Saturday, January 6, 2007

النضال كفعل أنانى

السلام عليكم

أنا أستعرت العنوان لبلوج سابق لمدونة منال وعلاء وذلك بعد إعتقال علاء فى أحداث نادى القضاة
اللى فكرنى بالبلوج ده أنى كل ماباكلم حد من زملائى على أهمية التفاعل والحركة لكى تسطيع بلادى العزيزة التقدم والتطور
بس كل مرة كان فيه كلمة مشتركة وأخيرا سمعتها النهاردة من زميلة عزيزة أنى فيه تمن لازم يتم دفعه وعلشان كده الناس تحجم عن الحركة
فكان السؤال الكبير مالثمن بالنسبة لى؟ وهل تحركى ومجازا نضالى ده فعل أنانى أم لا؟
أنا كل الفترة الماضية ماكونتش عامل حساب للثمن لغاية لما زميلتى أخبرتنى , وهل أنا قادر على دفع هذا الثمن وماتبعاته.
أنا فى حيرة بس هاتكلم وممكن بعد ماأفضى اللى فى دماغى أطلع بنتيجة
الثمن ممكن يبقى إعتقال أو تعذيب وكمان أكيد كمان الشغل برده هيضيع ده على المستوى الشخصى وعلى المستوى العائلى أكيد هيكون خسروا فرد كانوا يتمنوا يكون فى وضع أفضل ويتجوز وووووحاجات كتير بس كمان ممكن أخواتى وأقاربى يتضرروا من هذه الأحداث
بس هل ده فعل انانى مع النفس أو عدم إكتراث بأمى وأبى وأخواتى وأقاربى
أنا شايف النضال هو النضال يعنى تضحيات يعنى ثمن لازم يندفع بس فى المقابل رضاء مع النفس وقناعة بما أفعله بس يارب يكون ده فيه نيه خالصه مش يكون هدفها سمعة أو صيت أو أو..... يارب
يبقى فى النهاية فيه ثمن هيدفع
هل أنا قادر على دفع الثمن؟
إن شاء الله ربنا يعيننى على التحمل , أكيد قدرتك على دفع الثمن ستتناسب طرديا مع مدى قناعتك بما تفعله (أى كلما زاد إقتناعى وإيمانى بما أفعله زادت قدرتى على التحمل) كلى ثقة فى الله أنه سيعيننى. أكيد محتاج انسان أو إنسانة يشد من أزرى ويشجعنى ممكن يكون أب أو أم أو زوجة جميلة عظيمة تضحى بجزء من وقتها لدعم زوجها أو أخ أو أخت أكيد هما دول أكتر ناس انتظر منهم دعم معنوى فقط يتمثل فى أنهم يكونوا متفهمين ماأفعله لأنه أكتر حاجة تتعبنى وأظن أنها تسبب كثير من الألم لمن يتصدى لمثل هذا. أن من حوله لايتفهمون ما يفعله
أخيرا ممكن أكون فى مرحلة من المراحل أحتاج تقدير ممن حولى بس أنا شايف دى حاجة أخيرة غير ذات قيمة طالما سلك الإنسان هذا الطريق

2 comments:

maha said...

أكيد في ثمن، شيء رائع ان الواحد يعرف هدفه ويصمم عليه، عموما (الا إن سلعة الله غالية الا إن سلعة الله الجنة)و طالما نيتك الجنة يبقى ربنا يلهمك الصبر والإرادة.
جربت تقرأ سورة العنكبوت، لو لاحظت أول ايات كلها عن الجهاد و بعدين اية (ووصينا الإنسان بوالديه....) ثم استكمال كلام الجهاد. الشيخ سيد قطب في تفسيره قال ان وجود الأية دي معترضة الكلام عن الجهاد بيدل على الواقع الحياتي من خوف الأهالي على ولادهم و إن القران بيشير إن الحل الأمثل هو الإستمرار في طريق الجهاد مع مراعاة مشاعر الاهل...عموما إرجع لتفسير سيد قطب للأية دي جايز ينورلك حاجة. و ربنا يتقبل منك. بالمناسبة دي الرسالة دي بعتاها الحكومة ليك ولاصحابك الي حشرين مناخيرهم في الي مالهومش فيه

(هذا المحتوى لا يعبر عن راي الشخصي و إنما لمجرد الفكاهة)
رسالة الحكومة لإبنها المواطي

عزيزي المواطن بتاع النضال
يا راكب دماغك و غاوي الحلال
نصيحة يا صاحبي بلاش الخبال
وغمض عيونك و ربي العيال
************
بلاش المناكفة ولايم وعيش
هتتعب معانا و سهمك يطيش
نلفق لأهلك قضية حشيش
وتصبح حكاية و نكتة ومثال
***********
تعالى وهاودنا وعدي الأمور
وعيش في الطراوة و خش الطبور
لكن لو هتزعل ودمك يفور
هنشهد نهايتك في بحر الرمال
**********
هتصبح حرامي هتصبح امير
هتصبح حرامي و ندل وأجير
ونقدر نلخبط في أصلك كتير
وجدك شحاتة هيصبح شحال
**********
هنحلف بإن الحبايب شافوك
بتقبض يا خاين وتقتل أخوك
ساعتها مراتك هتلعن أبوك
وتلطم وتنعي احط الرجال
*********
مالكش انت دعوة بإيه الي ضاع
و مين الي شاري ومين الي باع
ومين الي كيل ومين الي شال
فحب الحكومة وحب السلام
وعلم ولادك يشدوا الحزام
علشان بكرة يا ابني هياكلو الحمام
وينسوا الاسية وينسو الهزال
فلازم يا صحبي تغمض عينيك
وطنش علينا نطنش عليك
وإياك تشاور لنقطع ايديك
وتصبح مواطن مايسواش ريال
***********
عزيزي المواطن بتاع النضال
يا راكب دماغك وغاوي الحلال
نصيحة يا صحبي بلاش الخيال
وغمض عيونك وربي العيال

عبقرينو said...

الزجل ده جامد جدا
أنت أخدتى ثواب ان شاء الله علشان نبهتينى لموضوع سورة العنكبوت وقرأتها الحمد لله