لقطات من إعتصام يوم الأحد

السلام عليكم
فى البداية حابب أشكر كل اللى كانوا مشاركين فى الإعتصام من الشباب بنات وصبيان بجد شكارشكراشكرا وهاتعرفوا ليه فى السطور القادمة

(1)
قبل الإعتصام بيوم أعددت العدة للإعتصام جبت 4 صفافير بتوع الحكام و6 زمارات بتاعة الأطفال وقررت أنى ده يكون سلاحى فى الإعتصام, وبعدين روحت الشغل تانى يوم طبعان بافكر أيه اللى هيحصل وباتخيل شكل ميدان التحرير هيبقى عامل أزاى وكمان ذنب الناس اللى شجعتهم أنهم ينزلوا هيبقى فى رقبتى وبخاصة أنى كان فيهم زميلة عزيزة أول مرة تشارك فى إعتصام فى الشارع وفى ميدان التحرير كمان بس الحمد لله قبل الإعتصام بدقائق معدودة قررت عدم الإعتصام ومشاركتنا بمتابعة أخبارنا وتوصيلها للحركة والناس وبكتابتها على البلوج الخاص بى وكانت بجد سهرانة ومتابعنا لحظيا شكرا ليها جدا.
فى واحد زميلى نزل معايا وأول مرة يمزل هو كمان مظاهرة فى الشارع, بمجرد وصولنا ميدان التحرير لاقيت الظابط اللى أخد بطاقتى أمام مجلس الشعب قولت ليلتنا فل وبعدين أتمشينا لغاية حزب التجمع لاقيت تانى ظابط اللى حبسنى فى العمارة يوم ماكنت بوزع الورد, قمت قولت لزميلى كده هاتظبط وانت كمان معايا, دخلنا مكتبة الشروق يشوف كتب يشتريها وانا براقب الجومن المكتبة

روحنا نصلى المغرب فى مسجد الرحمة وراء مكتبة الجامعة الأمريكية وخلصنا طلعنا لاقينا الدنيا مليشة أمام مكتبة الشروق وعربية الترحيلات واخدة الشباب وماشية

قررت ساعتها نروح نقابة الصحفيين وفعلا مشينا طلعت حرب ودخلنا لشارع النقابة اللواء بيقولنا على الرصيف يابه قمت طلعت الصفارة وزميلى كمان وصفرنا الظباط فوجئوا والشباب اللى بيتظاهر سكت لوهلة افتكروا المنتخب القومى نزل الملعب

دخلنا مع المعتصمين وحكيتلهم على اللى حصل وبدأت أوزع الصفافير وبدأنا التصفير والهتاف

(2)

على الساعة 10 كده طلعنا كافتيريا النقابة علشان ناكل وكلنا وشربنا شاى وعمرنا الطاسة وبعدين قعدنا نتكلم مع مجموعة من الشباب عن الدولة المدنية والعلمانية والإخوان وكلام كتير, كفاية انى أقولكم كنا واحد ليبرالى علمانى وواح ليبرالى إسلامى وواحد إخوان وواحد والعبد لله طبعا انتوا عارفين أنا ابقى ايه, الخلاصة المستفادة منه أنى مصر فيها شباب مثقف واعى جميل رائع متفاهم وينتظر القيادة التلى تستطيع توجيهه

(3)

نزلنا بعد امناقشة مع بعض متفاهمين انضممنا للشباب المعتصم وبعدين بدأنا نغنى ونصفر تانى لغاية الساعة 1 كده لغاية لما خرج مدحت وجالنا

(4)

عقد أبو عيطة وساهر إتفاق مع الامن أنى احنا ماننزلش عن رصيف النقابة فى مقابل تخفيف عدد المجندين علشان المجندين يرتاحوا ومايقفوش طول الليل ياطيبيتنا

(5)

طول الليل ماعرفتش أنام قمت كل شوية أضرب شاى وأرغى مع الناس فى كل حاجة بس كلهم بجد شباب رائع مثقف جميل ظريف, ومكانش يهمنى أعرف غير الاسم الأول لكل واحد فيهم علشان أعرف اتكلم معاهم بس, عمرى ماسألت أى حد فيهم ميولك السياسية أيه أو ديانتك أيه؟ كلنا مصريين محبين لهذا البلد

(6)

فى الصباح وبعد صلاة الفجر مباشرة جاءت أزمة تنفسية لأحد المعتصمين وهو مأطلق عليه العم كيمو وزير تموين الإعتصام, وبعدين طلبنا من الأمن عربة إسعاف ولم يستجب لنا وأضطررنا للإتصال نحن بمرفق الإسعاف والإسعاف أتأخرت وأضطررنا لنقلة بعربة تاكسى, شكرا جدا للتعاون الامنى

(7)

على الصبح كده لاقينا عربيتين حوالى 8 أفراد معلقين لافتات مكتوب عليها جبهة مصر الحرة...متعاونون ولاقينهم رافعين علامة النصر قمنا بتحيتهم وفوجئنا بنزول هؤلاء السباب وقاموا بسبنا وحاولوا الإعتداء على عبد القدوس وقاموا بالبصق علينا , طبعا الأمن لم يتحدث معهم ولم يعاملهم كما يعاملنا

(8)

على الساعة 10 صباحا بدأ توافد الاعضاء وبدانا الهتاف مرة أخرى وجاء طبعا بتوع نضال العوامات يتصوروا ويتكلموا فى التليفزيونات وبعدين دخلوا يجلسوا فى صالون النقابة

(9)

مر اليوم كما أى يوم من أيام التظاهر بس الأمن كان حاكم سيطرته دونما عنف, وبدأت المناوشات عندما حاول بعض أعضاء الحزب الوطنى النزول بمظاهرة والتحرك بها فى نشارع عبد الخالق ثروت وطبع الأمن سايبهم ومش بيعملهم حاجة لغاية لما هددنا أن لو تركوهم هكذا سنتخلى عن هدوئنا وسنتعامل بعنف , فتم تهدئة الموقف

(10)

الأمن كان يسمح بخروج الناس لدرجة أنه كانت هناك 4 بنات أمريكيات جاءوا متضامنين معنا ولم يستطيعوا الخروج إلا بعد تدخل السفارة الأمريكية ودى مهزلة من الامن

(11)

على الساعة الرابعة جاء المفرج عنهم من الشباب الدروبى وأسد وزملائهم, طبعا كنا فى حالة تعب شديد والأمن لم يسمح لنا بالخروج

(12)

فى النهاية سمح لنا الأمن بالخروج واحد واحد تحت إشراف الجميل خالد , ولما جيت أخرج رفض الظابط خروجى بحجة انى السبب فى التصفير والإزعاج, طبعا كان موقف وحش جدا بس الحمد لله ندى القصاص خرجتنى معاها ووصلتنى

أنا بعد الإعتصام ده متفائل جدا لعدة أسباب: مصر فيها شباب مثقف واعى ورائع بارلغم من إختلافاتهم السياسية وتوجههم الدينى بس كلهم مشتركين فى هدف واحد وهو حب مصر

كمان الثبات على المبدأ شىء مهم جدا والإقتناع بما تفعله يعطيك ثبات وصبر على تحمل العواقب

كمان بعض النماذج الجميلة كان فيه بنت مش عارف أسمها كانت ترتدى علم مصر وترفع لافته وبتهتف وفضلت ومعنصمة معانا وباتت كمان ووقفت من الساعة 9 لغاية الساعة 5 على قدميها كما هى بجد مثال رائع

فيه لمحات كتيرة هاقولها بعد كده

بس باحب أشكر بعض الأفراد زميلتى العزيزة اللى كانت متبعانا وبتنقل أخبارنا على البلوج وعلى موقع كفاية شكرا ليكى وكمان معلش غرامة الموبايل

وباشكر ساهر وعبد القدوس والقزازوالعم كمال على مبينهم معنا ووجودهم بجانبنا وتوجيهاتهم

باشكر ندى القصاص على موقفها وكمان سعيد جدا انى تعرفت عليها

شكرا لكل الشباب اللى باتوا معان وشاركونا وهيا دى مصر ومصر بكرة أحسن بنا إن شاء الله

شكرا لله أولا وأخيرا

سلام