إعدام صدام

السلام عليكم
على الصبح وقبل كل حاجة قبل الصلاة وقبل أى حاجة خبر فى الجزيرة فى حال تأكيده تبقى مهزلة
خبر تنفيذ حكم الإعدام فى صدام حسين أزاى ياجماعة أنا مش فارقة معايا صدام او غيره بس ده معناه أنى كل الخرفان العرب سيتم ذبحهم والتضحية بهم من قبل ماما امريكا فى أى لحظة
أول خروف صدام حسين صباح يوم العيد وعقبال الباقى
أصحى ياعالم ....وأصحى ياشعب مصر
أنا فى حالة شياط جامد أزاى يحصل وفين قادتنا العرب ولا هتعدى زى أى حاجة ياناس ياهووووووووأصحو أزاى ده يحصل
هيا دى الإمبريالية والرأسمالية المتوحشة اللى خايفين منها , فئة تتحكم فى الناس والبشر والعالم كله
ربنا يستر

تهنئه لمصر كلها

السلام عليكم

كل التهانى لمصر العظيمة بشعبها بعيد الأضحى المبارك وبعيد الميلاد

باكره بجد كلمة ده عيدى وده عيدكم لما حد ييجى يتكلم , باحب كلمة عيد مصرى آه أنا فرحان انى بكرة عيد الأضحى المبارك وأنى دى أيام الحج وبرده فرحان انى بيترعيده برده جاى فى السكة علشان كده مش شايف أى مناسبة لكلمة ده عيدى وده عيدكم

المهم انى النهارده فيه عيد فى مصر يبقى عيد بتاع كل مصر وكل شعب مصر العظيم

الليلة عيد الليلى لادى عيد ... الليلة عيد

سلام

يعنى أيه كلمة وطن ومواطنة

السلام عليكم

كلمة مواطنة سمعتوها كتييييييييير وهتسمعوها الأيام اللى جاية أكتر, أنا هاحاول أقول اللى اعرفه عن كلة المواطنة والوطن
بصوا ليى تبسيط لكلمة وطن شايف أنه ممكن يكون مفيد
الواو ولع أى الحب الشديد لدرجة التفانى والذوبان
الطاء الطمأنينة لشىء ما ممكن يكون إنسان أو بلد بتعيش فيه
النون النماء يعنى مكان بينمو أو شخصية بتنمو
يعنى من الآخر الوطن مكان هتحبه جدا وتشعر بالطمأنينة فيه وتستطيع أن تنمو أنت وأن ينمو هو أيضا يعنى الوطن
بس ممكن ماتحسش بالطمأنينة لوجود بعض القلاقل ولكن لولغك الشديد بهذا الوطن هتستحمل شوية وهتصبر لغاية لما ينصلح الحال

المواطنة بقى أنك تنسى كل اللى بيحصل حواليك واللى بتسمعه واللى بتشوفه واللى بتقراه واللى واللى وتفتكر أنى أى حاجة لازم تكون لمصلحة الوطن اللى هو مصلحتك ومصلحة جيرانك فى هذ الوطن

بجد حبوا مصر مصر جميلة جدا جدا بكل مافيها والله العظيم حلوة قوى
يعنى أيه كلمة وطن يعنى ريحة ومنظر ورمل وترااب وأهل وجيران وأحباب وكل حاجة حلوة

يوم عرفه

السلام عليكم

بصوا النهاردة كانت وقفة عرفات وقفة تجمع كل المسلمين تمثلا لأوامر الله وطلبا لعفو الله وغفرانه..يارب ان شاء الله السنة اللى جاية أكون أنا وزجتى اللى لسه ماتجوزتهاش على جبل عرفات ان شاء الله

النهاردة يوم ذات طابع خاص جدا تحس كده من أول اليوم أنى فيه إختلاف عن باقى الأيام, بس كل مرة كل سنة باحس فى نهاية اليوم ده بالندم مش عارف ليه

باندم على أنى اليوم ضاع وحاسس أنى ماعملتش حاجة بس فى النهاية يوم عرفة يوم عظيم يارب أعده علينا بكل خير وبركات سنوات عديدة

يارب أهدنى للخير ويسر لى الخير

اللهم أرزقنى زوجة صالحة تأخذ من صفات امهات المؤمنين تعيننى على أمر دينى ودنياى اللهم أرزقنى البركة فى الرزق والسعة فى الرزق

اللهم لك الحمد كما ينبغى لجلال وجهك ولعظيم سلطانك, اللهم كل من قابلته أو كل من سألنى الدعاء فاللهم أعطه سؤله وأرضى عنه ورضِه وأغفر لي وله, يارب أجعل مصر مستقرة متطورة يارب

مصر يابلادى

السلام عليكم

كنت عاوز أكتب بلوج عن الليبرالية والأخلاق بس لاقيت المواضيع سخنة جدا اليومين اللى فاتت لذلك فضلت أنى أعلق عليها وبعدين هاكتب عن الليبرالية ان شاء الله
بصوا خطاب الرئيس دعى لخطاب مجتمعى لمناقشة التعديلات لذلك أنا هاكتب براحتى بس مش قوى طبعا
ياسيادة الرئيس أشكرك وبشدة على التعديلات الدستورية المقترحة بس فيه حاجة مهمة جدا أنا شايفها الناس اللى بتشرب شاى بيقولوا

عاوزين شاى على مية بيضة برده أنا شايف أنى أحنا عاوزين برده دستور جديد لو امكن أو تعديلات تشمل كل المقترحات
كل الناس الى بطنطن أنى ده بيعزز مناخ الحرية والديموقراطية والكلام الكبير ده , ياناس ياهو هو ليه دايما عندنا عقدة الفراعنة بمعنى اللى يقولوا الرئيس أو المدير أو صاحب العمل أو الدكتور فى الجامعة صح وهو المنقذ وكلامه حاجة جبارة وحاجة مش عارف ايه وكلام كتيييييييييييير أنه خلاص الملهم واللى واللى واللى
يعنى أيه يعنى ماأنا ممكن أكون أنا أو انت أو أى حد أو حتى عامل النظافى كان أتكلم فى الحاجات دى من قبل كده ومن زمان كمان

ليه لما يقولوا الفرعون سواء الرئيس أو المدير أو الدكتور ده معناه أنه كلام منزل وملهم

أولا تعديل المدة 76 كل الناس طالبوا بتعديلها وكل رجال الحزب الوطنى قالوا لأ ..... ولما الرئيس أتكلم أصبح كلامه حاجة صح

ثانيا قانون الطوارىء كلنا من قبل ماأتولد لغاية لما ناس ماتت وناس أتولدت قالوا لأ لقانون الطوارىء ولا حياة لمن تنادى لما الرئيس قال بقى كلامه صح ولازم قانون الطوارىء يمشى وده كان غلط من الأول وكلام غريب , خلانى حاسس أنى قاعد مع ناس من كوكب تانى

والسؤال المهم ليه عدم المساس بالمادة 77 اللى بتحدد مدة الرئاسة ليه دى لم يشملها التعديل؟؟ليه ليه ليه فولوا أنتوا أنا مش عارف

يامصر كم أحبك حبا شديدا ويعلم الله مافى قلبى لكى من الحب , يامصر يابلادى كم عانيتى من قبل ويعلم الله ما ستعانيه غدا فى ظل عدم إكتراث أبنائك بك

يامصر يابلادى يا ملاذى باحبك وسأضحى من اجلك بكل غالى ونغيس وذلك من أجل حريتى وحريتك ياحبيبيتى يامصر الجميلة العظيمة

يارب أعنى على ذلك ووفقنى لما فيه الخير والثواب

زيارة لمدرستى

السلام عليكم

أخدت أجازة النهاردة من الشغل, وجاتلى فرصة أزور مدرستى من الإيواء للإعدادى مدرسة نادى شباب إمبابة الخاصة

الإيواء ده كان عبارة عن سرير ودادة اماما او بابا تجيبنى كل يوم الصبح للدادة ويفضل يلعب والدادة تراعية لغاية الساعة 3 ظهرا وييجى بابا أو ماما ياخدنى

كنا اللى بيدخل الإيواء مع بعض نفضل نكمل حضانة وابتدائى واعدادى , عارفين بعض بالأسم بنات وصبيان بنلعب مع بعض ونهزر ونهرج كان معانا بعض البنات من دول الخليج أبوهم مصرى وأمهم خليجية أو العكس المهم, كانت مدرستنا عبارة عن نادى وطلعله مدرسه

ملعب أخضر لكرة القدم والهوكى وملعب أسفلت للتنس والطايرة والسلة, وحلبة مصارعة وملاكمة وكمان صالات للجمباز وللمصارعة الرومانية والله العظيم كانت كده, كان ناقصها حمام سباحة

وكان الصبح تحية العلم ونشيد بلادى والقسم أقسم بالله العظيم أن أكون مخلصا لجمهورية مصر العربية وأن أبذل جهدى للدفاع عنها ضد كل عدو وضد كل غاصب والله على ماأقول شهيد ...تحيا جمهورية مصر العربية وكمان كنت ماسك الأخبار السياسية فى الإذاعة كانت أيام حلوة

تخيلوا بقى أد أيه كانت مدرسة رائعة وجميلة

وكانت حياتنا بريئة وجميلة , لدرجة أنى فى موقف حصلى أنى فراش المدرسة قال أنى شتمته شتيمة وحشة جدا وكان عقاب مدير المدرسة ليا أنى أقف فى الطابور ووشى للحيط رافع يدى عقابا لى مع أنى كنت مظلوم وتخيلوا بقى اللى بيقول الاذاعة واقف ورافع يده وكمان قدام زملائه كلهم من جميع المراحل حتى الثانوى بنات وصبيان كان موقف صعب وكان يوم خميس

طلعنا الفصل لاقيت نفسى سخنت وتعبان وماما جاءت تزورنى بالصدفة لاقيتنى كده فقالتلى مالك المدرس حكى ليها القصة وقالها أنا متأكد أنى محمد مظلوم وهاجبلوا حقه وكده

جيت على آخر اليوم تعبت وماعرفتش أتحرك ونزلونى عيادة المدرسة والدكتور أدانى دواء وماجبش نتيجة

روحونى البيت والدكتور بتاعى قال دى حالة نفسية وحالتى اتدهورت خالص لما مدير المدرسة عرف بعت الفراش لغاية البيت يعتذر لى ويتأسف لى

شوفتوا أد ايه مدرسة كانت حلوة

روحتها أمبارح بقى لاقيتها خرابة المسرح شالوه وعملوه صالة أفراح والحضانة والإيواء الله يرحمهم والمصيبة أنهم خلوها صبيان بس ولا طابور بإنتظام ولا إذاعة

قولت مش اشمعنى دى ماكل حاجة بتبوظ وهتبوظ ولسه اللى جاى

عرفتوا بحب البلد دى ليه ومش هاسيبها

حول وفاة رئيس تركمانستان

السلام عليكم

شيع اليوم الرئيس التركمانى فى مدينة عشق أباد ...لمن لايعرفون تركمناستان إنها إحدى دول الإتحاد السوفيتى السابق تعوم على بحر من الغاز الطبيعى يقدر بثلثى إحتياطى الغاز فى العالم

ليه كتبت بلوج خاص عنه أكيد مش من حبى فيه؟ أولا انا ماعرفوش غير بعد وفاته

بس الرئيس اللى يسمى نفسه أبو التركمان ويطلع قانون يحكم به البلد مدى الحياة وكمان يعمل كتاب فيه كل حاجة حتى الفتاوى الدينية ويخلى الشعب يقرأه كل يوم الصبح يبقى يستحق تعليق وتعليق وتعليق ..وآخر حاجة بقى أنه بعت نسخه من كتابه ده للقمر على متن مركبة فضاء روسية

ده يدل على مدى حكته وحنكته لدرجة أنه خلص على أهل الارض الحكمة وبعت كمان للكائنات الفضائية أيه العبقرية دى

والشعب كمان التركمانى شعب رائع وجميل زينا بالظبط

أمريكا تحب الرئيس السابق وكمان روسيا وكل الأنظمة العالمية بس حب أمريكا وروسيا غير حب الدول العربية

أمريكا وروسيا بيحبوه علشان الغاز أما الدول العربية لأنه كان ملهما لهم فى كيفية الجلوس على الكرسى لغاية الموت

كمان حاجةأخيرة بعد وفاته بدأت المشاكل لمن يسطر على الحكم بعده ولاقوه أنى أحسن واحد يمسك ....مش هأقول اللى.. هيأقول ليه جائزة

علشان أسهل عليكم هو حد أسمه على أسم أبوه يبقى مين؟؟؟؟؟؟؟؟؟

سلام

سلام

الحب

السلام عليكم

الحب كلمة من حرفين الحاء والباء بس , على الرغم من صغر حجمها بس معناها كبيييير قوى
أنا شايف دلالة الحب العطاء والتفانى لخدمة المحبوب هأقولكم؟
الأم بتحب بتحب أبنها أو بنتها جدا وبتخدمهم وبتتفانى لخدمتهم
كمان الزوجة والزوج بيحبوا بعض جدا وبيتفانوا لخدمة بعضهم البعض
كمان برده أهل هذا الوطن الذين يحملون همومه برده يتفانوا لحب هذا الوطن
طيب المشكلة أيه وأنا كاتب البلوج ده ليه مش عارف أقولكم أيه ؟

عندى مشكلة مع من أحب, أهل بلدى وبلدى أحبهم جدا وهما مش مقدرين ده
أهلى وأبى وأمى باحبهم بس هما شايفين أنى موضوع حب الوطن والمظاهرات والكلام ده معناه انى مش مهتم بهم
العمل باحبه ونفسى أحسنه بس برده الناس مش فاهمة ده
زوجة المستقبل برده باحبها وهيا مش حاسة ومش عارفة لأنى ببساطة لسه مقولتلهاش
باحب ربنا جدا وباحب دينى قوى وباحب وطنى وباحب الناس كلها حتى اللى مش بيحبونى صدقونى

ده هيجرنى بقى لمشكلة التعبير عن الحب؟
التعبير عن الحب بيختلف من شخص لآخر انا عن نفسى الدنيا معايا مهيبرة على طول
يعنى باحب مصر علشان كده مكن تعبيرى عن حبى لها هيرمينى وراء الشمس
وكمان باحب أهلى جدا ممكن تعبيرى عن حبلى ليهم ودايما ده بيحصل أنى بانتقدهم علشان يعملوا الأحسن يخليهم بيملوا منى
وبرده زملائى نفس الكلام
المشكلة بقى ظهرت بوضوح فى الشغل حبى للشغل اللى باعمله خلانى بقيت عصبى جدا وحرصى على أنى الشغل يطلع صح ومظبوط برده خلا الناس تزهق

يبقى طريقة التعبير عن الحب مهم جدا لتوصيل المعنى
باحبكم باحبكم باحبكم

طيب المحب منتظر أيه من اللى بيحبوه؟
منتظر الإمتنان والمودة وتبادل الحب , الحب الوحيد اللى مالوش مقابل حب الأب والأم لابنها أو بنتها
يعنى أنا منتظر مقابل حبى لكم
المهم اتكلمت معاكم وخلاص
سلام

العزيمة والإرادة والإصرار

السلام عليكم

انا تعبان قووووووى وعارف ليه وبقول لنفسى بقى هاتعدى وهاتعدى ان شاء الله وهتبقى أحسن ده هيخلينى أتكلم فى موضوع الإرادة والعزيمة والإصرار وتوفيق الله
مالفرق بين الارادة والعزيمة والإصرار؟
الإراده مشتقة من كلمة يريد , يعنى عاوز حاجة كلنا عاوزين حاجات أو نريد حاجات لكن لسه ملمسنهاش, فينا اللى يريد العمل أو يريد الزواج أو يريد المال أو يريد المنصب وهكذا
العزيمة بقى جاية من يعزم أو عزم أى نوى يعنى مرحلة لاحقة بعد الإرادة يعنى اللى عاوز عمل دى يريد, لما ابتدى أجهز السيرة الذاتية وابتدى ألف على الشركات أنا كده عزمت , اريد الزواج وبعدين عزمت على الزواج واتقدمت لانسانة مناسبة يبقى أنا كده عندى عزيمة وهكذا
الإصرار بقى هو أن أصر على ان أحقق طموحى أو هدفى أو ان اتزوج زوجة مناسبة أو أكون فى وضع معيشى أحسن وهكذا

شوفتوا بقى الكلمات الثلاث حلوة قوى أزاى وعلشان كده
أنا اريد أنا عزمت انا أصر
فى النهاية توفيق الله
يارب ألهمنى رشدى وقنى شر نفسى
اللهم رضنى بما قضيت و بارك لى فيما أبقيت وأرزقنى ايمانا صادقا ويقينا يباشر قلبى حتى لاأحب تأخير ماعجلت ولاتعجيل ماأخرت

سلام

الحياة 2

السلام عليكم

كنت قد وعدتكم أنى هاكمل موضوع الانتماء, بصوا بقى الانتماء عامل زى الجذور يعنى الإنسان بدون انتماء لدين أو وطن أو عائلة يبقى حاجة فى الهواء كده سهل انه يضيع
الانتماء لدين معين بيعطى الانسان حصانة معنوية وبتخليه مستريح نفسيا, الانتماء لوطن أو عائلة بيقى انتماء مادى يعنى بيخلى الانسان بيهتم بشئون الوطن ده أو العائلة دى وده برده بيأمن الانسان
وبالإنتماء الانسان يبقى عامل زى الشجرة اللى جذورها ممتدة
فيه سؤال مهم بقى ماهى الدلائل التى أحكم بها على أن فلان أو فلانة عندها إنتماء أو لأ؟
ده هيكون بأد أيه هو مهتم بالمكان ده أو أد ايه هو بيحاول يحسن المكان اللى بيحبه من الآخر لو الواحد منتمى لمكان هيبقى عامل زى واحد بيحب أكيد بيبقى نفسه يعطى كل شىء لمحبوبه وهيبقى خايف عليه جدا وهيستحمل منه برده سخافات أكتر من أى حد تانى
علشان كده انتموا لمصر حبوها كما بناتكم وزوجاتكم وأولادكم وأستحملوا منها سخافات بعض أهلها برده

ده يخلينا نشوف دورنا فى اللى بيحصل فى مصرنا العظيمة, وأد أيه أحنا أنانيين لأننا سايبنها وكل واحد بيقول وأنا مالى المهم نفسى
طبعا ده غلط كبير أهتموا ببلدكم فكروا تخرجوها أزاى من عثرتها فكروا أزاى تحافظوا عليها وأزاى تساعدوا أهلها وأزاى تعالجوها من كل الأمراض التى علقت بجسدها مثل الفساد والرشوة والمحسوبية والديكتاتورية
مصر دى بما أنى ذكر أشعر وكأنها أمرأة جميلة فى كامل هيأتها ذات جمال واضح وظاهر وذات رائحة ذكية وأخلاق عالية بس فيها عيب واحد أنى فيه بعض الأوساخ على ملابسها
وده دورى ودوركم علينا أن نزيل هذ الأوساخ ممكن بالمنظفات ممكن بحاجات كتير أكيد هنتعب شوية بس فى الآخر هافوز بأجمل أمرأة فى أجمل ثوب وفى أحسن صورة مصر مصر مصر
مصر تبكى من اوساخها ساعدوها
هل الانتماء من الدين؟ ده برده سؤال
مش عارف رأى الدين بس أنا شايف أنى الانتماء لبلدك من الدين لأنك لو انتميت كما وضحنا فى البلوج السابق أنى هدف وجودنا هو الإعمار والبناء, وبالتالى هتطور بلدك للأحسن وهتساعد على نجاحها وبالتالى هتعمر فى الأرض وبكده تكون عبدت ربنا
فى المرة القادمة هنتكلم عن أفعال الانسان ومالهدف منها وده هيجرنا للإخلاص ومعناه؟

الحياة

السلام عليكم

مش عارف ابتدى منين أو أتكلم أزاى بس هفضفض معاكوا
فى البداية ايه سبب وجودنا فى الحياة وليه أحنا موجودين وليه أحنا بالرغم أننا جنس واحد وهو الجنس البشرى إلا أننا لنا اليد العليا فى هذ الكون, وأزاى نقول الانسان ده مؤثر وأمتى نقول ده مالوش لازمة زى مادخل زى ماخرج , وأيه دور الدين فى حياتنا وكمان ليه الراجل بطبيعته يميل للأنثى والأنثى تميل للرجل, وأشمعنى كده من أول نظرة تلاقى ناس منسجمة مع بعض سوار ذكر وانثى أو ذكر وذكر أو انثى وأنثى؟
وليه بنحب بابا وماما وليه بنكره فلان وفلانة ويعنى أيه الانتماء لدين أو لوطن أو لعقيدة أو لفكرة؟
حاجات كتييييييييير هارد عليها حسب ما انا أعرف بس المهم أنى اللى هاقوله ممكن يكون فيه حاجة غلط بس نتناقش علشان نحسن نفسينا

أشعر بغض النظر عن المرجعية الدينية لأى شخص أنى سبب وجودنا فى هذه الحياة هو أننا مفضلون عن باقى الكائنات بنعمة العقل وبالتالى أحنا موجودين لإعمار الدنيا وأنه نتفاعل مع بعضنا البعض ومع الكائنات الأخرى المحيطة بنا وده هيخلينا نقول طيب وبعد كده ؟ وليه فى ناس وحشة وناس حلوة وناس بوشوش كتييييير وناس تشوفها تنرفزك وناس ترتاح ليها
يبقى أكيد فى حاجة الكويس هيجازى فيها والوحش برده كمان هيجازى أو بمعنى تانى أنه فى حساب؟ طيب الحساب ده مين اللى هيقوم بيه ومين اللى يقدر يحاسبنا كلنا وكمان مين اللى بيسجل لينا أعمالنا علشان نتحاسب؟
ده يقودنا لموضوع أنه يوجد خالق لهذا الكون وأنى دورنا فى النهاية بما أنه الخالق يعنى لازم نلتزم بأوامره ونواهيه يعنى برده لازم نعبده ونبحث عن رضاه
يبقى فى الآخر أحنا موجودين لعباده الخالق الله الواحد الأحد وده هيتم عن طريق تعاملنا مع الحياة أو بالاحرى حركتنا فى الأرض ...ده كده متهيألى جاوبت شوية

موضوع بقى الإنسان ده مؤثر ولا لأ .. ده هنقدر نحدده بمقدار حركته فى هذه الدنيا يعنى لما نشوف الأنبياء والرسل وهما أد ايه غيروا فى أفكار الناس أو لما نشوف أنى فكرة خليت ناس كتيييييير تعيش حياة أحسن أو فكرة برده خليت ناس كتييير تموت زى القنبلة النووية
يبقى من هنا نقدر نحدد مدى تأثير الأنسان وكل ماكان الإنسان مؤثر تلاقى حتى بعد وفاته الناس بتتكلم عليه وبتمشى على خطاه ودى حاجة عظيمة وأحسن مثال لهذا سيدنا محمد صلى الله وعليه وسلم لغاية دلوقتى والى قيام الساعة الناس تتبع سنته وكمان كل الأنبياء واللرسل وسيدنا عيسى فالعلماء وأنتى ماشى متعدش
يبقى فى النهاية أد ايه انت تؤثر وبماذا تؤثر تبقى أد ايه قيمتك

دور الدين فى حياتنا شايف أنه غذاء لروحنا ومرجعيه لأعمالنا الحياتية بمعنى اللى معندوش مرجعية يقارن وياخد قرار على أساسها زى اللى بيحرت فى الميه مش شايف حاجة ومابيعملش انجاز وبيضيع وقته...يبقى الدين هو المحرك ليك وهو المرجعية اللى بترجعلها فى حياتك

الراجل يميل للأنثى والعكس طبعا فى البداية دى فطرة الاتنين بيكملوا بعض أكيد بما أن الجنس غريزة عند الكائنات الحية يبقى أكيد ده عامل برده بس اللى يفرق الانسان عن باقى الكائنات الحية أنى الانسان يتميز بالعقل وبالتالى يستطيع التحكم فى شهواته وغرائزه وبالتالى خرج بهذه الصفة من الصفة البهيميه الى معنى آخر أسمى وأرفع وهى صفة الحب .....بس حب الأم غير حب الزوجة غير حب الأخت
طيب ده ممكن يكون دافع أكيد فيه دوافع تانية زى الرحمة والمودة والتكامل بتخلى بالفطرة الراجل يميل للأنثى والعكس
الناس بتنسجم مع بعض من أول مرة أو بتتنافر لأنها فى البداية تكون علاقة أرواح ثم علاقة أجساد يعنى لو الأرواح لم تتلاقى الاجساد لا تتلاقى

بابا وماما بنحبهم ليه على طول علشان ديه الفطرة أو بمعنى تانى دى غريزة برده عند الكائنات الحية وبتلاقيها فى صورتها الأفضل عند الانسان بس دى بمرور الوقت واتساخ الفطرة تلاقى ابن يقتل ابوه أو امه بمعنى تانى تلوث الأنسان بالحياة

الانتماء بقى عندى فيه كلام كتييييييييييير كاكمله بعد كده
سلام مؤقت والى لقاء

وصيتى

غدا سيكون يوم من أيام الحرية التى نصبو إليها
أشعر بشعور غريب, حاسس أنه هيكون يوم حريه , بس برده حاسس أنى هيحصل حاجة علشان كده بدأت بكلمة وصيتى
وصيتى لأبى وأمى هى ليست بوصية ولكن رجاء أن يرضوا عنى وأن يسامحونى , لم أخرج طلبا لشهرة أو مجد ولكن لشعورى أن هذا واجبى تجاه وطنى العزيز مصر لذلك سامحونى وأدعوا لى
وصيتى لأخوتى أوصيكم بمراعاة بابا وماما وسامحونى على ماقد اسببه لكم من متاعب, ورجائى أبقوا ربوا أولادكم على حب العدل والحرية وحب هذا الوطن مصر
وصيتى لزملائى سامحونى وأوصيكم بالاهتمام بالعمل ستكون الدنيا أفضل بقليل من الجهد كثير من العمل والمصارحة والشفافية حبيتكم كتيييير وأتمنى انى كل واحد فيكم بحقق أحلامة
وصيتى لأصدقائى شلة الكلية واى بى ام والجمعية الحشرية وجمغية رسالة ربنا معاكم ربوا أولادكم على عدم الخوف ربوهم على حب مصر وحب الله
وصيتى لزوجتى التى لم أتزوجها بعد بحبك قوى وربنا يجمعنا ان شاء الله وخلى بالك من مصر
وصيتى لأهل بلدى مصر مصر مصر
بحبكم كلكم حتى اللى هيضربونى بكرة باحبهم , وباحب مصر قوى

يارب تكون أعمالى خالصة لوجهك الكريم يارب رضاك على

الحمد لله على كل شىء اللهم أرضنى بما قضيت وبارك لى فيما أبقيت وأرزقنى ايمانا صادقا ويقينا يباشر قلبى حتى لاأحب تأخير ما عجلت ولا تعجيل ماأخرت

سلام والى لقاء

فى يوم من الأيام

السلام عليكم

فى يوم من الأيام سأكون على رأس أكبر شركة فى مصر
فى يوم من الايام سأكون صاحب أكبر رب عمل فى مصر
فى يوم من الأيام سأتزوج من تكون خير معين لى على أمر الدين والدنيا
فى يوم من الأيام سيكون عندى بنت وولد
فى يوم من الأيام ستعيش بلادى حرة ومستقرة
فى يوم من الأيام مصر ستصبح واحة الأمن والأمان
فى يوم من الأيام ستنقشع الغمة
كل هذا بتوفيق من الله

حالنا وحالهم

السلام عليكم

مش عارف عندى حالة من الطهقان والزهقان والقرف , بس تصدقوا بعد مارصيت شوية كلمات الكآبة دى اتبصت واستريحت شوية وممكن أكون عرفت ايه سبب اللى أنا فيه
ممكن يكون الشغل أو وضع البلد أو البيت أو علاقتى مع ربنا أو أنى مش لاقى حد أتكلم معاه
ممكن يكون ده كله فى بعضه , لآ هو فعلا كل ده مع بعضه بس هتفرج ان شاء الله

ليه بقى قولت حالنا نا دى عملة مشاكل كتير , هاحكليكم قصة هتفطسوا على نفسيكم منها كنت مرة فى الكلية وطلعت فى المدرج أدى الناس فكرة عن الفرق بين مسجد قبة الصخرة والمسجد الأقصى وكمان أدعوهم أنى يشاركزنا فى حملاتنا ضد المواقع الإسرائيلية, فذهبن لمسئول حرس الكلي علشان آخد منه الإذن وقولتله أنى أحنا بنتجتمع حوالى 10000 واحد ونوقع المواقع الإسرائيلية
وكانت المفاجأة أسئلة من نوع انتوا بتجتمعوا فين ومين اللى بينظم الإجتماع وبتحضروه فين وحاجات خلتنى أحس اد ايه الناس دى نايمة فى مية اللفت

ده حالنا مهمومين بالبلد وباللى بيحصل فيها
حالهم هما بقى آخر حلاوة موز باللبن نايمين على طول مقضيانها مارينا والريفيرا فى الصيف وأسبانيا وبرشلونه وروما فى الشتاء , وطوز فى البلد واللى بيحصل فيها

وفى ناس تانية مقضيانها عدس وبصل فى الشتاء وفول وجمصة فى الصيف وبرده تتحرق البلد ماهيا خربانه

مش عارف الناس دى هتبقى أمتى همها على البلد
صرخة جيفارا للعبيد ياتجهزوا جيش الخلاص ياتقولوا على الدنيا خلاص خلاص خلاص

علشان كده اللى خايف على نفسه ومصلحته لازم يخاف على البلد ولازم يضحى

تعليقا على خبر القبض على عصابة المتسولين

السلام عليكم
بجد مش عارف أبتدى كلامى أزاى وبأيه , غلطتى وغلطتكم كأفراد ولا غلطة المجتمع ككل ولا غلطة الحكومة وجهاز الشرطة بالذات ولامين بالظبط؟
لما يكون عايش بيننا أطفال متسولون وكمان مجرمون بس مش إجرام عادى سرقة ونشل ونهب لأ كمان هتك عرض وإغتصاب
أزاى ده يحصل فى بلدنا مش عارف إجابة واضحة؟
وكل يوم أخبار جديدة والحل أيه؟ فكروا معايا الأول دى غلطة مين وأزاى نحاسبه وكمان نمنع حدوثها مرة أخرى
دى مؤشر خطير لما آل إليه حالنا.... فيه حد هيقول وأنا مالى أنا الحمد لله ماليش أولاد ولا أطفال فى الشارع, باقولوا لأ أنت ليك حد فى الشارع موجود ممكن بنتك او أبنك أختك أو امك زوجتك أو زميلتك أبوك أو أخوك أكيد هيمشى فى الشارع مرة أكيد وهيقابل حد من الأطفال ديه
والأكيد أنى الأطفال دى هتطلب منه حاجة فى أول مرة ومع مرور الوقت هيتزعوا منه الحاجة دى بعد كده... هو ده التطور
علشان كده لازم يبقى فيه دور ليا وليك فى حل هذه الأزمة ومحاسبة كل المخطئين
أنا شايف أنى دورى أنا على الأقل توعية الناس بمدى خطورة هذا الوضع وتانى حاجة أشارك على حسب مقدرتى سواء بالتعاون مع الحكومة او الجمعيات الأهلية فى رعاية هؤلاء الأولاد والبنات وأخيرا توعية الآباء والأمهات اللى عاملين زى الأرانب ويجيبوا عيال وفى الآخر ولا بيعرفوا يربوهم ولا يعلموهم
تصدقوا أنى معظم الإعلانات الطبية دلوقتى فى القنوات العربية بالذات عن علاج مش عارف أيه لعلاج العقم والضعف الجنسى وزيادة القدرة على الإنجاب
زى مايكون خلاص خلصنا كل حاجة وقاعدين نفكر أزاى نستمتع .. بس ده نتيجة كبت الناس
الراجل مش عارف يعبر عن نفسه بحرية فى أى مكان فى الشارع أو الشغل يقوم معبر عنه فى بيته سواء بمعاملة زوجته معاملة سيئة أو الزعيق أو الشخط وكمان العيال الكتير زى مايكون متجوز أرنبة
والست مكبوتة فى الشارع وفى البيت تقوم مطلعة كل العقد بتاعتها على الخدامة والأولاد والجيران وهكذا كل المجتمع

عاوزين حرية ....حرية حرية حرية فى كل شىء وأى شىء
وسيبوا الناس تتعامل على راحتها هتلاقوا الناس برده بتتعامل بمنطق وحساب كفاية سلطة أنا اللى أعرف والباقى مابيفهموش أنا اللى عارف مصلحة البلد
كفاية بقى

طريقة أخرى للتعامل مع الوضع فى بلادنا

السلام عليكم

اليوم حضرت لفاء لأحد الجمعيات الخيرية فى مصر, بجد لاقيت شباب مقتنع بفكرة واحدة ليهم هدف واحد بس هما أفراد مختلفين
الفكرة هى حب الخير ومساعدة الفقراء والمحتاجين طلبا لثواب الله
منهم من يشارك بالمال ومنهم من يشارك بالمجهود ومنهم من يشارك بالأثنين حاجة حلوة الروح دى وأكيد أكيد اللى بيعملوه ده بيعود بالخير على المجتمع بيزود تلاحم المجتمع
الحاجة الأهم أنوا بيمتص جزء من طاقة الشباب التى لو لم تستغل لكان من الممكن أن تؤدى لهلاك المجتمع

التطوع والعمل الخيرى فى أى مجتمع يعبر عن رقى المجتمع يعنى كل مازاد عدد الأعمال الخيرية والتطوعية يدل على أنى المجتمع ده راقى
وفى لحظة من اللحظات أكيد الناس دى هتكون ذخيرة الوطن لمواجهة أى تحدى يهدد مصرنا الحبيبة سواء فى الداخل أو الخارج

لذلك أدعوكم للمشاركة فى هكذا أعمال بجد هاتحسوا أد أيه أنتم ممكن تفيدوا البلد أكتر وفى نفس الوقت تبقوا خير يمشى على الأرض