السلام عليكم
كل يوم يزداد خوفى كلما أقترب ميعاد السفر وكلما نظرت فى عيون الآخرين ووجدت منهم نظرة إعجاب ورجاء من الله وتمنيات بالتوفيق ويعقب ذلك سؤال قاسى جدا
ياعم فلقت دماغنا بمصر والبلد والتغيير ومع أول عرض سفر بيعت القضية وسيبتها روح أنت بتاع كلام كلوكم بتوع كلام
طبعا طبعا مش عارف أقولكم التناقض اللى باكون فيه, فخر إنى بفضل الله هاروح مكان كبيرر وممكن أفيد نفسى وأهلى وبلدى منه بس برده حاجة كده بتقول لازم تقعد وطوز فى أى حاجة تانية
دى كلمة لكل من قال لى هذا السؤال, ياأصدقائى ويا أعزائى أنا مش بعت القضية ولا حاجة ياجماعة أكيد فى مرحلة من المراحل الإنسان بيدور على مصلحته شويه
وسعادتى ومصلحتى أكيد هتنعكس على البلد برده, وكمان حاجة تانية لو فضلت موجود فى البلد وواجهتنى مشاكل ولا حد فيكم هيساعدنى فى حل المشاكل دى صح ولا غلط؟
وكمان حاجة تالتة بقى أخيرة أعكسوا نفسكم مكانى كان هيبقى أيه تفكيركم؟
أكيد مش باقول ده علشان أبرر ليكم موقفى علشان أنا واثق من موقفى ولكن علشان أنبهكم أد أيه ممكن كلامك يبقى صعب وبيجرح
أنا موقفى واضح وصريح مصر دائما فى القلب بلدى دائما فى القلب وطنى دائما فى القلب
وفيه مقولة حلوة قوى للبابا شنودة عن مصر
مصر ليست وطن نعيش فيه ولكنها وطن يعيش فينا
مصر فى القلب فى أى مكان هاكون فيه ومش هنساها أبد إن شاء الله
دعواتكم وبرده عاشت مصر حرة مستقرة
No comments:
Post a Comment