحته فى بلوج سابق...ممكن يكون اللى أتقبض عليه أو اللى يقصدوه شاب من الشباب اللى أخد منى بوكيه من البوكيهات علشان يوزعه على الظباط والعساكر بس أنا مش إخوان ..ياريت دى تبقى واضحة

أنا مصرى...أنا مش إخوان

السلام عليكم
على موقع الإخوان الرسمى وعلى جريدة المصرى اليوم عدد السبت 3-17 أنى أحد شباب الإخوان كان بيوزع ورد على الظباط
أنا صاحب فكرة الورد وانا اللى كنت باوزع بس الحاجة المهمة جدا انى مش من الإخوان خالص انا مصرى وبس غير منتمى لأى حزب سياسى لأنى من الآخر مافيش حزب عدل فى مصر
كمان انا باحترم الإخوان بس معترض معاهم فكريا ومعترض معاهم فى كيفية التنفيذ على الأرض
علشان كده باقول أنا مواطن مصرى يطمح للحرية ويتمنى ان يرى مصر مستقرة ولا للتمديد ولا للتوريث
وكمان يعنى من ليبرالى لإخوان أزاى يعنى , ولا اللى أتكتب ده علشان الإخوان يأكدوا أنهم كانوا مشتركين وبس؟

Friday, March 16, 2007

التعديلات المقترحة من الرئيس

السلام عليكم
علشان يبقى عملت اللى عليا وماتجنتش على حد, ديه التعديلات اللى طلبها الرئيس شوفوها وقولوا رأيكم
هتاخد منكم قراءة 10 دقائق ياريت تشوفوها ولو موافقين أنزلوا يوم 20 فى الإستفتاء وقولوا موافقين ولو مش موافقين قولوا لأ
أحكوا التعديلات دى لأهليكم ولكل واحد تقابلوه, عاوزين نوعى الناس ماشى مش عاوزينهم يبقوا قطيع
سأكتب تفصيلا فى بلوج قادم إعتراضى على التعديلات وماأسبابها
وفيما يلي أعرض ـ تفصيلا ـ المواد التي تضمنها طلب التعديل وبعض المبادئ الأساسية التي رآها السيد رئيس الجمهورية كفيلة بتحقيق غايات ومقاصد التعديل، كما ورد في طلب التعديل
أولاً: المواد: 1 و 4 و12 الفقرة الأولي و24 و30 و33 و37 و56 الفقرة الثانية و59 و73 و180 الفقرة الأولي:تتمثل أسباب طلب تعديل هذه المواد في تحقيق التلاؤم بين نصوصها والأوضاع الاقتصادية والسياسية المعاصرة، بحيث لا يفرض الدستور علي الممجتمع نظاماً اقتصاديًا معينًا لا يتأتي العدول عنه إلا بتعديل في نصوصه، وتجنبًا لما تنص عليه هذه المواد من عبارات قد تفيد في ظاهرها الانتماء لنظلام اقتصادي بذاته يمكن أن يتجاوزه الزمن بما يفرزه من تطورات ومستجدات. وفي هذا السياق تدعو الحاجة إلي طلب إلغاء المادة ،59 وإعادة صياغة المادة (1) بما يؤكد علي مبدأ المواطنة بديلاً عن تحالف قوي الشعب العاملة. ولما كان الحق في البيئة الصالحة والالتزام بحمايتها واجبًا عامًا، فقد رأي السيد الرئيس أن يتضمن الدستور نصًا يؤكد حماية البيئة والحفاظ عليها. ونظرًا لأن المادة 59 المقترح إلغاؤها تقع في الباب الثالث من الدستور المعني بالحريات والحقوق والواجبات العامة، رأي سيادته أن يحل النص المقترح محلها.
ثانيًا: إضافة فقرة ثالثة للمادة (5):يستهدف طلب إضافة هذه الفقرة تأكيد بعض الثوابت التي تحكم الشخصية المصرية وويتمسك بها الشعب، وذلك بعدم التفرقة بين المواطنين بسبب الدين أو الجنس أو الأصل، وهو ما احتفي به الدستور في المادة 40. ومن ثم فقط طلب سيادته اضافة فقرة ثالثة إلي تلك المادة بهدف حظر مباشرة أي نشاط سياسي أو حزبي أو قيام الأحزاب علي أساس الدين أو الجنس أو الاصل، فلا يصح في دولة يتيه تاريخها بوحدتها الوطنية، وتفخر علي مر العصور بتماسك شعبها وصلابة بنيانها، أن تتوزع مصالحها ومناهج العمل السياسي والوطني فيها إلا علي اساس المواطنة وحدها دون تفرقة بسبب الدين أو الجنس أو الأصل.
ثالثًا: المادتان 62 و94:تتباين نظم الانتخاب المعمول بها في دول العالم، وتأخذ كل دولة بالنظام الذي يتفق مع ظروفها السياسية وأوضاع هيئة الناخبين فيها، وتستجيب لما يطرأ علي هذه الظروف والأوضاع من تحولات تقتضي تعديلاً علي نظامها الانتخابي، وهو ما لا يملكه القانون المنظم للانتخابات، إلا إذا كانت نصوص الدستور تسمح بذلك. ولهذا، ورغبة في أن يتيح الدستور للمشرع القدرة علي اختيار النظام الانتخابي الذي يكفل تمثيلاً أو في للأحزاب السياسية في مجلسي الشعب والشوري، ويسمح للمرأة بمشاركة فاعلة في الحياة السياسية، ويمكنها من عضوية هذين المجلسين، فقد رأي السيد الرئيس تعديل المادة 62 بما يحقق هذه الأهداف ويسمح للمشرع بتعديل النظام الانتخابي مستقبلاً ليتفق مع تطور المجتمع وتغير ظروفه. وذلك فضلاً عن ادخال تعديل علي المادة 94 يستجيب لتعديل المادة 62 بما يتفق مع أي نظام انتخابي يتجه المشرع إلي الأخذ به.
رابعًا: المادة 74:وضع الدستور ضمانات لاستخدام المادة 74 عند مواجهة أخطار تهدد سلامة الوطن أو تعوق مؤسسات الدولة عن أداء دورها الدستوري. إلا أن السيد الرئيس قد رأي أهمية بالغة لاضافة مزيد من الضمانات التي تحكم استخدام السلطات المقررة في هذه المادة، وذلك بأن يكون الخطر الذي يهدد الوحدة الوطنية أو سلامة الوطن أو يعوق مؤسسات الدولة عن أداء دورها الدستوري خطرًا جسيمًا وحالاً، وأن تتخذ الاجراءات السريعة لمواجهة الخطر بعد التشاور مع رئيس مجلس الوزراء ورئيسي مجلسي الشعب والشوري، وألا يحل مجلس الشعب أثناء ممارسة رئيس الجمهورية للسلطات التي تخولها له هذه المادة، وذلك تقديرًا لخطورة الموقف الذي يقتضي تطبيق أحكامها ويوجب التشاور عند مواجهته.
خامسًا: المادة 76 الفقرتان الثالثة والرابعة:لقد كان الهدف من تعديل المادة 76 من الدستور العام الماضي، تفعيل حياتنا السياسية وتعزيز التعددية والعمل الحزبي، توصلاً إلي أحزاب سياسية قوية وقادرة علي اثراء التجربة الديمقراطية. وانطلاقًا من ذات الرؤية، وتدعيمًا لتحقيق ذات الهدف، فقد طلب السيد الرئيس تعديلاً للفقرتين الثالثة والرابعة من هذه المادة، يرعي الواقع الراهن لهذه الأحزاب، ويستشرف ما ستكون عليه أحزابنا السياسية في المستقبل باعتبارها عماد الحياة السياسية ومحركها. ورأي ذلك يتطلب التيسير علي الأحزاب السياسية بالنسبة إلي الشروط الدائمة للترشيح لرئاسة الجمهورية، علي نحو يضمن جديته ولا يحول في ذات الوقت دون اعطاء الفرصة المناسبة للأحزاب للترشيح. ولما كانت الأحزاب السياسية لا تزد في حاجة لفسحة من الوقت حتي تستوعب الشروط الدائمة للترشيح في الانتخابات الرئاسية، رأي أن يسمح للأحزاب السياسية ـ خلال هذه الفترة الزمنية وحدها ـ بالترشيح لهذه الانتخابات بشروط أيسر.
سادسا: إضافة فقرة ثانية للمادة 78:تستهدف اضافة هذه الفقرة حسم التباين في وجهات النظر حول بدء مدة ولاية رئيس الجمهورية بعد اعلان انتخابه وذلك لتجنب التداخل الذي تفرق النصوص الحالية بين مدة الرئاسة والمدة التي تليها.
سابعًا: المواد 82 و84 الفقرة الأولي و85 الفقرة الثانية:تحدد المواد 82 و84 الفقرة الأولي و85 الفقرة الثانية من يحل محل رئيس الجمهورية عند قيام مانع مؤقت أو دائم أو عند اتهامه، وقد لا يتيسر هذه الحلول من الناحية العملية في بعض الأحيان لسبب أو لآخر. لذلك طالب السيد الرئيس بتعديل هذه المواد بما يسمح بحلول رئيس مجلس الوزراء عند تعذر حلول نائب رئيس الجمهورية في تلك الحالات، دون أن يباشر من يحل محل الرئيس السلطات بالغة الأثر في الحياة السياسية، كإقالة الحكومة وحل مجلس الشعب وطلب تعديل الدستور. فهذه السلطات يجدر عدم استخدامها خلال الفترة العرضية التي تنظمها هذه المواد.
ثامنًا: المادة 88:إن نزاهة الانتخابات وكفاءة اجراءاتها أمر نحرص عليه جميعًا، ونعمل علي وضع الضمانات التي تكفل حسن التعبير عن الإرادة السياسية للشعب في اختيار نوابه، وتمكن أكبر عدد من الناخبين من الادلاء بأصواتهم، وتوفق بين جميع الاعتبارات التي تحكم العملية الانتخابية، وتوفر اشرافًا محايدًا ومستقلاً عليها. ومن هذا المنطلق كان طلب إدخال تعديل علي هذه المادة، يسمح بمواجهة التزايد المضطرد لأعداد الناخبين وما يفرضه من زيادة مماثلة في أعداد لجان الاقتراع والفرز، مع توفير أسلوب الاشراف الذي يحقق كفاءة ونزاهة العملية الانتخابية، والنطاق الذي يتيح لاعضاء من الهيئات القضائية الاشراف علي هذه العملية، ويضمن اجراء الانتخابات في يوم واحد، تجنبا لامتداد فترة الاقتراع لأيام طويلة وما ترتبه من آثار في المجتمع في ضوء تجارب الماضي.
تاسعًا: المادتان 115 و118 الفقرة الأولي:تحظر المادة 115 علي مجلس الشعب أن يعدل في مشروع الموازنة العامة إلا بموافقة الحكومة. وأخذًا بمنهج تعزيز دور البرلمان بالنسبة للموازنة العامة للدولة، وتوفير السلطات التي تسمح له بدون فاعل عند مناقشتها وإقرارها، فقد رأي السيد الرئيس ادخال تعديل علي تلك المادة يسمح لمجلس الشعب بأن يعدل في مشروع الموازنة العامة، علي أن يتضمن تعديل المادة الضمانات والتدابير التي تكفل الحفاظ علي الاطار العام للتوازن بين تقديرات الايرادات والنفقات. ورغبة في إتاحة مساحة أوسع من الوقت لمجلس الشعب لمناقشة الميزانية، فإن تعديل المادة 115 يتطلب أيضًا زيادة المدة التي تتاح للمجلس لكي ينتهي من نظر الموازنة قبل بداية السنة المالية، والتي حددتها هذه المادة حاليًا بشهرين. وبذات المعني والاتجاه طلب سيادته تعديل الفقرة الأولي من المادة ،118 لتقليل المدة بين نهاية السنة المالية وعرض الحساب الختامي لميزانية الدولة علي مجلس الشعب لمناقشته والتصويت عليه، حيث إن هذه المادة تسمح حاليًا بتقديمه خلال سنة من تاريخ انتهاء السنة المالية وهي مدة طويلة تؤخر رقابة البرلمان علي كيفية تنفيذ الحكومة للميزانية.
عاشرًا: المواد 127 و133 و136 فقرة أولي و194 و195:استكمالاً لتحقيق ما سبق أن توجه إليه السيد الرئيس في برنامجه الانتخابي، من تعزيز لسلطة البرلمان وتفعيل لدوره التشريعي والرقابي،طالب سيادته بتعديل المواد 127 و133 و136 فقرة أولي و194 و195.ويهدف تعديل المادة ،127 إلي التخفيف من اجراءات تقرير مسئولية رئيس مجلس الوزراء، بحيث يكون لمجلس الشعب دور أكبر في سحب الثقة من الحكومة دون حاجة للجوء الي الاستفتاء. وهو ما يترتب عليه أن صدور قرار من مجلس الشعب بسحب الثقة من الحكومة يؤدي الي ان تقدم الحكومة استقالتها، ويكون قبول هذه الاستقالة وإعادة طرح الثقة بالوزارة في ذات دورة الانعقاد وفق ضمانات يتحقق بها التوازن بين السلطتين التشريعية والتنفيذية. أما تعديل المادة 133 فيهدف إلي تعزيز دور مجلس الشعب لتحول الحكومة التي إختارها رئيس الجمهورية ثقة المجلس، وذلك بأن يقدم رئيس مجلس الوزراء خلال فترة قصيرة من تاريخ تشكيل الحكومة برنامج وزارته الي مجلس الشعب الذي له حق قبوله أو رفضه، علي أن تحدد هذه الأحكام الدستورية التي تترتب علي رفض المجلس لبرنامج الحكومة. ولا يحول هذا التعديل دون استخدام رئيس مجلس الوزراء أو الوزراء أو غيرهم من رجال الحكومة لحقهم في إلقاء بيان أمام مجلس الشعب أو إحدي لجانه عن موضوع داخل في اختصاصهم يناقشه المجلس ويبدي ملاحظات بشأنه. ويهدف تعديل الفقرة الأولي من المادة 136 إلي أن يكون حل مجلس الشعب بقرار من رئيس الجمهورية، دون حاجة إلي استفتاء الشعب، وهو ما يتفق مع طريقة حل مجلس الشوري، ومع ما طالب به سيادته من عدم اللجوء الي الاستفتاء الشعبي عند سحب الثقة من رئيس مجلس الوزراء. ورغبة في إعلاء دور الارادة الشعبية في اختيار نوابها، رأي السيد الرئيس أنه إذا تم حل المجلس لسبب ما لا يجوز حله مرة أخري لذات السبب. أما طلب تعديل المادتين 194 و،195 فيهدف الي منح مجلس الشوري اختصاصًا تشريعيا، إذ حددت هاتان المادتان اختصاصه بإبداء الرأي غير الملزم في بعض المسائل ذات الطابع التشريعي. إلا أن التطبيق العملي كشف عن أهمية دور مجلس الشوري في مجال التشريع، مما يدعو إلي ترسيخ هذا الدور. وانطلاقًا من ذلك كان طلب تعديل هاتين المادتين، لاعطاء مجلس الشوري حق الموافقة علي بعض الموضوعات الواردة في اختصاصاته المنصوص عليها حاليا، وأن يبقي رأي المجلس استشاريا بالنسبة لباقي الاختصاصات، مع تحديد القوانين المكملة للدستور تحديدًا حصريا، ووضع أسلوب يتسم بسهولة التطبيق لحل ما يمكن أن ينشأ من خلاف بين مجلس الشعب ومجلس الشوري حول أي من الموضوعات التي يصبح مختصًا بالموافقة عليها.
حادي عشر: إضافة فقرة ثانية للمادة ،138 والمادة 141:تحقيقًا لما أورده السيد الرئيس في برنامجه الانتخابي من رغبة في تقوية دور مجلس الوزراء بما يعزز سلطاته، فقد طالب باضافة فقرة ثانية إلي المادة ،138 بهدف التوسع في اختصاصاته المقررة للحكومة، إلي جوار ما هو مقرر أصلاً في الفقرة الأولي من هذه المادة من الاشتراك مع رئيس الجمهورية في وضع السياسة العامة للدولة والاشراف علي تنفيذها، ولما طالب به سيادته من ضرورة استشارة رئيس مجلس الوزراء عند اللجوء إلي المادة ،84. بحيث يمارس رئيس الجمهورية اختصاصاته المنصوص عليها في المواد 108 و144 و145 و146 و147 و148 و151 الفقرة الثانية، بعد موافقة مجلس الوزراء في بعضها وبعد أخذ رأي المجلس في البعض الآخر. ولتحقيق ذات الأهداف كان طلب تعديل المادة 141 لكي يشترك رئيس مجلس الوزراء بالرأي في تعيين نواب رئيس مجلس الوزراء والوزراء ونوابهم واعفائهم من مناصبهم.
ثاني عشر: إضافة فقرة ثانية للمادة 161:تستهدف هذه الاضافة تطوير نظر الادارة المحلية وتعزيز صلاحياته التنفيذية، بما يؤدي الي التطبيق السلبي للنظام اللامركزي، واعطاء المحليات الدور الحقيقي في ادارة شئونها.
ثالث عشر: المادة 173 والفصل السادس المادة 179:حرصًا علي تعزيز استقلال السلطة القضائية، كان طلب تعديل المادة 73 بما يؤكد دستوريًا علي استقلال كل هيئة من الهيئات القضائية بمباشرة شئونها علي أن يشكل مجلس يضم رؤساء الهيئات القضائية ويرأسه رئيس الجمهورية ليرعي الشئون المشتركة للهيئات القضائية والتي تتطلب التنسيق فيما بينها، وذلك بديلاً عن المجلس الأعلي المنصوص عليه في المادة 73 وتحقيقًا لذات الاتجاه فقد طلب السيد الرئيس إلغاء الفصل السادس والمادة 179 التي تضمنها هذا الفصل، ليلغي بذلك نظام المدعي العام الاشتراكي وما يستتبعه من إلغاء محكمة القيم، علي أن تنتقل الاختصاصات التي كانت موكولة إليهما إلي جاهات القضاء، وذلك بعد أن أدي هذا النظام دوره في حماية الاقتصاد الوطني في فترة كانت تستدعي وجوده.
رابع عشر: إضافة نص ينظم حماية الدولة من الإرهاب:إن اقامة نظام قانوني يختص بمكافحة الارهاب وتجفيف منابعه، ليكون بديلاً تشريعيًا لمكافحة هذا الخطر دون حاجة لتطبيق قانون الطوارئ، يتطلب حماية دستورية تستظل بها الاجراءات التي يتطلبها ذلك النظام، وهو ما يقوم سببًا لكي يتضمن الدستور بين مواده ما يسمح للمشرع بفرض اجراءات خاصة بمكافحة الارهاب علي نحو يسترشد بما استقرت عليه دول العالم في قوانين أفردتها لذلك. ولذلك طالب السيد الرئيس بوضع عنوان بديل للفصل السادس وباحلال نص جديد بدلاً من نص المادة 179 التي اقترح الغاؤها، يسمح للمشرع بفرض الاحكام الكفيلة بحماية المجتمع من الارهاب، وبحيث لا تحول الأحكام الواردة في المواد 41 الفقرة الأولي و44 و45 الفقرة الثانية، دون قدرة اجراءات مكافحة الارهاب علي التصدي لأخطاره وآثاره الجسيمة، مع التأكيد علي أن يكفل القانون تحديد رقابة قضائية علي تلك الاجراءات، وذلك بما يضمن التصدي بحزم لخطر الارهاب ويدفع أي عدوان أو مساس غير مبرر بحقوق الانسان، مع إتاحة سبيل لسرعة الفصل في قضايا الارهاب.
خامس عشر: المادة 205:توضح هذه المادة ما يسري علي مجلس الشوري من الأحكام الواردة في مواد الدستور. وفي ضوء التعديلات المقترحة، كان طلب تعديل هذه المادة بما يتفق مع تلك التعديلات، وذلك باضافة المادتين 62 و88 الفقرة الثانية إليها.

أتجمعوا العشاق فى مجمع الجلاء والامن يمنع دخول المحامين

السلام عليكم
ده رد على منع دخول المحامين لحضور التحقيقات مع شرفاء هذا الوطن الموجودين الىن فى مجمع المحاكم بالجلاء



اتجمعوا العشاق اتجمعوا العشاق في سجن القلعة
... اتجمعوا العشاق في باب الخلق و الشمس غنوة من الزنازن طالعة
.. و مصر غنوة مفرعة في الحلق تجمعوا العشاق بالزنزانة
.... مهما يطول السجن مهما القهر مهما يزيد الفجر بالسجانة
.. مين اللي يقدر ساعة يحبس مصر
............... تجمعوا و العشق نار في الدم
..... نار تحرق الجوع و الدموع و الهم نار تشتعل لما القدم ينضم
.... لما الايادي تفور في لم اللحم و اللحم متنتور في رملة سينا
.... و الكدب بيحجز على أيادينا قدم العدو غارسة في لحم ترابي
... و الكدب عشش مخبرين على بابي و المخبرين خارجين كلاب سعرانة
... بيجمعوا العشاق في الزنزانة
............... مصر النهار يطلقنا في الميادين
.. مصر البكا
.. مصر الغنا و الطين مصر الشموس الهالة من الزنزانين
.. هالة و طارحة بدمنا بسا تين مصر الجناين طرحة مين يقطفها
.. مصر الجناين للي يرفع سيفها مهما يطول السجن مهما القهر
.. مهما يزيد الفجر بالسجانة مين اللي يقدر ساعة يحبس مصر

فى النهاية حسبى الله ونعم الوكيل

Thursday, March 15, 2007

أحداث الأمس

السلام عليكم
مش عارف أقول أيه او ايه اللى حصل امبارح ده كان مهزلة بكل المقاييس, إهانة لى وإهانة لكم ولكل مواطن شريف,أنا لم أتألم جسديا علشان ببساطة م أضربت بس لأول مرة أتألم نفسيا جدا جدا جدا
هأقولكم القصة فى لقطات:
اولا أرتديت بدلة كاملة إحتفالا بهذه المناسبة لدرجة انى زملائى لما شافونى قالولى رايح فرح النهاردة قولتلهم أيوه رايح فرح مصر
ثانيا كنت مشبع بكل أحلام الطفل الصغير اللى بيتعلق بماما قبل ماتسافر وبيحازل يخليها تقعد لكن فى حد يجبرها تمشى , ده كان شعورى أنا رايح لمصر أقف جنبها علشان أمنع المغتصبين أنهم يعتدوا عليها فى صورة التعديلات
ثالثا روحت محل الورد فى طلعت حرب صليت العصر وطلبت منه ورد , قالى عاوز كام ورده قولتلوا 50 الراجل أتخض قالى انت شغال فى شركة سياحة قولتله لأ, أنا مصرى جايب الورد ده علشان اشكر الظباط والعساكر على الشهيد محمد المتاتنى والمجند محمد خلف اللى رفض يقف أمام سفارة إسرائيل, وقولهم هو ده النموذج اللى عاوزينه لظابط الشرطة, بتاع الورد بيسألنى انت من أنهى حزب قولتله انا مصرى والله العظيم مش تبع اى حزب انا مع كل واحد عاوز يصلح
رابعا أخدت الورد ولأول مرة فى حياتى أجيب ورد , تخيلوا واحد ماشى بحوالى 60 وردة الوان مختلفة فى 5 بوكيهات ولابس زى رسمى كامل, كنت ماشى حاسس الناس بتقول مين الأهبل اللى جايب الورد ده كله
خامسا وأنا رايح أقعد على القهوة لاقيت الدكتور القزاز قبل المظاهرة بنصف ساعة والامن بتحرش بيه لغاية لما عرفت أنهم قبضوا عليه, روحت قعدت النصف ساعة دى على القهوة جاءت الساعة 5 قمت من القهوة, وانا خارج الامن رفض يعدى باقى الناس من المرور من طلعت حرب بس عدونى انا قالوا ده فرفور عبيط بتاع ورد وبنات
سادسا عديت منهم قابلت محمد الأشقر واتنين من كفاية شافوا الورد أتفاجئوا وقالولى أيه ده شرحتلهم الموقف ..قالولى مش هيفهموا وقد كان
سابعا الامن من مرتدى الزى المدنى حاوطنى انا وعيد وفتحى واحمد والأشقر بس الأشقر عرف يفلت بدأوا يتحرشوا بنا, خدونا لممر مسدود قدام مناقيش اللى فى طلعت حرب وأحتجزونا فى عمارة
, ثامنا فى هذه الاثناء الامن تعامل معى بهدوء شويه أفتكرونى عضو نيابة وتم إحتجازنا فى العمارة, طبعا بحب أشكر زملائىاللى كانوا أول من أبلغتهم بإحتجازى لإعلام أهلى ولكى يتابعونى ...متأسف أنى فزعتهم وشكرا لوقوفهم بجانبى
تاسعا طلعنا لغاية الدور الأخير للعمارة وقعدنا حوالى 8 ادوار فتحى رفض يطلع معانا فتم القبض عليه, الامن طلع يدور علينا من صربعته طلع 3 ادوار ونزل قال للظابط مافيش حد
عاشرا قعدنا حوالى ساعة انا وعيد وأحمد وبعدين السكان بدأوا ينزلوا نزلنا وراهم بس شكلنا كان زى الحرامية, وخدناها فى حوالى 100 خطوة طلعنا منها على مقر حزب التجمع
أحد عشر طلعت جبان وندل وسبتهم ومشيت وروحت
أثنى عشر أتجرحت نفسيا وتعبان قوى من الموقف بتاع الامن وكمان موقفى الشخصى انى هربت
ثالث عشر عرفت بعد كده انى أتقبض على اللى كانوا معايا بعد كده ماعدا عيد
رابع عشر قابلت ظابط فى الجامع برتبة لواء وملازم سلمت على الملازم وقولتله باشكرك علىى اللى قدمتوه وده النموذج اللى عاوزينه فى الظباط مش عاوزين النماذج السيئة وبلغ كلامى ده لكل زملائك بس فيه ملاحظة انا كنت باشكركم لكن أتهنت وأتهزقت فى ميدان التحرير
خامس عشر قابلت زملاء ليا الساعة 8 مساءا كنت تعبان جدا سمعوا منى ألفاظ لأول مرة فى حياتى أقولها وكانت سهرة نكد مش خروجة للترويح بعد عناء أسبوع, وقالولى أنت النهاردة فيك حاجة غلط أو ده بسبب السفر..متأسف جدا ليهم
أخيرا على موقع الإخوان كتابين أنى فيه حد من الإخوان كان بيوزع ورد على الظباط وتم إعتقاله...أولا باحترم الإخوان جدا على تنظيمهم بس أنا مختلف معاهم فكريا وفى طريقة التعامل...علشان كده انا مصرى مش إخوان او أى تجمع او حزب آخر..لكنى ضد التوريث ومع الإصلاح
ثانيا ممكن يكون يقصدوا حد من الشباب اللى خد منى البوكيهات علشان يوزعها على الظباط وربنا يفك حبس كل المحبوسين
يارب النية الصادقة
اللهم إنى استعيذ بك من كل عمل قصدت به وجهك وخالطنى فيه غيرك