Wednesday, August 22, 2007

اتقوا الله

السلام عليكم
باكتب البوست ده وانا شاعر بشعور غريب قوى
انا كنت قرأت الخبر على مدونة سكوت من فترة وعلقت عليه قولت النهاردة ازور مدونة ياسمين واشوفها كاتبه ايه لاقيتها كاتبة نفس الخبر اللى عند سكوت اللى هو خبر وفاة شيماء
قولت اشوف مدونة شيناء دخلتها ولأول مرة تصفحتها حست بشعور غريب قوى حسيت من آخر بوستات ليها  هل هيا كانت عارفة انهى هاتموت؟ كمان وقفنى ده عند حقيقة الا وهى الموت..كنت لسه قاعد باكتب خطتى وحلمى للسنة اللى جاية مش عارف الخبر ده عمل فيا ايه يمكن خلانى أهدى شوية وبلاش آخلى الدنيا تلهينى
 
اللى قطعنى اكتر تعليق أخو شيماء على التعليقات على آخر بوست عندها وكيف انها قالتله بلغ خبر وفاتى للناس؟ ياالله يالله يالله...بجد حاسس بشعور غريب..ربنا يرحمها رحمة واسعة ....قولت اخرج من الممودد واقرى اى حاجة لقيت خبر عن سرور وعبد الأحد ومشكلتهم مع المستشار الخضيرى ...حسيت من كلام سرور وعبد الأحد بالنفاق والكذب والخداع
قولت ياريت لو يقروا خبر وفاة انسانة احسبها عند الله اكثر نقاءا وصفاءا منهم كيف ان الدنيا لاتساوى اى منصب ياسرور انت وعبد الأحد
..اطبعا مش محتاج استخدم القاب الدنيا فانية ياريت ياحسنى انت وجمال وعز وسرور ونظيف وكل اللى فى السلطة تعرفوا ده كويس ياريت...عاوزين ترفعوا قضية سب وقذف ارفعوا..عاوزين تقولوا الواد ده قليل الأدب قولوا الدنيا مش مستهالة....... اتقى الله ياحسنى فى شعب مصر....ياحكامنا اتقوا الله....يافتحى اتقى الله...يامحمد أتقى الله ...اتقوا الله كلكم الدنيا فانية

3 comments:

أسوور said...

فعلا لو الناس تعرف ان النفس اللى داخل ممكن ما يطلعش فى لحظة
لو الناس تفهم ان مش هيبقى من بعدهم غير الكلمة الطيبة والعمل الطيب
لو كلنا نفهم كدة
اكيد حاجات كتير هتتغير
تحياتى لك

سكوت هنصوت said...

مؤخرا يا محمد بسمع كل يوم عن وفاة مدون او مدونة

اكتشفت اني كنت فاكرة زي الأطفال ان الموت ده للناس التانيين

الي مش على المدونات..الناس الي عايشين على الأرض...

كنت فاكرة ان عالم المدونات عالم جميل...كل اهلة يا ثائرين يا رافضين يا حالمين...لكن طلعوا كمان بيتألموا و بيموتوا

موت شيماء وجعني زي ما تكون قريبتي

الله يرحمها...و يسكنها فسيح جناتة

Unknown said...

انا عايزة اقولك ان الخبر ده اثر فيا بدرجه كبيرة جدا محدش ممكن يتخيلها زيي بجدالموت قريب اوي احنا يمكن بننسي ...و يمكن كمان اللي خلاني حاسه اوي بالموضوع ده اني علطول حاسه ان حياتي عبارة عن علامات للموت يمكن بهرب عشان تعيش لكن بفشل و ارجع تاني ....اموت
كل يوم كل لحظه بتخيل لو مت دلوقتي هاقابله ازاي؟
لو سالني هعرف ارد؟
لو رديت هقول ايه؟
كل فترة الاقي يوم من اوله لاخرة مكثف علامات للموت و اليوم من هذه الايام
قد اشعر باقتراب الاجل لبعض الوقت لكن هذا لن يغير من الحقيقة شيء ان بالفعل كلما تمر لحظة هي اقتراب للاجل
عاقلة علي ارض الجنون
ياسمين