Tuesday, December 26, 2006

مصر يابلادى

السلام عليكم

كنت عاوز أكتب بلوج عن الليبرالية والأخلاق بس لاقيت المواضيع سخنة جدا اليومين اللى فاتت لذلك فضلت أنى أعلق عليها وبعدين هاكتب عن الليبرالية ان شاء الله
بصوا خطاب الرئيس دعى لخطاب مجتمعى لمناقشة التعديلات لذلك أنا هاكتب براحتى بس مش قوى طبعا
ياسيادة الرئيس أشكرك وبشدة على التعديلات الدستورية المقترحة بس فيه حاجة مهمة جدا أنا شايفها الناس اللى بتشرب شاى بيقولوا
عاوزين شاى على مية بيضة برده أنا شايف أنى أحنا عاوزين برده دستور جديد لو امكن أو تعديلات تشمل كل المقترحات
كل الناس الى بطنطن أنى ده بيعزز مناخ الحرية والديموقراطية والكلام الكبير ده , ياناس ياهو هو ليه دايما عندنا عقدة الفراعنة بمعنى اللى يقولوا الرئيس أو المدير أو صاحب العمل أو الدكتور فى الجامعة صح وهو المنقذ وكلامه حاجة جبارة وحاجة مش عارف ايه وكلام كتيييييييييييير أنه خلاص الملهم واللى واللى واللى
يعنى أيه يعنى ماأنا ممكن أكون أنا أو انت أو أى حد أو حتى عامل النظافى كان أتكلم فى الحاجات دى من قبل كده ومن زمان كمان
ليه لما يقولوا الفرعون سواء الرئيس أو المدير أو الدكتور ده معناه أنه كلام منزل وملهم
أولا تعديل المدة 76 كل الناس طالبوا بتعديلها وكل رجال الحزب الوطنى قالوا لأ ..... ولما الرئيس أتكلم أصبح كلامه حاجة صح
ثانيا قانون الطوارىء كلنا من قبل ماأتولد لغاية لما ناس ماتت وناس أتولدت قالوا لأ لقانون الطوارىء ولا حياة لمن تنادى لما الرئيس قال بقى كلامه صح ولازم قانون الطوارىء يمشى وده كان غلط من الأول وكلام غريب , خلانى حاسس أنى قاعد مع ناس من كوكب تانى
والسؤال المهم ليه عدم المساس بالمادة 77 اللى بتحدد مدة الرئاسة ليه دى لم يشملها التعديل؟؟ليه ليه ليه فولوا أنتوا أنا مش عارف
يامصر كم أحبك حبا شديدا ويعلم الله مافى قلبى لكى من الحب , يامصر يابلادى كم عانيتى من قبل ويعلم الله ما ستعانيه غدا فى ظل عدم إكتراث أبنائك بك
يامصر يابلادى يا ملاذى باحبك وسأضحى من اجلك بكل غالى ونغيس وذلك من أجل حريتى وحريتك ياحبيبيتى يامصر الجميلة العظيمة
يارب أعنى على ذلك ووفقنى لما فيه الخير والثواب

2 comments:

Anonymous said...

"يابلادى كم عانيتى من قبل ويعلم الله ما ستعانيه غدا فى ظل عدم إكتراث أبنائك بك" نكترث أزاى ممكن تقولنل مقترحاتك عن الأكتراث ممكن شبابها يعملوا ايه بما أنك مسلم ان مفيش حد مكترث غيرك أولنا ممكن نعنل أيه عشان نعمل حاجة احنا كمان.أرجو الرد

3bkarino said...

ياصديقى او صديقتى بص
أنا لا أنكر دور أى حد بس زاوية رؤيتك تختلف عن زاوية رؤيتى
فيه واحد شايف أنه لما يبقى شغال ومستقر فى الشغل ده غليدة للبلد والتانى شايف أنه لما يقول للغلط انت غلط يبقى بيشارك والتالت لما يسرق ويتخن جيبه يبقى بيشارك
كل واحد من وجهه نظره, علشان كده جيه وقت المشاركة بجد ووقت الرؤية الواحدة اللى مش هتتغير
لو أنت او انتى شايفة التعديلات دى صح انزلى وأزعقى الكلام ده صح ولو انت او انتى شايفه اللى بيحصل غلط أزعق وقول ده غلط بصوت عالى
هيا دى المشاركة تفاعل ودور على القنوات اللى تقدر تقول فيها صوتك ومتخافش من حاجة
طبعا هيجيلى واحد يقولوى كله زعيق ومظاهرات وكلام مافيش أفعال هارد عليه وأقول له أنت عملت أيه؟
محيت امية أحد ,شاركت فى عمل تطوعى, لميت الزبالة من جنب بيتكم, نضفت الشارع عملت أى حاجة لبلدك بدون مقابل ولو حتى ركعتين دعيت فيهم للبلد بس
هو ده الإكتراث اللى أقصده