حفلة فيروز كراوية

السلام عليكم

حفلة فيروز كراوية يوم الأربعاء الساعة 8 مساءا فى ساقية الصاوى

البنت ديه أنا مش سمعتها ولا مرة علشان كل مرة الظروف مش كانت بتسمح بس المرة دى هاحضر إن شاء الله

كل الناس بتقول صوتها حلو وكلمات اغانيها حلوة جدا معبرة عن واقع حياتنا هاروح وهاشوف وياريت نشوفكم كلكم

http://www.fayrouzkarawya.com/index.php

ده اللينك بتاع الموقع الشخصى لفيروز

النضال كفعل أنانى 3

السلام عليكم

لماذا عزوف الشعب المصرى الآن عن التفاعل مع الحركات الإحتجاجية وبخاصة الحركة المصرية من أجل التغيير كفاية والإشتراكيين والليبراليين؟
ماهى توقعاتى للمستقبل فى ظل مانسمعه من أحداث حول العالم زبخاصة الأحداث الأخيرة فى مصر من التوربينى الى مجرم المعادى إلى مانلاحظه يوميا من تغييير فى تصرفات الشعب المصرى؟

من وجهة نظرى يعزٌف بعض من الشعب المصرى عن المشاركة فى بعض الحركات الإحتجاجية والفاعليات لأسباب عديده اهمها

حالة لامبالاة ويأس وإحباط

حالة من الخوف وتخيل سيناريو مابعد المشاركة

سبب وجيه ولكننى لأضع عليه كل النسبة وهو عدم ملامسة بعد الحركات الإحتجاجية للشعب البسيط بمعنى آخر بعض سلوكيات وأهداف من شاركوا فى هذه الإحتجاجات لاتلمس المواطن البسيط وذلك إما أنها تطلب بمطالب برجوازيه مثل الديموقراطية والحرية ولم تطالب برغيف العيش مثلا وأيضا سلوك بعد الأفراد من البنين والبنات يجعلهم منفصلين عن الشعب البسيط

توقعاتى للمستقبل فى ضوء مايحدث الآن أن كرة الثلج تزيد فى الحجم وتتدحرج بسرعة كبيرة بمعنى تانى إذا لم توجد قيادة يلتف حولها هذه الجموع بحب وإقتناع ستتولد الفوضى التى ستأكل الأخضر واليابس وسنرجع مرة أخرى لحالة الفردية والقهر مرة أخرى

أصحا ياشعب مصر من القادم مصر تناديكم

النضال كفعل أنانى 2

السلام عليكم

إستكمالا للبلوج السابق النضال كفعل أنانى

فيه كام سؤال واجهتهم النهاردة من أناس يحبون هذه البلد ويعشقونها كما كل مصرى أصيل ولكن أسئلتهم كانت تحتاج لإجابات شافية ...هاطرح أسئلتهم وهحاول الإجابة عليها وياريت لو تشاركونا المناقشة

هل يوجد فى مصر الآن من أى مجموعة كانت سواء حزبية أو حركات شعبية من يمتلك إستراتيجية وخطة للمستقبل وذلك ينسحب أيضا على الحزب الوطنى؟

هل الشعب المصرى بكامله يرى أنه لامناص من التغييير أم أن هناك فئات من الشعب توائمت مع الوضع ورضيت بالأمر الواقع؟

لماذا عزوف الشعب المصرى الآن عن التفاعل مع الحركات الإحتجاجية وبخاصة الحركة المصرية من أجل التغيير كفاية والإشتراكيين والليبراليين؟

ماهى توقعاتى للمستقبل فى ظل مانسمعه من أحداث حول العالم زبخاصة الأحداث الأخيرة فى مصر من التوربينى الى مجرم المعادى إلى مانلاحظه يوميا من تغييير فى تصرفات الشعب المصرى؟

فى البداية أشكر زملائى الأعزاء على إتاحة الفرصة لى لكى نتناقش سويا فى هم بلدنا العزيزة مصر

بالنسبة للسؤال الأول: لايوجد فى مصر الآن أى حركة او حزب يملك إستراتيجية للمستقبل وبخاصة الحزب الوطنى أى حركة أو تجمع غير الحزب الوطنى تم إخصائهم بالفعل أقصد هذه الكلمة كدلالة على أن الوضع البوليسى الآن فى مصر يقوم بإنتزاع كل عضو فعال فى أى حركة أو حزب يشتم منه أى نيه للعصيان على الوضع الحالى وذلك بتدبير أونبش أو البحث فى الملفات القديمة لكل هؤلاء لكى يتم حبسهم وتشويه صورتهم أمام الرأى العام وخذ على هذا أمثلة كثيرة أيمن نور ونعمان جمعة وأخيرا حيدر بغدادى , وبالتالى لا نلوم الأحزاب أو الحركات الموجودة الآن ولكن كل اللوم لابد أن ينصب على السلطة التى تحكم الآن

من الآخر كل إنسان عنده غلطات ومافيش إنسان كامل يعنى لو السلطة عندها نيه للإصلاح كانت هتساعد أى إنسان ترى فيه الخير لكى تتطور هذه البلد

والحزب الوطنى بالذات وأعضاءه يملكون فقط أجندتهم الخاصة للإستفادة من هذا النظام وتحقيق أكبر مكاسب ولايعنيهم البلد من قريب أو من بعيد لا أحب التعميم ولكن معظم أعضاء الحزب الوطنى كذلك.. والغير منتفعين تركوا الحزب وأنشقوا عنه كأمثال اسامة الغزالى حرب ...معظم أعضاء الحزب الوطنى والمنتسبين اليه منتفعين من وجوده سواء بسلطة أو مال

السؤال الثانى: بالفعل هناك من الشعب المصرى فئات رضيت بالأمر الواقع ولا ترى فائدة من التغييير هذه الفئة مكونة من مثقفين وغير مثقفين مسلمين ومسيحيين فقراء وأغنياء شيوخ وشباب

يعنى مش متصنفة على أى أساس بس الرابط المشترك بين الجميع هو الامبالاة والتشاؤوم وخبرات سابقة تعلموها بس , باحب أقول حاجة مهمة جدا اللى مش هيتحرك صدقونى هو أول واحد هينضر ....بالظبط الوضع فى بلدنا دلوقتى عامل زى الحلة التى تعمل بالضغط(البرستو لما بتبتدى تغلى بتصفر وبطلع بخار وذلك إعلان ان الحاجة خلصت.. بس لو ست البيت حبيت تفتح الغطاء قبل ما الضغط يقل السائل هيفور ويطرطش فى كل مكان وممكن يحرقها , هوده اللى بيحصل دلوقتى لو الناس ملاقتش فرصة تطلع تعبر وتغير وتشيل وتختار هتيجى مرة واحدة والحلة تفور والبلد هتتحرق والحرق هيطول الكل باقول الكل بجد مش هيبقى فيه فرق, بس الى كان بيتحرك هيعرف يتصرف شوية واللى ماتعلمش يتحرك هو هيبقى أكتر واحد خسران

السؤال لتالت والرابع هجاوب عليهم بكرة إن شاء الله

من الحياة

السلام عليكم

اللهم لك الحمد ولك الشكر كما ينبغى لجلال وجهك وعظيم سلطانك, الحمد لله على ماأنا فيه

شوفت موقفين الأسبوع الماضى حاجة تحزن وتخلى الإنسان يبكى والنهارده أكتملت الصورة بقصة فى بريد الأهرام

الموقف الأول: موقف عبد المنعم رياض - التحرير أنتظر قدوم عربة علشان أركب وأروح الساعة 8 مساءا

الموقف مزدحم, عربيه ميكروباص جاءت والناس بتنزل وفى ناس عاوزة تركب وطبعا السواق بيتمشى بالعربية شوية زى مايكون بيركب الناس وينزلهم على الطاير

زوج وزوجة وأبن عمره حوالى 5 سنين وطفل محمول على يد الأم وأمرأة كبيرة فى السن حوالى 75 الى 80 سنة شكلها كده أم الأبن يعنى حماة الزوجة

المشهد الأبن يشتم امه والله العظيم بشتمها بصوت عالى والست مش بتتكلم وتايهة, الزوجة خدتها من أيدها وطبطبت عليها وبعيون وبلسان ضعيف بتقول لزوجها خلاص هدى نفسك

الموقف هزنى جدا يعنى حتى لو مش أمك ولو حماتك أو حتى ست من الشارع ماتشتمهاش كده وكمان زوجة مسكينة طيبة تعطف عليها وتستجدى زوجها لكى يسكت, كنت عاوز أديلوا قلم بفوقوا حرام حرام ..ممكن تكون الست مريضة بأمراض الشيخوخة وظروف الحياة وغلاء الأسعار والحكومة وكل حاجة زفت بس برده مش توصل انك تشتمها أو تزعق ليها

الموقف التانى: خارج من البيت الصبح رايح الشغل بس رايح متأخر لاقيت واحد شاب فى سنى كده بيزعق وبيشتم وبيقول والكلام على لسانه..... قولوا لو ماستناش هامشى ...قول لأبن.......هامشى خليه يستنى

عقبال ماطلعت على أول الشارع لاقيت اللى بيكلمه ده طفل صغير وواحد راكب جنبه على العربية الكارو وشكله راجل كبير فى السن جدا

برده حتى لو ماكنش أبوه وكان اللى بيشغله أو اللى شغال معاه برده مايشتمش حرام حرام

الموقف التالت: ده بقى ماشوفتوش بس قرأته أنى واحد قعد يجمع فلوس ويعمل صفقات وفلوس وكده فانشغل عن أبوه وأمه لغاية لما ماتوا

لما كبر فى السن جاءته الأمراض بدأ أولاده وزوجته يتركونه ويهملوه, أخذوا الأموال وطلق زوجته وانفض الجميع من حوله

يطلب اليوم أن يقوم احد بزيارته ورعايته وأولاده وزوجته على قيد الحياة شوفوا بقى

كما تدين تدان...يعنى اللى هتعملوا هيتعمل فيك ولو بعد مدة علشان كده راعوا ربنا فى أبائكم وأمهاتكم وأولادكم وزوجاتكم وشيوخكم وكل إنسان ضعيف سواء كنت تعرفه أو ماتعرفوش

آخر حاجة يارب بارك لى فى أبى وأمى وأرزقهم الصحة والعمر والعمل الحسن ويارب سامحنى إذا كنت زعلتهم أو عملت معاهم موقف أتنرفذوا منى فيه

سامحنى يابابا سامحينى ياماما ويارب أى حد ظلمته سواء بكلمة أو فعل يسامحنى

يارب أغفر لى ولوالدىٌ ولأصحاب الحقوق علىٌ ولمن لهم فضل علىٌ

يارب أرحم عصام رحمة واسعة

فى حب مصر

السلام عليكم

مصر هيا أمى نيلها هو دمى شمسها فى سمارى شكلها فى ملامحى وإن كان لونى قمحى لون نيلك يامصر

ماتلاقيش مثالها ست كل عصر عشة جنب نيلها تسوى ألف قصر مصر مصر

الكلام ده بجد حسيته قوى قوى بعد موقف ما ....حدث لى

كنت قرفان جدا وزهقان ظروف حياة وشغل وعيشة وحاجات كتير فكنت واقف مع مجموعة من زملائى فى إستراحة شوية كدة من الشغل فقولتلهم مصر بلدنا حلوة وقعدت أقول كلمتين فى مصر

فجأة لاقيت واحدة زميلتنا قالتلى مصر أيه أف... أيه القرف ده ....ياريتنى ماكنت مصرية ياعم كل حاجة زفت ناس مش فاهمة وبلد مش نضيفة وحرامية كتيييييييير وفساد وبلاوى

من قرفى ... وافقتها شوية..... بس لما قعدت وهديت شوية لاقتنى باقول لأ مصر مصر مصر...... الكلام ده اخد حوالى نصف ساعة بس

مصر(مودة, صبر, رحمة) مصر تناديكم ياجماعة....فيه مشكلة كبيرة فى موضوع بنوك الدم مشكلة جامدة قوى

والمصيبة أنى الدم ده مش بيستورد يعنى لو ماتبرعناش يبقى مش هنلاقىوماينفعش نستورده.... وكمان الدم ده بينقذ ناس هتموت

أيه رأيكم لو كل واحد فى بيته وفى شغله شجع الناس وحفز أقاربه وزملائه على التبرع ...بجد تبقى خطوة إيجابية جدا جدا

يالا بينا كلنا كل واحد ينظم حملة فى مكان عمله ويتصل بالبنك الدم المركزى ويطلب منهم عربية تبرع ودكاترة وينظموا حملة فى حب مصر

يالا بينا قوم يامصرى مصر دايما بتناديك خد بنصرى نصرى ده دين واجب عليك

يالانقوم كلنا نتبرع فى حب مصر

الخميس الساعة 4 عصرا أمام نقابة الصحفيين

وقفة احتجاجية ينظمها نشطاء ومدونون مصريون في عيد الشرطة المصرية وذكرى شهداء الشرطة الذين خاضوا معركة مشرفة في الإسماعيلية و سقطوا برصاص الاحتلال الانجليزي ؛ للاحتجاج على ممارسات القمع والانتهاك التي يمارسها أفراد الشرطة اليوم , والمطالبة بوقف التعذيب في المعتقلات وأقسام الشرطة ومقار أمن الدولة ومحاسبة الضباط المتورطين في انتهاك كرامة المواطنين المصريين . يوم العسكري الأسود

ياحبيبتى

يا حبيبتى

كم اتمنى أن أراك مرات

وتتكحل عينى برؤياكى

وتلمس يدى يداكى

ونخطو مع بعضنا للمستقبل

لنصنع بلدا أفضل

وننشر خلقا وعلما

ونعطى نموذجا للحياه

مفاده أن الحب والإخلاص

قادر على صنع المعجزات

نعم أنا وأنتى

لست وحدى قادر على هذا

ولست وحدك أيضا تفعلى هذا

إنها سنة الحياة

زوجين

من كل شىء زوجين

لذلك لا تضيعى الوقت

يا حبيبتى

العمر يجرى بنا

وآمالنا كبيرة وعظيمة

والحياة سريعة وخبيثة

موجود اليوم راحل الغد

ها أنا أناشدك

أستحلفك

أخبرينى

ياحبيبتى

تحركى فى كل ميدان

وقولى وتحدثى

ولا تخافى

فالخوف جبن

والصمت عيب

يا حبيبتى

أمى وأمك تنادينا

بلادى وبلادك تنادينا

هل من مجيب

أنفضوا الأوساخ عنى

ساعدونى

ياولادى

كم عانيت من أجلكم

لحمى يباع ويشترى

عرضى من عرضكم

لحمى من لحمكم

متى تفيقون؟

أبعد ساعة أم يوم أم غدا

أم لا مجيب

وستظلون ساكنين

خاضعين

مذلولين

تحركوا

يكفيكم الحركة

ياولادى

حرام عليكم أترضوا هذا لأمهاتكم

لبناتكم

لأخواتكم

يا أذلاء هذا العصر

على الرغم مما تحققونه

من وهم

بأنكم وأنكم.....وأنكم

أنتم فشلة

لأنكم أذلاء

ويكفيكم نظرة

لأبائكم وتاريخكم

أقرأوه

أفهموه

أنا مصر الأبيه

مقبرة الغزاة

لم أذل من ذى قبل

مثل اليوم

أنا اليوم على كل مائده

أنا اليوم على كل سرير

أنا اليوم فى الشوارع

أغيثونى

الحل فى أيديكم

الحل ليس فى الحبل

ولا الحل فى شعارات فضفاضة

الحل فى عمل وإخلاص

الحل فيكم

محمد وجون

عائشة ومريم

أصتفوا

أصرخوا

قولوا لا للفساد

لا للإستبداد

لا للظالمين

لا للخائنين

بهذا تنقذونى

تلملموا لحمى

تحفظوا عرضى

يا حبيبتى

هل نستجيب؟

هل نستجيب؟

نداء أمى وامك

نداء مصر

الله يرحمك ياعصام رحمة واسعة....مفتقدك كتيييييييييير قوى....دى سنة الحياة ....إلى لقاء فى الجنة إن شاء الله

تمنتاشر يناير

دى قصيدة كتبها الشاعر أحمد فؤاد نجم وهو فى المعتقل بعد أحداث 18 يناير 1977...ياريت تستمتعوا بيها

كتبها لحبيبته عزة بلبع ...إن شاء الله هيبقى ليا تعليق عليه لاحقا

كل ما تهل البشاير

من يناير كل عام

يدخل النور الزنازن

يطرد الخوف والظلام

يا نسيم السجن ميل

ع الشجر وارمي السلام

زهر النوار

وعشش فى الزنازين .. الحمام

من سكون السجن صوتي

نبض قلبي

من تابوتي بيقولولك

يا حبيبتي

كلمتيمن بطن حوتي

سلمى لي ع الحبايب

يا حبيبتي

سلمى لي

كل حب

وله نصيبه من سلامي

بلغي لي

احضنى العالم عشاني

بين عيونك

وابعتى لي نظره

منها اشوف حبايبي

واشفي قلبي

واساليلي

كل عالم فى بلدنا

كل برج وكل مادنة

كل صاحب من صحابنا

كل عيل من ولادنا

حد فيهم شاف علامه

من علامات القيامه

قبل ما تهل البشاير

ليوم تمنتاشر يناير

لما قامت مصر

قومه

بعد ما ظنوها نومه

تلعن الجوع والمذله

والمظالم والحكومه ؟

سلمى لي ع الولاد السمر

خضر العمر

فى عموم الحواري

سلمي لي ع البنات المخطوبين

فى المهد

لسرير الجواري

واساليلي

بالعتاب

كل قاري فى الكتاب

حد فيهم كان يصدق

بعد جهل

بعد موت

ان حس الشعب يسبق

اي صوت

هى دي مصر العظيمه

ياحبيبتي

هى مصر اللي فضلتى ف هواها

عشناعلى الف قصر

هى دي يا عزة

مصر

إنتفاضة الخبز2

السلام عليكم

ده أول بوست أكتبه بعد وفاة أخويا عصام ومش هيتكلم عنه وده فى نفس اليوم الذى عرفت بوفاته الله يرحمه رحمة واسعة

البوست سيكون عن إنطباعاتى عن مظاهرة السيدة زينب فى البداية زى ماأكيد كلك قرأتوا الأمن كان كتييير جدا جدا جدا بس الحمد لله أتعملت وأعتقد أنها نجحت

حاكيلكم عن 3 لمحات بس

الأولى وأحنا واقفين وبنهتف عن غلاء الأسعار بدأالناس البسيطة تنضم لينا وكل واحد يحكى قصته ومشكلته اللى مش عارف يأكل عياله واللى مش عارف يعالج بنته والموت بيقرب منها, فيه منهم كانوا بسطاء قوى قوى ومنهم تحسبهم أغنياء من التعفف كما ذكر القرءان بس كان عنده مشاكل وحكاها .

أنا كنت خايف من المنطقة الشعبية وممكن أيه اللى يحصل والأمن بس لاقيت أنى اللى أختار المكان أختار المكان المناسب علشان نلمس الناس الغلبانه ديه ونكلمهم عن مشكلتهم مش قاعدين فى برج عاجى نتكلم عن الحرية والديموقراطية ودولت مش لاقيين ياكله

ثانيا وأحنا واقفين ظهرت بنت من أطفال الشوارع بتاع 18 سنة كده وشها بشل طبعا لبسها رث ومبهدل لأقصى درجة صوتها طبعا لايعبر عن أى أنوثة أخدنى التفكير للحظة أزاى دى عايشة ولو كانت أختى أو قريبتى أو زميلتى مكانها كنت هبقى عامل أيه . حمدت ربنا على النعمة اللى أنا فيها وكمان أقتنعت بوقفتى جدا لأنى كانت علشان الناس ديه

بس اللى كان هيخلينى هانفجر واحد من فريق العاشرة مساءا بيقول لزميلته المذيعة بصى دى شكلها ماستحمتش من 10 سنين وكمان بيقولها بضحكة تهكمية كنت بصراحة نفسى أضربه وأقوله أصحى وفوق دى ممكن كانت أختك أو أختى أو حتى زميلتك اللى معاك بس الظروف والقدر والمجتمع

ثالثا كان فيه حوالى 5 شباب فى العشرينيات واقفين يتكلموا ويهزروا ومعاهم موبايل وبيصوروا شكيت فيهم وكل الناس اللى متعودين نشوف بعض شكينا فيهم حاولنا نعزلهم وفى الآخر طلع الظن فى محله كانوا بلطجية, الأمن مأجرهم علشان لو كنا قررنا الخروج بمسيرة يعملوا مشكلة وخناقة كبيرة فساعتها الأمن يتدخل لحفظ النظام بس ربنا ستر

الحمد لله نجحت وان شاء الله ربنا يكرمنا ويجعل أعمالنا خالصة لوجهه الكريم وفى يوم من الأيام ستعيش مصر فى رخاء ونماء وسيحاسب كل ظالم أو كل فاسد عما أقترفه من آثام فى حق هذا الشعب

الله يرحمك ياعصام ويرحمنا كلنا

شكر

السلام عليكم

أسمحوا لى أن اشكر كل من واسانى فى وفاة أخى وصديقى عصام (رحمه الله رحمة واسعة) ولأراكم الله مكروها فى عزيز لديكم

رثاء 2

السلام عليكم

أكتب هذا البلوج وأنا جالس فى قسم علم الحشرات أكتبه ومن خلفى مكتب أستاذى وصديقى الدكتور عصام, لا أعنى بخلفى انى قد نسيت أستاذى وأخى بل بسبب وضعية الكومبيوتر

بس أنا خايف قوى وخايف جدا أنى فى يوم من الأيام يتحول أخويا عصام لمجرد ذكرى عابرة, الناس مختلفة هنا حاسس أنى بدأت أشوف القسم بعيون تانية , يعنى ممكن تقولوا نظرا لوجوده السابق دائما, وانا جاى كنت بابص للقسم نظرة إعجاب وفخر وماكنتش بلاحظ عيوب الناس, لكن دلوقتى بقيت متحفز أشوفهم واراقبهم مافيش حاجة تشدنى للقسم, وأنا جاى دايما كنت هلاقى عنده حاجة جميلة هلاقى معلومة هلاقى نصيحة هلاقى أصدقاء,

أكيد فى أساتذة تانيين أثروا فى شخصيتى لكن ليس بمنطق الصديق والأخ كما عصام

عصام درويش .... الله يرحمك حاسس أنى قصرت معاك كتيييييير كنت دائما أنت بتسمعلى وتفكر معايا ليا , عمرى ماسمعتلك ولا سمعت مشاكلك ولا فكرت معاك فى حاجة ليك....مش عارف ليه ممكن كنت خائف على علاقتى بك لو قولت رأى يزعلك وممكن ماكنتش مصدق أنى أحنا أصدقاء وأخوات مش عارف بس أناقصرت معاك كتييير قوى

سامحنى ياعصام ياصديقى ربنا يرحمك رحمة واسعة, هافتكرك وأنت آخر مرة بتكلمنى على شغلى وكمان لأول مرة بعد فترة كبيرة كنت بتأكد أنى لازم أتجوز وأعمل اسرة كنت مخلص فى نصيحتك,,,ياصديقى والله كنت باستخير ربنا أكلمك ولا لأ , وأحكيلك عن الإنسانة اللى عاوز أتقدم ليها وكان رأيك أكيد هايفيدنى .... وللأسف لم يسعفنى القدر ,,,ربنا يرحمك

إن شاء الله هاخد بنصيحتك وهاركز فى الشغل وهاتفوق وكمان هابنى أسرة وربنا يرزقنى أبن وأسميه عصام ...ربنا يرحمك يارب

مش هنساك وهافضل فاكرك وهتفضل فى بالى وربنا يعيننى على رد الجميل لك

فاكر لما كنت باقولك وباقول لزملائنا أنى أنا متفائل وأنى هيحصل حاجة فى بلدنا خير وكنت كل مايحصل حاجة تسألنى انت متفائل أزاى؟برده باقولك انا متفائل...عارف ليه ابسط مثال أنى كان فيه واحد فى مصرزيك وأكيد فيه كتيير مثلك, آثروا فى ناس كتييير وسيظل تأثيرهم

يرحمك الله ياأخى

ربنا يرحمك

رثاء

السلام عليكم

والله يصعب على أن أتكلم فى زمن الماضى عن صديقى وأخى الكبير ومعلمى وأستاذى ومرشدى إذا أحتجت الى نصيحة ومعونة على التفكير أستاذى الدكتور عصام درويش- أستاذى فى علم الحشرات وصديقى لما يقرب من الستة أعوام كان بالنسبة لى خير المعين والرفيق
توفاه الله أمس (اللهم أرحمه رحمة واسعة وتقبله عندك وأدخلة الفردوس الأعلى وأورده حوض نبيك محمد صلى الله وعليه وسلم فى الجنة) أثر حادث أليم
هذ الرجل كم كانت له من الأفضال على كل من درس لهم ترك فى كل فرد منا أثرا سنتذكره ماحيينا, كان نعم المعلم ونعم الصديق
كانت بداية معرفتى به مع عودته من ألمانيا وهو زوجته الأخت والصديقة الدكتورة عاليه وكانوا لنا بمثابة القدوة والمثل فى تفتح الذهن واليقظة وحمل هموم هذا الوطن, كل منا كان يجد عنده ضالته إذا أحتجت أنا رأيا فى السياسة ومشورة كان معينا لى وإذا أحتاج صديقا آخر مشورة فى ترجمة ما أو معلومة فى علم ما كنت تجدها عنده
يكفى أن أقول لكم أنه كان مشاركا لزملائى ممن تزوجوا فى أفراحهم , وكان يسأل دائما عن عملى وكيف هو الحال وكان شديد الإخلاص فى النصيحة
كان يرحمه الله عالم موسوعى له قرآته فى أفرع عديدة, فى السنتين الآخريتين كنت على صلة وثيقة به, وكان آخرها يوم السبت الماضى جلسنا نتحدث أنا ومجموعة من طلبته معه ونتكلم فى شتى الموضوعات وكان الغالب عليها وضع البلد وحالها وماهو المستقبل وأنتهينا فى المساء على وعد بترتيب رحلة لواحة سيوة العزيزة وبالفعل بدأ هو بالترتيب لإيجاد وسيلة المواصلات ولكنها لم تتم ولله الأمر من قبل ومن بعد
ترك لنا علم نافع ان شاء الله فى مجال الحشرات وترك فى كل واحد منا نحن طلابه أو من تعامل معه أثرا لن ينمحى من ذاكرتنا ولن نسساه أبدا ماحيينا
ترك زهرتان هما ندى وسلمى(يارب بارك فيهما وأجعلهما ذرية صالحة وأجعلهما خير خلف لخير سلف وأعن زوجته وأرزقهم الصبر والرضا) لن ننساك ياأستاذى العزيز وسنظل نتذكرك فى كل مناسبة بكل خير
أدعو له بالرحمة والمغفره وتذكروا معى أستاذ ومعلم وصديق وأخ وصاحب أظن لن أجد مثله فى المستقبل
يرحمك الله ياأستاذى ويعيننى الله على أن أرد بعض من أفضالك علىً وذلك بمساعدة الناس ومساعدة بلادى كما عودتنى
والى لقاء ان شاء الله فى الجنة ان شاء الله

خواطر

السلام عليكم

طبعا النهاردة بعد لقاء سيادة الرئيس أمس كانت حياتى متلخبطة وقمت الصبح بقى بافكر بقى أنى أبطل أستخدم أتوبيس 11 وكمان المترو والميكروباص وأشترى عربية وأبقى من أصحاب العربيات وكنت بافكر عربية كبيرة ولا صغيرة 4 راكب ولا 7 ولا 11 راكب سيدان ولا هاتشباك ولا أستيشين ولا دبل كابينة 4*4 كل حاجة من اللى فاتوا ليها ميزة وعيب طبعا أنا فى غنى عن أنى أوضحه.

بس لما وصلت الشغل وبعدين أنشغلت شوية كده ونسيت بقى التفكير فى الموضوع ده, قولت أقرأالجرايد على الإنترنت فقرأت خبر مفاده أب يشعل النار فى نفسه لعدم قدرته على تحقيق متطلبات اولاده وإليكم الخبر بالتفصيل

سلم الأبناء قائمة بطلباتهم لوالدهم أحمد إبراهيم عثمان «٤٦ سنة» عامل شعر الأب بالعجز وأخبرهم أنه لا يستطيع الوفاء بها ، لم يهتموا وكرروا مطالبهم ، حدثت مشاحنة بينهم ووقفت الزوجة كاميليا ناجي «٣٥ سنة» صامتة ، قطع العامل كل الأصوات بالاندفاع تجاه المطبخ أحضر جركناً مملوءاً بالكيروسين وأغرق به جسده، ثم أشعل عود ثقاب وألقاه علي ملابسه وهو يقسم أن يريحهم منه للأبد ، ليبحثوا عن أب آخر يجيب مطالبهم توهجت ألسنة اللهب واختلطت بصراخ الأم والأولاد ،
تجمع الجيران في البلوك رقم «٢» الذي يقيمون فيه بمساكن الجيزة بالمقطم فشلت محاولات إنقاذ الضحية ولفظ أنفاسه في الحال ، تلقي اللواء عبدالجواد أحمد عبد الجواد مساعد الوزير للإدارة العامة لمباحث العاصمة بلاغا بالحادث، ودلت تحريات المقدم طارق زايد رئيس مباحث الخليفة عدم وجود شبهة جنائية في الحادث ، وأيدت التحريات أقوال شهود الرؤية من الجيران ، تم إخطار النيابة التي تولت التحقيق

طبعا أكيد كلكم هتقولولى أحمد ربنا على النعمة اللى أنت فيها والكلام الجميل ده اللى كلنا بنردده بس صدقونى مش مقتنعين فيه بنسبة 100 فى 100 بدليل حادثة الإنتحار ديه وكل واحد عارف اللى بيعمله وبيدل على عدم رضاه عن حاله

أنا من قلبى باقول اللهم للك الحمد ولك الشكر على كل ما أنعمت به عليا وأوليت, وكمان أنا أستحقرت نفسى جدا جدا عربية وشقة مش عارف فين ومصيف فين وأحلام وحاجات كتيييييييييييير وفى ناس مش لاقية لقمة عيش حاف حسبى الله ونعم الوكيل

علشان كده بافكركم وبافكر نفسى أننا نحمد ربنا جدا على النعم اللى أحنا فيها وكل ماهنلاقى نفسنا بننحلرف عن طريق الحمد والرضا نفتكر الناس الفقيرة المسكينة

ونحاول بشتى الطرق والوسائل نأمن ليهم عيشة أفضل وفى النهاية بافكركم يوم الخميس 18\1 فى الذكرى ال30 لإنتفاضة الخبز لقائنا الساعة 3 ظهرا أمام مسجد السيدة زينب لمساعدة هؤلاء الناس ولكى نشعر بمعانتهم

سلام

حوار مع الرئيس

السلام عليكم

أنا مريت بموقف غريب جدا حلمت حلم غريب جدا, مش عارف ليه بس المهم أنى ماكنتش واكل جامد ولا حاجة , بس قمت من الحلم تعبان جدا لدرجة أنى ممكن يكون لتانى مرة أحس انى قلبى تعبان جدا

الحلم كان ملخصه حوار مع الرئيس بس طبعا أحتفظ لنفسى بأسرار اللقاء ولكن هاتكلم معاكم دلوقتى لو تخيلت فعلا أنى هاكلم الرئيس وسأجرى معاه مقابلة

أنا كنت هاكلمه فى وضع الناس الفقيرة ووضعهم وكنت هاعرض عليه بعض من أفكارى لحل مشاكلهم وكنت هسأله سؤال صريح ليه القطاع الخاص أو بمعنى تانى رجل الأعمال لما يمسك شركة أو مؤسسة بتنجح على الرغم أنى الحكومة كانت مسكاها قبل كده , يعنى كنت هأقوله من الآخر العيب عيب إدارة عليا يعنى حل مشاكل الناس دى فى الإدارة العليا

ثانيا كنت هاتكلم معاه فى الوضع السياسى الراهن والتعديلات الدستورية المقترحة وكيف أنى الل بيطنطنوا وبيزفوا التعديلات مع أى فشل سوف يحملوا الرئيس كل المسئولية وسيتركوه يعنى برده من الآخر كنت هاحذره من البطانة وشلة المنتفعين المحيطة به

دولت موضوعان كنت هاكلمه فيهم أكيد فيه حاجات تانية بس ده كان بلوج سريع

الحلم بأه كانت فيه دلالات جامده بنت جميله جدا جدا كانت فى مقام أختى وكنت بدافع عنها وعن الرئيس ضد بعض من الشعب حاولوا الإعتداء عليها وعليه

برده كان فيه واحد فقير محمول على محفة بس كان بيتألم والناس شايله

كان فيه امن مركزى وعساكر بيتفرجوا على الناس وهما بيحاولوا يمسكوا أختى فى الحلم وأنا بدافع عنها وباصرخ فيهم علشان يساعدونى

أخويا الكبير كان معايا فى جزء من الحلم وأخويا التانى جيه فى الجزء التانى

ظلام وناس بتتجسس على حوارى مع الرئيس وبعد كده روحنا القصر الرئاسى

آخر حاجة الملاحظ طوال الحلم أنى كنت بانصح الرئيس نصيحة من القلب وكان بمثابة والدى اللى ماشفتهوش من زمان وكمان كنت خايف عليه جدا وكمان أختى الجميلة جدا اللى كنت بدافع عنه وعنها

حاجة غريبة

سلام

النضال كفعل أنانى

السلام عليكم

أنا أستعرت العنوان لبلوج سابق لمدونة منال وعلاء وذلك بعد إعتقال علاء فى أحداث نادى القضاة
اللى فكرنى بالبلوج ده أنى كل ماباكلم حد من زملائى على أهمية التفاعل والحركة لكى تسطيع بلادى العزيزة التقدم والتطور
بس كل مرة كان فيه كلمة مشتركة وأخيرا سمعتها النهاردة من زميلة عزيزة أنى فيه تمن لازم يتم دفعه وعلشان كده الناس تحجم عن الحركة
فكان السؤال الكبير مالثمن بالنسبة لى؟ وهل تحركى ومجازا نضالى ده فعل أنانى أم لا؟
أنا كل الفترة الماضية ماكونتش عامل حساب للثمن لغاية لما زميلتى أخبرتنى , وهل أنا قادر على دفع هذا الثمن وماتبعاته.
أنا فى حيرة بس هاتكلم وممكن بعد ماأفضى اللى فى دماغى أطلع بنتيجة
الثمن ممكن يبقى إعتقال أو تعذيب وكمان أكيد كمان الشغل برده هيضيع ده على المستوى الشخصى وعلى المستوى العائلى أكيد هيكون خسروا فرد كانوا يتمنوا يكون فى وضع أفضل ويتجوز وووووحاجات كتير بس كمان ممكن أخواتى وأقاربى يتضرروا من هذه الأحداث
بس هل ده فعل انانى مع النفس أو عدم إكتراث بأمى وأبى وأخواتى وأقاربى
أنا شايف النضال هو النضال يعنى تضحيات يعنى ثمن لازم يندفع بس فى المقابل رضاء مع النفس وقناعة بما أفعله بس يارب يكون ده فيه نيه خالصه مش يكون هدفها سمعة أو صيت أو أو..... يارب
يبقى فى النهاية فيه ثمن هيدفع
هل أنا قادر على دفع الثمن؟
إن شاء الله ربنا يعيننى على التحمل , أكيد قدرتك على دفع الثمن ستتناسب طرديا مع مدى قناعتك بما تفعله (أى كلما زاد إقتناعى وإيمانى بما أفعله زادت قدرتى على التحمل) كلى ثقة فى الله أنه سيعيننى. أكيد محتاج انسان أو إنسانة يشد من أزرى ويشجعنى ممكن يكون أب أو أم أو زوجة جميلة عظيمة تضحى بجزء من وقتها لدعم زوجها أو أخ أو أخت أكيد هما دول أكتر ناس انتظر منهم دعم معنوى فقط يتمثل فى أنهم يكونوا متفهمين ماأفعله لأنه أكتر حاجة تتعبنى وأظن أنها تسبب كثير من الألم لمن يتصدى لمثل هذا. أن من حوله لايتفهمون ما يفعله

أخيرا ممكن أكون فى مرحلة من المراحل أحتاج تقدير ممن حولى بس أنا شايف دى حاجة أخيرة غير ذات قيمة طالما سلك الإنسان هذا الطريق

مصر يلبلادى 2

السلام عليكم

إستكمالا للبلوج السابق ياشباب وشابات مصر أنا بافكركم وبافكر نفسى برده, التعديلات الدستورية المقترحة من جانب الرئيس فيها 12 مادة متعلقة بالنظام الإشتراكى وبما أننا هنمشى نظام سوق حرة يعنى رأسمالى , وكمان بدون ضوابط يعنى دى فرصة للإحتكار والسرقة والنهب , علشان لغاية دلوقتى مش عارفين نطلع قانون منع الإحتكار ما علينا .

يبقى 12 مادة هيمشوا مش هيتعدلوا كده يتبقالنا من 34 مادة 22 هيتعدلوا كلهم إقتراحات متعلقة بصلاحيات رئيس الجمهورية ومجلس الشعب ورئيس الوزراء

أهم مادة بتاعة مدة الرئاسة لم يتم الإقتراب منها , وتعديلات تانية علشان المواطنة وكلام كتييييير الوفد والتجمع والناصريين وكفاية وبعد رجال القانون كلهم أقترحوا تعديلات

أشمعنا تعديلات الرئيس اللى دخلت مجلس الشعب والشورى وتعديلاتهم راحت فى الحمام, هأقولكم ليه؟ عارفين ليه

علشان الرئيس قدم التعديلات بصفته رئيس حزب الأغلبية رئيس الحزب الوطنى ده تخمينى للحدث وبالتالى بما أنى الحزب الوطنى يمتلك الاغلبية فى كل حاجة يبقى هوا أى حاجة وبالتالى ولا حاجة هتعمل حاجة وعلشان هيا محتاجة انى يبقى فيه حاجة يبقى ولا حاجة حتحصل من حاجة علشان مافيش حاجة هتعمل حاجة

ولو كان قدم التعديلات بصفته رئيس مصر يبقى كان لازم يستمع لأراء كل المصريين وياخد رأيهم

من الآخر انا متفائل فى حالة واحدة لو أهتمتوا وأخدتوا الموضوع جد واتحركتوا

تتحركوا لازم تتحركوا أحسن القعاد كتير بيتعب وبيعلم الكسل 25 سنة بدون حركة هتسبب ليكم موت جذع المخ والكساح وقرح الفراش وحاجات كتييييييييييييييييير

الحركة فيها بركة بتبقى مفيدة حتى أمعاء بطن الإنسان (المصارين) بتتحرك وتتخانق

ماشى الى لقاء قادم

سلام