Thursday, May 24, 2007

تاجين ...يعنى على قلبكوا للأبد

فيه تاجين مرروا لى ...طبعا بما أنى أتنين من شعب المدونين (سكوت وبحب مصر) مرروا التاجين يبقى أنا متوج لفترتين تزيد بعدد التيجان التى سأحصل عليها لأولادى وأحفادى...عاش الملك عاش الزعيم
هجاوب وربنا يستر والشعب السيبرى مش يغير رأيه :)

أحب شخص لقلبك فى الدنيا؟

هو الصراحة هما كتييير بابا وماما وأهلى وكمان حبيبتى

انسان مستعد تضحي بحياتك - ركز فى كلمة حياتك - عشانه؟

أى انسان عايز يعمل حاجة صح لمصر ولدينه ومش لاقى فرصة يحققه

انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
ممكن أكون كرهت بس مش لدرجة التقطيع والتشفى بس أنا باكره كل إنسان قافل دماغه ومش بيهتم بأمر البلد وأحوالها ممكن تكون مهتم بس مش قادر تعمل حاجة بس ده أحسن كتييييير من اللى عايش فى الطراوة ومية اللفت

ما هو:اسم أجمل كتاب كتبه بشر قرأته ومحتفظ به حتى الان؟

رجال حول الرسول لخالد محمد خالد وأنصح أى إنسان يريد أن يرى قدوة صحيحة فليقرأه سيجد قدوة فى العلم والمال والعمل والعبادة والإخلاص صحابة خير معلم وهو الرسول محمد صلى الله وعليه وسلم

اسم كتاب -كتبه بشر برضة- انت متعلق بيه وبتقرأه كل فترة؟

نفس الكتاب لو حبيت أحفذ نفسى أكتر على المضى فى الحياة والصبر على مافيها وتخيل حالى بعد تحقيق الحلم, كمان كل ماأفكر فى حبيبتى وزوجتى ان شاءالله أفتكر كتاب نساء حول الرسول وأتمنى من ربنا تكون زوجتى فيها صفات من صفات أمنا خديجة فى حنوها ورعايتها لزوجها وأنها كانت بمثابةالام وأمنا عائشة فى علمها وأمنا جويريه وماريه فى الجمال وأمنا أم سلمة فى نفاذ البصيرة وهكذا
كمان كتب مترجم عن كاتب روسى بعنوان كيف تكون منظم مشروعات
وكتاب عقل جديد لعالم جديد ...ل أورنشتاين

اهم جهاز منزلى انت متعلق بيه او بتستخدمه كتير؟

غالبا باستخدمة 17 ساعة يوميا وباكل عليه وباشرب عليه ومعايا فى كل حته وباحطه جنب السرير فى وضع الإستعداد الكومبيوتر

مكان تحس بالراحة عندما تدخله؟

أى دور عبادة باحس فيه بألفه كده وخصوصا لما تكون بسيطة وفيها ناس بسيطة

شىء تحس بالراحة النفسية عندما تنظر اليه؟

البحر والصحراء والأراضى الخضراء الواسعة

مكان تحس فيه بالحنين الى شىء لا تدرى ماهو و ذكريات جارفة الى لاشىء؟

واحة سيوة لأنها شاركتنى التخطيط لمستقبلى وفيها بساطة وطيبة وحنو غريب من أهلها والمكان نفسه وكمان بقى باليل وسط الصحراء ومافيش حد موجود خالص والقمر والنجوم فى السماء الصافية و4 من أصدقائى السيويين يجهزون الأكل أو نايمين أفتكر كل الل باحبهم كلهم من الأموات والأحياء وبخاصة حبيبتى وأدعى ربنا يرحم الأموات ويوفق الاحياء

اجمل مدينة زرتها داخل مصر ؟

مدينة بمفهوم المدينة والشوارع وكده يبقى الإسكندرية, أما لو هدوء وبساطة ونقاء يبقى واحة سيوة

أجمل مكان طبيعي رأيته داخل مصر ؟

بالترتيب واحة سيوة, سانت كاترين وبعدين القصير القديمة على البحر الأحمر

شخصية كارتونية بتحبها؟

أكيد باين من أسمى عبقرينو وكعبول وياريت اللى يعرف أسمهم بالأنجليزى يقولى

نوع هاتفك المحمول؟

أكيد مش نوكيا علشان باحس بالغباء وانا ماسكه من كتر سهولة التعامل معاه...معايا سامسونج

سرعة بروسيسور جهازك؟

واحد حصان وسبعة من عشرة

حجم ذاكرة -هارد- جهازك؟

80 مليار بايت

المساحة التى تشغلها المواد الاسلامية على جهازك؟
ولا بايت

أهم هدف انت واضعه لحياتك الآن؟

الآن نبقى 2 فى1 وبعد كده كل الأهداف التانية من حال مصر و تشغيل الشباب وشركات ووووو وكل الأحلام التى أتمنى أن تكون خالصة لوجه الله هيييجى وهيا واقفةجنبى وبتساعدنى

مواصفات فتاة الأحلام بالنسبة لك؟

متدينة –متعلمة –رقيقة - بتحب مصر قوى قوى قوى وكمان عندها قدرة على تحمل المسئولية علشان المسئوليات هتبقى كتييييييير قوى قوى ...ربنا يكرمنى بيها ...وباقولها
ياحبيبتى
وبادعى دعوة جميلة يارب ربنا يتقبلها منى اللهم أرزقنى زوجة صالحة تأخذ من صفات أمهات المؤمنين تعيننى على أمر دينى ودنياى تستخدمنى وإياها لخدمة الإسلام ونصرة الإسلام وعز الأسلام


صف ما يأتى:شعورك لما بتسمع كلمة مصر ؟

أجمل أمرأة رأيتها فى حياتى ولكن على جسدها بعد الأمراض والأوساخ تستطيع نفضها بيديها ولكن قلبها الكبيير مش راضى يعمل كده علشان الأوساخ والأمراض دى بسبب أولادها للأسف

شعورك لما بتسمع كلام عن اليهود؟

أهل كتاب ولكن الصهيونيين علشان اليهود خلاص مافيش....باحس بالغيرة والحسد ...باشوف أد أيه ليهم هدف وبيصبروا عليه لغاية لما يتحقق ويستطيعوا حشد كل ما يساعد فى نجاحة
عارفين عاملين معهد وايزمان من 1924 فى المهجر وكان فيه أينشتين ولما أنشأوا إسرائيل نقلوه هناك فى 1948 شوفتوا أد أيه ليهم خطة

شعورك لما بتشوف ظابط شرطة؟

بأسأل أزاى بيعيشوا مع اهلهم وزوجاتهم وأبنائهم وهما بيعملوا فى الناس كده واللى مجننى أكتر الشرفاء منهم ساكتييين ليه, ولما أختى يتقدم للزواج منها ظابط شرطة..لوالوضع فضل زى ما هو يبقى مافيش بنات للجواز عندنا

شعورك لما بتشوف الكناس العجوز فى الطريق؟
بابقى نفسى أنزل أخدوا فى حضنى وأشوف أولاده مين وأضربهم ولو مالوش أولاد يبقى أنا السبب فى أنه كده علشان مش أهتمت بيه...وباستحقر كل واحد بيرمى حاجة فى الشارع ويخليه متسخ وواحد فى عمر جدى أو والدى بيكنسه

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
شعورين نفور وغبطة
نفور لو كان مظهر بس ومش بيشتغل ولا بيفيد البلد وكمان دماغة مقفولة وعنده أفكار زفت
غبطة لو حياته مستقرة وله عمل وله عقل متفتح وكمان له تأثير ساعتها باغبطه وباقول ربنا يهدينا ويهديه

احساس يراودك فى اشارة مرور مغلقة بسبب مسئول كبير؟
غضب شديد وبافكر بكرة لما يسيب المنصب هيبقى شعوره أيه
طبعا مش همرر التاج لحد علشان أفضل متوج لآخر العمر..عاش الملك عاش الزعيم:)
باهزر التاج أتخلت عنه لأى حد عاوزه ...يسقط المللك المتكبر الظالم..يسقط الزعيم

5 comments:

البتاع said...

عبقرر
ازيك ياراجل؟؟
انت متأكد ان المدونة كانت كده امبارح؟؟
اصل كنت هنا امبارح لقيتك لاغى الكوممنتات
!!!!!!!!
اه والله
والبلوج التانى بيدينى رسالة انك مش سامح لامثالى يشوفوه
!!!!!!!!!!
حتى والله رحت استحميت وجيت تانى لقيت نفس الموضوع
فعرفت انها مش قصة نضافة يعنى


قال صحيح الكلام ده؟؟؟

عبقرينو said...

أزيك شرفتينا والله, العملية مش كده خالص , يافندم أنتى تشرفينا فى أى قعدة
العملية بس أنى مش كنت فى المووود شويه فقولت أمارس بعض من الديكتاتورية ويبقى الناس تسمع وتقرأ من غير ولافرصة أنها تعبر حتى
بس نزولا على رغبتى فى ممارسة الديموقراطية والسماح للطرف الآخر بأنه يدلوء رأيه قررت فتح الكومنتات

watanya said...

يا عم حافظ حافظ على صحتك البلد محتجاك
17 ساعة كومبيوتر حرااااااام
وسؤال
لو اختك اصرت على الزواج من ظابط الشرطة موقفك هيبقى ايه؟

Anonymous said...

ياعم صحتك البلد محتجاك
17 ساعة كمبيوتر حرااااااااام
سؤال:
لو اختك اصرت على ظابط الشرطة موقفك هيبقى ايه؟

عبقرينو said...

وطنية...أسمك معبر جدا
آه 17 ساعة مش ليا صديق فى الغربة غيره :(
طبعا طبعا أنا متأكد إن شاء الله أنى أختى مش هتصر على الجواز من ظابط شرطة وإذا أصرت يبقى ده قراراها وعليها تحمله وهتعرف أنى بالنسبة لى جوزها هبقى مستنى ليه غلطه وساعتها هاظبطه :)