السلام عليكم
فى البداية قبل ماأكمل كتابة البلوج عاوز أشكر كل من شارك فى حملة التبرع بالدم أحمد وبيشوىووووووووووووووووناس كتير
هيا دى مصر بجد......كنت نفسى العدد يكون أكتر من كده بس دى البداية الناس فيها خير بس تلاقى الفرصة المناسبة
إستكمالا للبلوج السابق حول حرية الفكر والتعبير بصوا بقى هنتفق فى البلوج ده على حاجات وبعدين ناخد حالة حدثت فى مصر الفترة الماضية كدراسة ونحاول نطبق عليها الكلام اللى هنتفق عليه..ماشى أتفقنا
أولا أنا من وجهة نظرى لاتوجد قيود على الفكر بتاتا من حقك أن تفكر فى أى شىء وتاخد فيه وقتك فى التفكير وتعصر فيه دماغك وتدرسه وتجمع معلومات عنه, يعنى على قد مخك وثقافتك ودينك هيكون تفكيرك وآرائك اللى هتطلعها
معايا ولا توهتوا.... نقول بمعنى تانى أنت أد أيه بتتأمل فى الحياة وبرده أد أيه بتقرأ وأد أيه قناعاتك وأد أيه تأثير دينك عليك كل ده هو اللى هيكون وقود أفكارك مش أى حاجة تانية ولا تقولى بأه مجتمع ولا دين ولا بابا ولاماما ولا أى حاجة...ده مش معناه أنى باقلل من قيمة وتأثير الحاجات ديه بالعكس أنا مش عاوزهم يكونوا هما الشماعة اللى بنعلق عليها كل حاجة بحجة أنى الدين بيحدد تفكيرنا أو أنى المجتمع برده أو أى حاجة
ماشى دى الحاجة الأولى
ثانيا بعد مافكرت وفكرت وفكرت عاوز بأه أعبر ...نيجى لحاجة مهمة جدا جدا هيا التعبير عن أفكارنا أى خروج أفكارنا عن حيز اللى بيفكر
ودى أخطر حاجة لأنها هتلامس آخر وهتآثر فى الآخر اللى ممكن يكون إنسان زوج زوجة أولاد أب أم أقارب أصدقاء يعنى من الآخر مجتمع وبالتالى فيه شروط وحدود فى التعبير عن أفكارك ألا وهي أعراف وتقاليد المجتمع وبالتالى دين المجتمع ومنا هنا يجىء التصادم
أنى الإنسان بيفكر بس ميبقاش ذكى وهو بيعبر عن أفكاره يعنى مثلا مايجيش حد فى وسط ناس غلابة خالص وهو عارف الحل ليهم أيه وييجى يقولهم الأول تتعلموا ..كلامه صح بس على المدى البعيد لكن الناس دى علشان تمشى معاه محتاجة تاكل الأول
يبقى التعبير عن الأفكار محدود بحدود المجتمع والدين
هييجى سؤال مهم جدا جدا جدا فى مخ أى حد وهو ....هل ده معناه أنى أكون مقنع بحاجة وأعبر عن عكسها؟ وهل ده نفاق أم لا؟
طبعا طبعا وقعنا من نقرة لدحضيرة لكن ولا يهمكم ربنا موجود إن شاء الله والإجابة جاية تحت أيه...أمسك الإجابة
بص ياسيدى وياستى ده مش معناه نفاق خالص خالص ليه بأه...هناخد مثال بسيط جدا لة أنا مقنع أنى الجلباب هو اللباس المريح جدا ليا بس روحت مؤتمر أو دولة ولاقيت أنى اللباس الرسمى فيها هو البدلة هل ده معناه أنى منافق أو باخدع نفسى طبعا لأ
بمعنى تانى قناعاتك وأفكارك ديه ممكن تكون مقبوله فى مجتمع ما وغير مقبوله فى مجتمع آخر وبما أن الإنسان لا يعيش بمفرده يعنى لازم يتفاعل مع الآخر يبقى لازم يقبل ويتقبل الآخر والعكس صحيح يعنى معادلة من طرفين وبالتالى الإنسان مش بيخدع نفسه ساعتها
فى النهاية هناك حرية بلاحدود للتفكير وحدود مرتبطة بدين وعادات وتقاليد وعرف المجتمع فى التعبير
ماشى الحالة بأه اللى هندرس عليها فى الطريق بس ياريت بعد مانكتبها مايتقبضش علينا أو نعتقل ...برده مش مهم ربنا موجود وعلى مدى قناعة الإنسان ستكون تضحياته
أعتقلونى أعتقلونى مش هتشوفوا الخوف فى عيونى ..ده لأى حد يفتكر ولو لوهلة أنوا يعتقل أو يحجم أفكارى أو قناعاتى ولكن الحاجة الوحيدة اللى تحجم التعبير عن أفكارى وآرائى هو المجتمع بدينه وعاداته وتقاليده علشان زى ماقولنا فى السابق
No comments:
Post a Comment