السلام عليكم
شخص عادى ولد بطريقة عادية من أب عادى وأم عادية وله أخوات عاديين وأقارب عاديين وكان له أصدقاء عاديين وتعلم تعليم عادى فى مدارس عادية ودخل جامعة عادية وتخرج بتقدير عادى وتعين بشكل عادى وتفوق كما يتفوق أى عادى فى مجاله ثم تم الإحتفال به بطريقة عادية وهو يترك عمله السابق وسافر للعمل فى الخارج كما أى إنسان عادى وتزوج زواج عادى من إمرأة عادية وأنجب أطفال عاديين علمهم بطريقة عادية وينتظر الموت بطريقة عادية كما أى حياة إنسان عادى
هل أكون أو تكون انت أو أنتى عادى بن عادى العادى؟؟؟؟؟
بالنسبة لى...أخذت جميع الأمور على انها غير عادية وإن شاء الله لن أكون عادى بن عادى العادى
أستطيع أن أقول أن أبى وأمى كانوا غير عاديين فى تربيتنا أنا وأخوتى وكمان جدى عبدالله(العادىههه) لم يكن شخص عادى(لمحة كده كان كل يوم الصبح يقعد فى حوش البيت وأمام المنزل صباحا من 9 كده لغاية الساعة 10.30 مع جيرانه من سكان الشارع يقرأوا الجرائد ويشربوا قهوة ويتكلموا فى السياسة والبلد وأحوالها هكذا رأيت جدى...وبعدما أجىء من المدرسة نتجمع عنده فى البيت انا وأخواتى وأولادعمى يتكلم معانا فى الواجب وأيه اللى ممكن نعمله قبل مانروح لبيوتنا ونتغدى ونمشى نروح...الله يرحمه علشان كده هو مش عادى
أصدقائى غير عاديين بفضل الله كل منهم له فضل على فى أنه أعطانى فرصة للتامل والتفكير, منهم من هم معى من التعليم الإبتدائى وحتى الجامعة وتخصصات علمية مختلفة ومشارب مختلفة حتى كانت الخاتمة بصديقى رحمه الله رحمة واسعة ..صديقى واخى وأستاذى عصام درويش وكنت قد كتبت عنه بوست سابق تحت عنوان رثاء
أتعلمت فى مدرسة غير عادية تكلمت عنها فى بلوج سابق تحت عنوان زيارة لمدرستى
وكمان أقاربى غير عاديين(أعمامى يبقوا أزواج خالاتى) وبالتالى عمى هو فى نفس الوقت زوج خالتى وخالتى زوجة عمى, علشان كده هما مش عاديين, لم أدخل جامعة عادية دخلت جامعة وكليه متميزة ودرست تخصص أحبه حبا شديدا على الرغم أنى مجموعى فى الثانوية العامة التى حصلت عليها دونما الحصول على أى دروس خصوصية غير اللغة الفرنسية واللغة العربية كانت بتدرسها لى خالتى , كان لى فرصة الدخول الى كلية هندسة عدا هندسة القاهرة وعين شمس ولكنى فضلات دراسة العلوم وتخصص الحشرات بالذات كمان وبالتالى كانت دراسة غير عادية
وتخرجت أيضا بطريقة غير عادية كنت من خريجى الدور الثانى يعنى كنت ساقط فى مادة وأمتحنتها فى شهر سبتمبر وبتقدير جيد وبالتالى لم يكن تخرج عادى
وقررت العمل فى مجال غير عادى بالنسبة لتخصصى وبفضل الله تفوقت فيه , وعملت فى شركة من أكبر الشركات فى هذا المجال فى مصر وأكن لها الى الآن معزة خاصة وها انا الآن بفضل الله فى شركة من شركات اكبر مجموعة إقتصادية فى العالم وبفضل الله لم أحصل على هذه الوظيفة بواسطة او بأى شىء سوى انى ارسلت سيرتى الذاتية للشركة وأتصلوا بى وذلك كله بتوفيق وفضل من الله
وإن شاء الله لن أتزوج بشكل عادى سواء فى إختيار الزوجة(دعوت الله وسأظل على يقين أن الله سيرزقنى زوجة بهذه الصفات...اللهم
أرزقنى زوجة صالحة تأخذ من صفات امهات المؤمنين تعيننى على أمر دينى ودنياى تستخدمنى وإياها لخدمة الإسلام) او إحتفال الزواج
بافكر أجيب فرقة أسكندريلا وفيروز كراوية ووجيه عزيز ) وكمان هاقول خطبة وهيا تقول خطبة ولو مش عاوزة أقول انا (هتبقى مسخرة وتختم فى امن الدولة) (كان زمان أخويا قالى فلان أتجوز فلانه قولتلوا بالسرعة دى قالى عادى قولتله فين قصص الحب الساخنة اللى بنشوفها فى الأفلام) طبعا الحب والتفاهم شرط مبدئى لبناء أسرة صالحة , بس نصيحتى لكل أب وام وشاب وشابة (حديث الرسول إذا جاءكم من ترضون دينه وخلقه فزوجوه إن لم تفعلوا تكن فتنة وفساد كبير أو كما قال..وكمان أى شاب عنده قدره على الزواج يبادر لإتخاذ هذه الخطوة لبناء أسرة صحيحة فاضلة مسلمة تكون قدوة و مفيدة للمجتمع , أولادى ان شاء الله لن يكون عاديين إن شاءالله سأربيهم كما ربانى ابى وأمى مع بعض المتغيرات الجديدة
ومن زمان عندى إحساس كده انى هاموت موته غريبة حادثة ممكن وممكن أبقى مش موجود فى البلد كمان وهيكون سنى صغير علشان كده قولت لأمى العزيزة لما أموت أدفنونى فى المكان اللى هاموت فيه هههههه كلها أرض الله إلا لو الواحد مات فى المدينة المنورة ساعتها الموضوع يفرق
المهم أن هذا كله كان لم يتحق لولا فضل الله وتوفيقه وعونه لكى يعيننى على إنتهاز هه الفرص وتحويلها لنجاح
ده مش بلوج للحكى ولكن بلوج يارب يكون فيه نفع لكم ودفعة لى على تحقيق ماهو مفيد لبلدى ولأمتى
وبفضل الله قررت ألا أكون محمد بن عادى العادى لأن أبى لم يكن عاديا وكذلك جدى لأبى وأمى(للأسف لم أرى جدى لأمى لسبب وفاته) ولكن من طريقة تربيته لأمى إذن هذا إنسان عظيم
شكرا لله أولا ثم لأبى وأمى وأقاربى فردا فردا وأساتذتى وزملائى وأصدقائى ..رحم الله الأموات منهم...وبارك الله الأحياء منهم..وأعانهم على الخير
.بحبك يامصر
